Chulusalɛm Sɔla Tambei

Teleŋnda bɔɔbɔɔ, waŋnda Chuda wa Chɛhowa malɔɔ piɛiyo, ma muliŋ mɛlɛkaa lachoowaa sooluuwo. Le wɔsila bɔɔbɔɔ, Chɛhowa wa kindiŋndo le nda malaa. Mbo yɔŋ wanaa bɔɔbɔɔ ndaa suaa le ndu wa o nda lo le nda silaa, kɛ a yeŋ lani le. Ma muliŋ wanaa ndaa suaa le Mɛlɛka wa mamɔɔ. Vɛɛ Chɛhowa looku yɛ piɔmaa ndaa sooluu wa faŋa?

Nɛbukanɛɛsa, masaa le Babilɔŋ wa tuŋ hiouwɔɔ lachi a chiooŋ biuwo. Teleŋ tase o bii Chulusalɛm ndo, mbo bii Masaa Chɛhowakiŋ, wanaa fula o yuŋgu lemasaa choo wa, puaa chɔuwa, vɛlɛ a wanaa chaa nyɔɔŋ toosiaa a laba wa, mbo kua a nda kpou Babilɔŋ. Mbo chua vɛlɛ nyɛm kɛŋ wa o chiɛi Chɛhowa wo niŋndoŋ kpou. Okoŋ, mi Nɛbukanɛɛsa siiŋguu Sɛdikaya masaa le Chuda.

O kandɔŋndo, Sɛdikaya wa Nɛbukanɛɛsa diomndo tueiyɔɔ. Kɛ mi chieeŋ balu ndu woŋ, a wanaa lachoowaa dimi maa le Mɛlɛka nda suaa ni wa sila Sɛdikaya maa o simul masaa le Babilɔŋ. Mi Chɛluimaya sila ndu aa: ‘Te a simul masaa le Babilɔŋ pɛ, piɔmndaŋ, yiaaŋ, a naalaŋ la cho hunɔɔ o lɛŋnde Chuda leŋ niŋ.’

Mɛɛ Sɛdikaya chii wɔsilaŋ la ŋɔmaa o masaleŋ choo, mbo kɛɛsiaa le masaa le Babilɔŋ simullo. Mbo yooŋgu le puaa chɔuwa Ichipi le ma huŋ mala ndu. Okoŋ mi Nɛbukanɛɛsa yɔŋ puaa nduaa chɔuwa le ma huŋ del Chulusalɛm choo a sɔŋgɔɔ. Nduyɛ ma kila dɔɔŋgɔɔ chiee lekɔɔ. Mi Chɛluimaya dimul Sɛdikaya aa: ‘Chɛhowa dimi maa te a tusiŋ pɛ masaa le Babilɔŋ o ba bɛŋgu, num a chiee numndo kpou cho pioŋɔɔ sɔla. Kɛ te a kɛɛ ndu tusiŋndo o ba bɛŋgu pɛ, Babiloniaŋnda cho Chulusalɛm lomɔɔ, okoŋ ma kuɛ a num o chɛleŋ niŋ.’ Mi Sɛdikaya dimi aa: ‘I cho ndu tusiŋ o ba bɛŋgu le!’

Wɔsioo hiouwɔɔ o pilɛ a tɛndaa tɛɛŋ, mi puaa chɔuwaa Babiloniaŋnda pial kpaki balu Chulusalɛm ndo, ma mal chioo o yiŋ. Ma luam chiɛi Mɛlɛkaa, ma diu diu wanaa bɔɔbɔɔ, nduyɛ ma kua a waŋnda o waalaŋ niŋ o chɛleŋ niŋ.

Mi Sɛdikaya nyaanuŋ, kɛ mi Babiloniaŋnda tisa ndu kɔɔli. Ma kɔ bii ndu Chɛluiko ikɛi, ma kua a ndu naa Nɛbukanɛɛsa chua. Mi masaa le Babilɔŋ tosa mi Sɛdikaya lo tofaa ma diu puaa nduaa ndu o hɔl. Okoŋ, mi Nɛbukanɛɛsa pesi Sɛdikaya hɔltaŋ, mbo wou ndu o chiɛi manyumndo niŋ. O lo loŋ haaa mbo wu. Kɛ mi Chɛhowa chuel waŋnda Chuda buŋgɛi aa: ‘Te wɔsilaŋ 70 la hiou pɛ, I cho nya miŋgi Chulusalɛm.’

Yɛɛ wa yɛ yɔŋnɔŋ a feleŋguaa nda kuɛ o chɛleŋ niŋ Babilɔŋ nda? Baa ndaa hiau niŋ pa lachi a Chɛhowa piɛiyo?