Maalikɛiya Yonda Violɔŋ Chiisu Wo

Ɔkɔɔstɔɔ Siisa wa masaa le Masale Luomaŋnda ni. Nduyɛ mbo duau sawaa maa Chuuwa kpou miiŋgu o chieeŋ ndaŋ ma kɔ poonyiaa nda diolaŋ. Le hei, mi Choosɛ nda Meele kua Bɛtilɛhɛm, kanifuule loŋ yuŋgu Choosɛ wo ndoo fula ni. Nduyɛ teleŋndo wa niŋ kpɛɛluŋ le mi Meele ndoo velu.

Mɛɛ nda fuuluu Bɛtilɛhɛm, fondaŋ nda saaluŋ kinɛi le ma wa o yiya wo wa naa nda manda chɔluaa wa ni. Loŋ nda wa ni mi Meele vialu Chiisu. Mi Meele wou ndu o kolalaŋ niŋ, mbo yambu ndu naa ndaa dou chɔluaa nyɛdiaa wa.

Ichɔl koŋ, wanaa mandaa lasaa apum wa saa ndaa mandaa Bɛtilɛhɛm ikɛi. O lepilɛ niŋ kpe, mi maalikɛinɔ Chɛhowaa sim nda o hɔl, nduyɛ mi paŋgele Chɛhowaa balu nda silɔ. Mi siooŋnde bii wanaa mandaa lasaa haa. Kɛ mi maalikɛinɔɔ dimul nda aa: ‘La yɔŋ isiooŋ te. I nɔ yooŋgu kɛndɔɔ le nya. Mɛsayanɔɔ veluŋ hau Bɛtilɛhɛm.’ A teleŋ koŋ, mi maalikɛiyaa bɔɔbɔɔ o choo choo niŋ fula nda o hɔl, ma wa dimioo aa: ‘Nya cho o choo choo niŋnda la saŋgala Mɛlɛka, nduyɛ kɔl nyuloo cho le wanaa cho o lɛŋndeŋ choo wa.’ Okoŋ, mi maalikɛiya kuaŋnuŋ. Yɛɛ wanaa mandaa lasaa haa ndaa tosa yɛ?

Mi wanaa mandaa lasaa dimulaŋ aa: ‘La ŋ kɔŋnuŋ Bɛtilɛhɛm suŋ suŋ.’ Ma kua chɔ chɔ, nduyɛ ma kɔ saaluŋ Choosɛ nda Meele a chɛlɛkpɛ nda sɛnɛiyo.

Mi kɔndɔfillo bii wana o wana tuei nyɛ maalikɛinɔɔ dimul wanaa mandaa lasaa wo. Mi Meele yiyaŋ yiŋgoloŋ a diomnda maalikɛinɔɔ dimul ndu laŋ, nduyɛ mbo kɛsiŋ ndaŋ o kɔl. Mi wanaa mandaa lasaa miiŋgu saa ndaa ikɛi, ma wa Chɛhowa balikaa mello le nyɛ o nyɛ nda che, nduyɛ ma tuɛiyo.