Teleŋ Chiisu Wa Wɔsilaŋ 12

Choosɛ ni, Meele ni, a Chiisu, Naasaluɛi nda wa ichali ni. Choosɛ nda Meele ndaa nɔ chuauwaa cheleŋ o Chiisu kɔɔli, nduyɛ nda kpou Naasaluɛi nda wa ichali ni. Kaapindɛileŋ Choosɛ ndoo tosa ni le yuŋgu ndɔɔ kioo nyɛm nda hauba woŋ. Mbo pɛɛku nda a Chɛhowa okɔɔ vɛlɛ a Sawala ndɔlaŋ. Mi yuŋgoo hoo ndoo kuɛ o chiɛi Chuuwa ndaa piɛi Mɛlɛka wo niŋ teleŋ o teleŋ. Nduyɛ iwɔsi o iwɔsi, mi ndaa kuɛ Chulusalɛm le Bɔŋaŋ Hiouwɔɔ Choo Wo biyɔɔ.

Chiisu wa wɔsilaŋ 12 mi yuŋgu ndɔɔ buli tiŋ vilɛiyo le kɔlaŋ Chulusalɛm maa paandu. Chulusalɛm wa o piaa cha a wanaa ndaa kuɛ le Bɔŋaŋ Hiouwɔɔ Choo Wo biyɔɔ wa. Mɛɛ nda chii bɔŋaŋndo, mi Choosɛ nda Meele kandu miiŋgoo o nda lo. Ndaa yiyaŋ ko maa Chiisu wa wanaa nda wa miiŋgoo wa tɛɛŋ. Kɛ mɛɛ nda tofa le Chiisu wanayaŋ ndaŋ tɛɛŋ, a seeluŋ ndu le.

Ma miiŋgu Chulusalɛm, nduyɛ le palɛi i yaa kpulukuu, a wa ndu nuuviaa. O mɛɛlulaŋ kpɔŋ, ma kɔ saaluŋ ndu o chiɛi Mɛlɛkaa niŋ. Chiisu wa ichali wanaa pɛɛku waŋnda sawala Mɛlɛkalaŋ nda tɛɛŋ. O wa nda nilaŋ yaŋɔɔ nyɛkɛndɛi, nduyɛ mbo wa nda nyuuniaalaŋ. Mi nyɔɔ hɛnaŋ wanaa pɛɛku waŋnda sawala Mɛlɛkalaŋ nda tau, okoŋ ma kandu ndu nyuuniaalaŋ. Mi kɔndɔfillo bii nda a mulila o wa yɔŋgoo laŋ. Ma cha kɛsɛ maa Chiisu bii Sawala Chɛhowa laŋ bila nyɛkɛndɛi.

Choosɛ nda Meele wa buulaŋndo tau. Okoŋ, mi Meele dimi aa: ‘Po nuu, ŋ cho num nuuviaa ba o ba fee! Kuɛɛnɛ ŋ wa yɛ?’ Mi Chiisu mulul ndu aa: ‘A sina nuaa maa I nɔ mi wa o chiɛi Finya nuu niŋ te?’

Okoŋ, mi Chiisu miiŋgu Naasaluɛi nda wanaa velu ndu wa. Mi Choosɛ pɛɛku Chiisu wali lekaapindɛiyo. Wana suu maavɛɛ ŋ yiyaŋ yɛ maa Chiisu wa teleŋ o wa wɔsilaŋ 12? Mɛɛ Chiisu wa hiouwɔɔ lachi fau a hindɔɔ yɛ, lende o wa hiouwɔɔ lachi a taasi Mɛlɛkaa sɔlaa ni. Nduyɛ mi Mɛlɛka a waŋnda chieeya hɛnaŋ a ndu.