Chua Hiŋ o Sooŋ Mamɛŋndo Wo

Mɛɛ Bɔŋaŋ Hiouwɔɔ Choo Wo chuu, mi Chiisu nda buɛiyaa nduaa wa miiŋgoo Kalili, ma keeku a Sameeliaa. Mɛɛ nda fuuluu o sooŋ Chekɔpu wo, mi Chiisu chal pɛŋgioo. Nduyɛ o chioo Saika ikɛi sooŋndo hoo wa ni. Mɛɛ o wa pɛŋgioo loŋ, mi buɛiyaa nduaa kua nyɛdiaa piondɔɔ chiee.

Chiisu wa ichali loŋ, mi chuaa huŋ mɛŋndaŋ kɔndɔɔ o sooŋ koŋ. Mi Chiisu dimul ndu aa: “Ke ya mɛŋndaŋ mi kol.” Mi chuaa nyuna ndu aa: ‘Le yɛɛnɛ ŋ cho yɛ suɛi o ya lo? Sameeliaŋnɔɔ ya cho ni. Chuuwa suu o Sameeliaŋnda lo le.’ Mi Chiisu dimul chuaa aa: ‘Te num oo sina wana ya cho wo pɛ, a wa ya nyuna le mɛŋndaŋ, nduyɛ mi yaa ke num mɛŋma yɔŋgu yoomoo waŋ.’ Mi chuaa nyuna ndu aa: ‘Yɛɛnɛ ŋ yiyaŋ yɛ? A nɔ pɛŋ nyɛ kuandaa mamɛŋ o ba le.’ Mi Chiisu dimul ndu aa: ‘Wana o wana kol mɛŋma ya ke ndu waŋ pɛ, fɛɛŋ bɛɛ kolɔɔ bii ndu le.’ Mi chuaa dimi aa: ‘Fallo, mɛɛ ke ya mɛŋma maŋ.’

Okoŋ mi Chiisu dimul ndu aa: “Kɔ veelu pɔnɔ num mi la hiŋ nanuŋ.” Mi chuaa dimul ndu aa: “I nɔ pɔnɔ le.” Mi Chiisu dimul ndu aa: ‘Tonya kɛsɛ ŋ dimi ni. Puaa a ŋuɛɛnu ŋ keiyɔ o ba o nɔɔ niŋ ni, nduyɛ o nya cho suŋ suŋndo bɛɛ, o cho pɔnɔ num te.’ Mi chuaa dimi aa: ‘I sina niŋ kɛsɛ maa wana suaa le Mɛlɛka wo ŋ cho ni. Wanaa naa laalaŋ maa o pembei hei choo naŋ nɔ ni miŋ piɛi Mɛlɛka. Kɛ Chuuwa dimi maa Chulusalɛm kinɛi naŋ nɔ ni miŋ piɛi Mɛlɛka. I laalaŋ maa te Mɛsayanɔɔ hiŋ pɛ, o cho naa pɛɛku mɛɛ naŋ nɔ miŋ piɛi Mɛlɛka yɛ.’ Okoŋ, mi Chiisu dimul ndu nyɛ ndoo dimullɔ wana lepilɛ bɛɛ le wo. Mbo dimul ndu aa: ‘Ya cho Mɛsayanɔɔ ni.’

Mi chuaa nyaanuŋ chiee mbo kɔ dimul Sameeliaŋnda aa: ‘I laalaŋ maa I saaluŋ Mɛsayanɔɔ. O sina nyɛ o nyɛ a ya okɔɔ. La huŋ mi la kɔ chɔ ndu!’ Ma tual ndu kɔɔli ma kua o sooŋndo, ma kɔ yaŋ nilaŋ o pɛɛkula Chiisu laŋ.

Mi Sameeliaŋnda dimul Chiisu le mbo wa o nda lo chiee. Le palɛi i ŋiiŋ kpulukuu, Chiisu wa nda pɛɛkoo chiee loŋ, nduyɛ mi wanaa bɔɔbɔɔ duau laalaŋndo o ndu niŋ. Ma dimul chua Sameeliaŋnɔ koŋ aa: ‘Mɛɛ naŋ yaŋ nilaŋ o pɛɛkula poo hoo, miŋ sina kɛsɛ maa ndu cho hunɔɔ chieeŋndo piŋi ni.’