Chiisu Siŋgi Waŋndo o Paale Pɛŋgiaaleŋ Choo

Mi Falisiiya tul Chiisu leyɛ, nduyɛ a wa nɛilaŋ nuuviaa le ma bii ndu. Ma dimi maa Chiisu nɔ mbo siŋgi wanaa wa a naalaŋ nda o Paale Pɛŋgiaaleŋ choo le. Kɛ o Paale Pɛŋgiaale pilɛ choo, mi Chiisu cha po sumɛi pilɛ waŋnda nyɔɔŋ piɛiyo. Mbo dimul buɛiyaa nduaa aa: ‘La tofawɔ mi la che mɛɛ kpaaya Mɛlɛkaa cho poo hoo mala yɛ.’ Okoŋ, mi Chiisu tufu lɔluaŋ lɛŋ, mbo linda puuloo a maŋ, nduyɛ mbo suu puulu koŋ poo o hɔl. Mbo dimul ndu aa: ‘Kɔ pulu hɔlla o mɛŋma tiilaŋndaŋ Sɛlowam.’ Mɛɛ poo hoo kɔ pulu hɔlla, mbo kandu chɔɔ. Nduyɛ teleŋ tasoo wa koŋ ni le mbo che o yoomu ndɔɔ niŋ.

Mi kɔndɔfillo bii waŋnda. Ma nyuna aa: ‘O cho poo hoo le ndoo chal waŋnda nyɔɔŋ piɛiyo o nɛi le? Baa mbo wa velaŋ ndɔɔ ni?’ Mi poo dimul nda aa: ‘Ya cho po koŋ ni, nduyɛ o sumɛiyo nda velu ya ni.’ Mi waŋnda nyuna ndu aa: ‘Mɛɛ le yɛɛnɛ a cho lɛ o sumɛi le?’ Mɛɛ o chɔm nda nyɛ yɔŋnuŋndo, ma kua a ndu sakpo o Falisiiya lo.

Mi poo dimul Falisiiya aa: ‘Chiisu suu ya puuloo o lahɔl ni, mbo dimul la maa ya kɔ pulu hɔlla. Mɛɛ ya pulu hɔlla, mi wa niŋ chɔɔ.’ Mi Falisiiya dimul ndu aa: ‘Te Chiisu siŋgi pɛ waŋndo o Paale Pɛŋgiaaleŋ choo, mɛɛ o cho Mɛlɛka o ba le kpaaya ndɔɔ fula le.’ Kɛ mi apum dimi aa: ‘Te o cho Mɛlɛka o ba le kpaaya ndɔɔ fula le, mɛɛ ndoo tiuba mbo siŋgi wana kposoŋ te.’

Okoŋ, mi Falisiiya veelu wanaa velu poo hoo wa, ma nyuna nda aa: ‘Yɛɛnɛ tosa yɛ mi po nyaa wa niŋ chɔɔ?’ Siooŋnde wa wanaa velu poo hoo wa, kanifuule Falisiiya ndaa dimi maa wana o wana dɔu pɛ laalaŋndo o Chiisu niŋ, a soli wana koŋ o chiɛi Chuuwa piɛi Mɛlɛka wo niŋ. Le hei, ma dimi aa: ‘Naa bɛɛ ŋ sina le. La nyuna ndupila.’ Mi Falisiiya lo poo hoo nyuuniaa haaa mbo dimul nda aa: ‘I chii nya niŋ dimul nyɛ yɔŋnuŋndo. Le yɛɛ nya cho yɛ ya vɛlɛ nyuuniaa?’ Mi Falisiiya duaunuŋ tumbe, okoŋ ma soli ndu o bɛɛ.

Mɛɛ Chiisu saaluŋ poo hoo, mbo nyuna ndu aa: ‘A nɔ pa laalaŋndo o Mɛsayanɔɔ niŋ?’ Mi poo mulul ndu aa: ‘Te I sina pɛ wana o cho wo, I tiuba mi dɔu laalaŋndo o ndu niŋ.’ Mi Chiisu dimul ndu aa: ‘Ya cho Mɛsayanɔɔ ni.’ Baa o cho kɛndɛi le Chiisu tosa hei le? O cho ko siŋgioo le Chiisu siŋgi poo hoo le, kɛ mbo mala ndu vɛlɛ le mbo nɔ laalaŋndo.