Le Yɛɛ Naŋ Nɔ yɛ Yeemɛi o Masale Mɛlɛkaleŋ Niŋ?

Waŋnda o miiliɔŋndaŋ niŋ chieeŋndo balɔɔ silɔ, dɔu tiindaŋ ndaa o Masale Mɛlɛkaleŋ niŋ. A cho tamasi Chiisoo tolɔɔ kɔɔli. Ndu pɛɛku buɛiyaa nduaa le ma piɛi ni aa, “Va niko masaa ŋwaŋnda chiee choo kpou. Tosa a sabu maa waŋnda kpou o chieeŋndo choo a tosa nyɛ ŋ hɛnaŋ ndo.”—Maatiu 6:10.

Mɛɛ waŋnda tau nɔ yeemɛi o Masale Mɛlɛkaleŋ niŋ yɛ, o cho lende le piɛiyii bɔɔbɔɔ nɔ yeemɛi leniŋ te. Wana pɛɛku a bundɔŋ okɔɔ wo diolaŋ H. G. Wells chɔm mɛɛ Chiisu chua leŋ nyɛ sɔvɛ yɛ. Mbo dimi aa, “O tosa mi waŋnda sina . . . a pɛɛku o veelu aa Masaleŋ o Choo Choo niŋndo,” nduyɛ “wana tuu pɛŋ pɛɛku ndɔɔ a pɛɛkula cho o kaŋii bɔɔbɔɔ niŋnde le.”

Seiyaa Chɛhowaa nda cho maa kaŋii keŋ te. Nda che Masale Mɛlɛkaleŋ nyɛ sɔvɛ bɛndu. Ŋ chuaŋ ndɔ tamaseliiyo a yau naa lebol ŋ cho hoo nuaa leniŋ suŋ suŋndo. O cho o sɔɔŋ maŋgalaŋ niŋ 220. A toosiaa yauwo hoo o kɛ kɛ le sɔŋgɔ miiliɔŋndaŋ 46. Hei tosa mi yauwo hoo wa piɔunɔŋndo chieeŋndo balɔɔ silɔ mbo hiau yaula cheleŋ. Yɛɛ cho yɛ suɛi kulii yauwo hoo? Tofa suɛi nduɛi lebolle, Bandu Mɛŋgɛlaa Le Masale Chɛhowaleŋ Yondaa.a

Le yɛɛ Seiyaa Chɛhowaa cho yɛ sɛmbɛ bɛndu waa naa dɔuwɔɔ le Masale Mɛlɛkaleŋ yondaa? Saboo opilɛ cho ni, ŋ laalaŋ maa Masale Mɛlɛkaleŋ le cho suɛi kulle ni le Baabuiyo, yau tɔɔma bɛndoo le chieeŋndo kpou. Le handɔɔ lechoo, ŋ laalaŋ kɛsɛ maa Masale Mɛlɛkaleŋ koni le cho bahawɛila waŋchieeya faŋa ni.

Le waŋnda kɔltaŋ mulioo o Masale Mɛlɛkaleŋ, Seiyaa Chɛhowaa cho kindiŋndo le tamasi Chiisoo tolɔɔ kɔɔli. Lɔɔ o wa o chieeŋndo choo wo, mbo handu Masale Mɛlɛkaleŋ nyɛ tase o yoomu ndɔɔ niŋ, nduyɛ leŋ le wa suɛi nduɛi lebolle ni. (Luku 4:43) Le yɛɛ Chiisu chua yɛ Masaleŋ ndeŋ nyɛ sɔvɛ? Yɛɛ le sim yɛ le num? Ŋ dɛɛniaa num ma tofa mulila Baabuiyo a mɛɛ naŋ cho tɛɛsiaa chɔ o buŋgaŋ cho lachi woŋ niŋ yɛ.