SUƐI LEBOLLE O KƆƆMɛɛ Ŋ | TUƐI WALI NUMNDO YEELA YƐ
Wali Kala Kalaa Tosaa, Baa o Bɛnda lɛ Le?
Mɛɛ Alɛsi heelu kɔfu lusulɛi cheleŋ o mɔmbillo niŋ naa nduaa walla, mbo yoomu fuu. Mbo nyunaŋ aa, ‘Le yɛɛ mi baŋnuŋ o wali nɔ hoo hiouwɔɔ lachi le wo niŋ? Lɔɔ kuɛɛ ya cho yɛ hiouwɔɔ lachioo sɔla? Yoomu nuu ndoo wa niŋ bɔɔ o kɛndɛ te yaa ve wali le!’
Maa Alɛsi, waŋnda tau yeema hau ma tosa wali kala kalaa le. Mi Elɔŋ, wana toosiaa lamɔmbil pilɛ dimi aa, “Wanaa bɔɔbɔɔ yiyaŋ maa a hiou lɔɔ nda tosa wali taaniŋndo wo. Ma yiyaŋ aa, ‘Mbɔ tosaa ko ya cho wallo hoo ni le chumndo mi sɔla wali bɛnda mbo hiau hoo wo.’”
Le yɛɛ a bɔɔbɔɔ yiyaŋ yɛ maa wali kala kalaa cho le nda le? Kɛlɛŋgaa yooŋgula nda tuɛi laŋ la hiŋ nda hɔlla ni, la chɔm maa le yoomu “sɔviɔɔ” sɔlaa, a nɔ ma saŋga le. Mi Maatiu cho wallo o Bɛtɛl Bulukiliŋ ndo, o wɔɔsuu chiɛilaŋ le mi la naŋ nua nyɛkɛndɛi yo dimi aa, “Waŋnda yiyaŋ maa mɛɛ mɛɛ ŋ tosa wali kala kalaa le o diaa sɔlaa, a sɔla hiouwɔɔ lachi le.” Mi Shaŋ cho wallo maa tofa lehɔllo wo bɛɛ dimi aa, “Kposoŋ bɛɛ waŋnda yeema lɛ wali lepalaa tosaa le.”
O baa pilɔɔ choo, wanaa bɔɔbɔɔ sɔla hiouwɔɔ lachioo wa tuɛi wali kala kalaa yeela. Mi Daniɛl nɔ wɔsilaŋ 25 mbo wa wana taŋgulaa wo dimi aa, “I che maa wali kala kalaa nɔ bɔɔ tɔnɔɔ, o bii fau te a nɔ pɛ kpeleŋnda sɔvɛlaŋ o ndu tosaa niŋ.” Mi Andelee nɔ wɔsilaŋ 23 wo bɛɛ dimi aa, “I laalaŋ maa kɔlkɛndɔɔ a yelelaŋndo chiɛɛliaŋ a wallo. Te a nɔ wali bɔɔ le tosa le, nyaale numndo bendu bu le!”
Vɛɛ waŋnda maa Daniɛl a Andelee looku yɛ wali kala kalaa chɔ nyɛ sɔvɛ? Muli tɛtɛlɔɔ cho ni, silala Baabuiyo nda cho tolɔɔ kɔɔli o yoomu ndaa niŋ ni. Baabuiyo dɛɛniaa naa le miŋ tosa wallo kekelee, nduyɛ miŋ biunuŋ o ndu tosaa niŋ. Baabuiyo dimul ko naa le miŋ tosa wallo le. Kɛ o dimul naa mɛɛ naŋ looku miŋ tuei ndu yeela yɛ.
Silala Baabui kuɛɛ mala yɛ num le kɔl hiniaa sɔlaa o wali numndo niŋ? Ŋ yaasiaŋndɔ lapum o buŋgɛi cho lachi ve niŋ.