Baa Wana cho pa Nilaŋ Yaŋɔɔ?

Waŋnda apum yiyaŋ maa teleŋ tɛɛmbaa fuu piɛileŋ le cho ni. Maa wana o wana cho nila yaŋɔɔ le. Apum kindiŋ niŋ le piɛileŋ, kɛ ma yiyaŋ maa a sɔla muli le. Mi wana pilɛ o laalaŋ o Mɛlɛka niŋ te wo kɛɛmiaa nyɛ o tuunuŋ o kɔl a Mɛlɛka wo mbo dimi aa, “Soo o ya lo toolo.” Kɛ mbo dimi maa “bakoo bɛɛ” Mɛlɛka muli le.

Kɛ Baabuiyo ke naa tiindaŋndo maa waŋndo cho o tuɛi piɛileŋ ndo. Mɛlɛka cho yɛ Wana koŋ ni, o nɔ kpaaya bɛndoo nyɛ o nyɛ fee choo wo. Mi Baabuiyo kɛsi konaa hoo a wanaa masindiaa okɔɔ aa, “Te la koŋul niŋ naa Mɛlɛka Yaawɛɛ chua le malaa pɛ, o cho nya tueiyɔɔ mbo tuiinuŋ nya inyiɛɛ. Nduyɛ dimioo nuaa mbo tuei chaŋ nyaa, o cho nya diom muli.” (Aisaya 30:​19) Mi bolle Baabuile cheleŋ le dimi aa, “Kɛ wanaa sakpuaa nda mi Mɛlɛka Yaawɛɛ o hini kɔl a piɛile ndaleŋ.”—Pulɔwaa 15:​8.

Baabuiyo chɔm vɛlɛ tamaseliilaŋ a wanaa Mɛlɛka tuei piɛile ndaleŋ nda. Mi bolle pilɛ le dimi maa mi Chiisu “nyɔɔlu . . . Mɛlɛka . . . o nɔla mbo soli ndu o piɔmndo niŋ ndo” nduyɛ maa “mi Mɛlɛka tuɛi piɛile ndɔleŋ.” (Hibuluiya 5:​7) Ŋ saaluŋ tamaseliila cheleŋndaŋ o Daaniɛɛ 9:​21 a Koloniko Diiŋ Ndɔɔ 7:​1.

Kɛ, le yɛɛ niko mi waŋnda apum yiyaŋ maa piɛile ndaleŋ le sɔla muli le? Le mi piɛile naaleŋ le sɔla mulioo, o Mɛlɛka nɔ Baabuiyo wo lo kinɛi naŋ nɔ ni miŋ piɛi, ndu cho yɛ Chɛhowa ni.a Ŋ nɔ miŋ piɛi o mɛlɛka cheleŋ ɔɔ finyaa naa mamaa vi wa lo le. Mɛlɛka yeema vɛlɛ naa miŋ piɛi “o hɛnaŋ ndɔɔ niŋ.” Koŋ cho ni, nyɛm o handu ba lechoo woŋ. Te ŋ piɛi pɛ o nɛiyo hoo choo, Mɛlɛka ke naa tiindaŋndo maa “nilaŋ o yaŋ naa ni.” (Chɔŋ Tasoo 5:​14) Lelaŋ, le mi piɛile naaleŋ le sɔla mulioo, mɛɛ miŋ sina Mɛlɛka nɔ Baabuiyo wo, nduyɛ miŋ pɛɛku nyɛ cho hɛnaŋ ndɔɔ wo.

Wanaa bɔɔbɔɔ chɛl maa o cho ko suɛi le kaaŋnde le piɛileŋ le cho le, kɛ maa Mɛlɛka yaŋ nilaŋ o piɛileŋ, nduyɛ mbo muli leŋ. Mi Isaki o lɛŋnde Kenyaleŋ niŋ dimi aa, “Mi piɛi le malaa le mi sina Baabuiyo. O viu bɛɛ le mi waŋnda huŋ o ya lo, nduyɛ mbo ke ya mala ya yeema wo.” O lɛŋnde Filipiŋndeŋ niŋ, mi Hilda kindiŋ o nɛi o nɛi niŋ le sikɛɛtiiyo malɔɔ kɛ o nɔla le. Mi pɔnɔ ndɔ kɛɛsiaa maa te o wa yɛ mbo “piɛi o Mɛlɛka lo le malaa”? Mbo tual sila koŋ kɔɔli, mbo dimi aa, “Mi kɔndɔfillo bii ya a mɛɛ Mɛlɛka looku ya mala yɛ. Wanaa che pɛ maa mi yeemɛi sikɛɛtiiyo kandu ya fulaa o kɔl. Nduyɛ mi mal ndu kolɔɔ.”

Baa Mɛlɛka nɔ pa yeemɛi le num malaa a buulaŋnda ŋ nɔ le hɛnaŋ ndɔɔ tosaa wo?