La Dimi Yooŋgu Kɛndɔɔ Ba o Ba Fee

¹ Mi Kilisiɔŋnda o sindɔɔ niŋ dimi yooŋgu kɛndɔɔ ba o ba fee. Ndaa nɔ bɔɔ yoomuaŋ le yooŋgu kɛndɔɔ dimioo. Koŋ tosa ni o wɔsiŋ 30 bɛŋgu chɔŋ a teleŋ Chiisu fula o sɛiyo niŋndo, ma fuuluu a yooŋgu kɛndɛ leMasaa dimioo “o ŋwaŋnda chiee lo kpou o chieeŋndo” choo.—Kol. 1:23.

² Yeemɛi pilɛi keŋ kpe Seiyaa Chɛhowaa hau bɛɛ nɔ ni le ma dimul wana o wana yooŋgu kɛndɛ leMasaa hoo. Yɛɛ mala yɛ naa miŋ komal kpeleŋndo hoo? Wanaa bɔɔbɔɔ cho hau o waltaŋ niŋ nduyɛ, o wa ikala le nda komallo o la nda lo bɛɛ teleŋndaŋ lapum. Te a kue o wallo niŋ te, mɛɛ a kuɛ kelaa o chiee cheleŋ, ɔɔ a kuɛ piinduulaŋ o lɔɔ niŋ, te koŋ te, a kuɛŋnuŋ nyɛ cheleŋ tosaa. Vɛɛ naŋ looku yɛ wanaa nɔ haa yeemɛi le yooŋgu kɛndɛ leMasaa wa komal a yooŋgu kɛndɔɔ?—Mat. 10:11.

³ Wanaa dimiaa yooŋgu kɛndiaa cho kuiyo tau. Nduyɛ, a nɔ sɛmbɔɔ le yooŋgu kɛndɔɔ dimioo fondaŋ o fondaŋ nda saaluŋ waŋnda pɛ. O kandɔŋndo, mi kiisaŋndo wa nda nduyɛ, mi sioonde wa nda lepum kanifuule, a dimiwɔ yooŋgu kɛndɔɔ o fondaŋnda waa naa mɛɛ nda kua chiɛiyo a chiɛiyo yɛ le. Vɛɛ hei mala yɛ niŋ nda?

⁴ Puaapilɛnɔ pilɛ, wana dimiaa yooŋgu kɛndɔɔ nyɛkɛndɛi o cho niŋ paandu ni. Mbo dimi aa, “Hei chɔɔlu ya yoomuaŋ ke le yooŋgu kɛndɔɔ dimioo.” Mi wana cheleŋ bɛɛ dimi aa, “Hei mala ya mi handu yiyaŋ nuu kpou le yooŋgu kɛndɔɔ dimioo.” Mi kɔɔfanɔ yuwɛi pum dimi aa, “Hei chɔɔlu ya kɔlkaloo, yoomuma ŋdiallaŋ, vɛlɛ a hiouwɔɔ lachioo le Mɛlɛka piɛiyo. I nɔ wɔ yoomuaŋ kɛ.” Mi wana dimiaa yooŋgu kɛndɛ pilɛ dimi maa, o cho niŋ wanaa bɔɔbɔɔ yooŋgu kɛndɔɔ dimullo a chiikaŋndɔ lepilɛ bɛɛ a Seiyaa Chɛhowaa le wa. Feleŋguaa bɛɛ lɔɔnuŋ ibuŋ le wali yeelɛiyo hoo tosaa. Mi feleŋgɔnɔ pilɛ suaa fɛɛsɛɛŋ. Mbo dimi aa, “Icho maa suɛi mamaa kanifuule, a nɔ ma soo o waŋnda lo tau.” Mi o cheleŋ dimi aa, “I cho niŋ waŋnda yaulaŋ kioo tau mbo hiau maa paandu.” O tanda waŋnda dimi yooŋgu kɛndɔɔ lɔɔlɔɔ wo muŋ kpou cho yɔŋnɔŋndo ni.

⁵ Yooŋgu Kɛndɔɔ Dimioo o Nɛi, O lɔɔ mɛɛlulaŋ te ŋ kuɛ pɛ yooŋgu kɛndɔɔ dimioo o chiɛila waŋnda, lepum ŋ komal nda le. Apum, makola cheleŋ nda kua tosaa ni. Apum yɛ, o lɔɔ niŋ nda kuaŋnuŋ ni. A kindiŋ niŋ pa le nda yooŋgu kɛndɔɔ dimullo te a wa pɛ kɔlaŋ o nɛi? Te a soo pɛ nyɛkɛndɛi o waŋndo lo, yooŋgu kɛndɔɔ dimioo o nɛi huŋ a fulamakɔɔli kɛndɔɔ tau. O cho kɔlaŋ o nɛi ma simnuŋ naapilɛ a yaulaŋ o ba le. Kɛ a che dɔɔ waŋnda hunɔɔ pɛ, kɔ yil nda ma chiŋa nda baltaŋ. O cho wanaa wa hiouwɔɔ o nɛi kpou wa le ŋ tiuba ma soo o nda lo le. Wanaa waŋnuŋ kɔŋndaŋ bɛɛŋ bɛɛŋ a ve o launiŋ te wa, kindiŋ ma soo o nda lo. A suaa o wanaa cho kɔlaŋ o lɔɔ niŋnda lo, wanaa cho chumndo o mɔmbillo niŋnda, ɔɔ wanaa cho mɔmbillo chumndo wa. Nyɛ tase ŋ tosa wo cho ni, yil ndu fɛŋ yilɔɔ ichaŋyaa ma chum ndu mbo muli. Te o chɛl pɛ le mi la suukaŋ, nyuna ndu nyɛ cho yiyaŋndɔɔ wo a suɛi pilaŋ yeemɛi nduɛi ye mila suukaŋ lechoo.

⁶ Buɛi kelaa choo pilɛ nda laandɔ, mbo dimul wanaa dimiaa yooŋgu kɛndiaa a ŋɔmpum le ma kɔ dimi yooŋgu kɛndɔɔ nda ndaa o nɛi. Yɛɛ wa yɛ fulamakɔɔlioo? Mbo duaunuŋ kona aa, “Nyɔɔ ndoo naŋ bɔɔ idii koŋ. Waŋnda ve o chiɛila ndalaŋ te. Miŋ ke waŋnda yaula “Bandu Mɛŋgɛlaa” a “Tiondoo!” beleŋɔmaa a yaula pɔmbɔlaŋ vɛlɛ tau. Miŋ tosa suukaŋnda waŋnda nɔ yeemɛilaŋ tau. Wana dimiaa yooŋgu kɛndɔɔ pilɔɔ, paale ndɔle taseleŋ le wa leŋ ni le kɔlaŋ yooŋgu kɛndɔɔ dimioo o nɛi. Mbo dimi aa, ‘I chii niŋ wɔsila bɔɔbɔɔ o tonyaa niŋ I sina maa suɛi kɛndɛi pila le wa ya hei hiounɔŋndo le!’ Tuupa mi lɔɔ chuu, yaula “Bandu Mɛŋgɛlaa” a “Tiondoo!” wa la kɛɛsiaa o kundaa niŋndaŋ, ma ke laŋ waŋnda kpou.”

⁷ Mɛɛ buɛi kelaa choo pilɔɔ hoo kuɛ yilɔɔ o kunda cheleŋ niŋ, mbo sina maa idii pilɛ puŋ, mi wanaa dimiaa yooŋgu kɛndiaa bɔɔbɔɔ kua yooŋgu kɛndɔɔ dimioo o nɛi, kɛ a suu o wanaa bɔɔ lo le. Ndepilɛnɔ pilɛ, o wanaa niɔɔŋndo kpe o soo idii koŋ ni. Kanifuule, wana o wana wa o keleŋa bɛndoo niŋ le kɔlaŋ wallo. Mi buɛi kelaa choo wo kɛɛsiaa maa, nda kpou miiŋgu vɛlɛ o nɛi pilɛ koŋ kpe diimandɔɔ. Kɛ a hiu pena le. Ma kua nduyɛ, ma lo loŋ tei a paale kalaleŋ. Ndepilɛnɔ ndoo soo naa wanaa ŋiɔɔŋ cha paale taseleŋndo, mɛɛ o miiŋgu paale leŋ, mbo suaa o waŋnda lo tau. Mbo ke waŋnda yaula “Bandu Mɛŋgɛlaa” a “Tiondoo!” 31, a yaulaŋ 15. Mbo poonyiaa wanaa ŋɔmmɛu diolaŋ a fondala ndalaŋ. Nduyɛ, mbo kandu Baabuiyo pɛɛkoo a wanaa ŋiɔɔŋ. Mi acheleŋnda o kunda koŋ niŋ bɛɛ sɔla fulamakɔɔli kɛndɔɔ.

⁸ Te o yɔŋ pɛ ma saaluŋ wana chɔm yeemɛiyo, kindiŋ ma poonyiaa diola ndɔlaŋ, fondaŋ o cho wo, vɛlɛ a nɔmbɛi (nimbolo) foŋ ndɔɔ. O nɛi taasi niŋ, a dimi naa aa, “I tuei bɔɔ suukaŋ naŋ wa hoo wo yeela.” Ɔɔ a nyuna ndu aa, “Vɛ, a yeema pa miŋ hiou lachi a suukaŋ waa naa lɔɔ cheleŋ? O bɛnda pa miŋ komal num o numndo bɛɛ?” Wanaa bɔɔbɔɔ nda komal o nɛi waa naa niŋnda, ma chɛl le miiŋgula makɔɔlaŋ tosaa o nda lo. Kɛsiŋ o kɔl maa yaula pɔmbɔla naŋ ke waŋnda le ma hiŋ o bɔŋaŋnda naalaŋ nda la wa num o ba tau le ma ke wanaa yeema niŋ le hunɔɔ o bɔŋaŋnda naalaŋ nda.

⁹ Te a soo pɛ o waŋndo lo mbo chɔm yeemɛi kɛ wana koŋ cho ichali o tanda nyaa niŋ te, dimul wanaa cho o tanda kunda koŋ niŋnda ma tofa le wana koŋ. Baa yooŋgu kɛndɔɔ dimioo o nɛi cho nɛi sɔvɛ le mi yooŋgu kɛndɔɔ pɛŋgɛlaŋ o tanda nyaa niŋ? Te o wa lende pɛ, nuawɔ suɛi lebolle hei o Yau Wali Naa leMasaa Suɛɛsɔɔ 1994 ve niŋ. (O puuluei niŋ o cho ni.) “Kɔlaŋ yooŋgu kɛndɔɔ dimioo o nɛi le wanaa nɔ yeemɛiya nuuviaa.” Mɛɛ la kɛɛsiaa le yooŋgu kɛndɔɔ kɔlaŋ dimioo o nɛi a teleŋ o bɛnda o paaleŋ niŋndo, o mala nya mi la soo o waŋnda lo tau wo.

¹⁰ Yooŋgu Kɛndɔɔ Dimioo o Nyɛm Nyaanaŋndoŋ Niŋ, Idii pilɛ, mi kɔɔfaa pum kɛɛsiaa le ma kɔ dimul wanaa wa mɔmbillo chumndo o sukuu bɛndoo ikɛiya yooŋgu kɛndɔɔ. Mi che bɛɛ a wa balta kɛndɛlaŋ dɔuwɔɔ a waŋnda, kɛ mi bahawɛi pum fula. Teleŋ waŋnda wa nilaŋ yaŋɔɔ nyɛkɛndɛiyo, mɔmbillo hiŋ okoŋ, suukaŋndo mɛɛlu. Kɛ mi kɔɔfaa haa soli bahawɛiyo hoo. Mi nda bɛɛ mal paawa mɔmbillo ma luɛi le wanaa cho o mɔmbillo niŋnda yooŋgu kɛndɔɔ dimullo. A lo nda yooŋgu kɛndɔɔ dimullo tei ma hiou chioo okoŋ, ma fuuluu naa nda wa kɔlaŋ nda. Te a fuuluu pɛ, kɔɔfaa haa luɛi vɛlɛ o mɔmbil wa miiŋgoo wo niŋ le wanaa wa o mɔmbillo niŋnda yooŋgu kɛndɔɔ dimullo. Mɛɛ nda tosa hei le teleŋnda siaama kɔlaŋ a hunɔɔ, ma sɔla fulamakɔɔli kɛndɔɔ le sɛmbɛ nda dɔu wo. Ma ke waŋnda yaula “Bandu Mɛŋgɛlaa” a “Tiondoo!” laa hiou 200. Nduyɛ, ma kandu Baabuiyo pɛɛkoo a wanaa ŋɔmpum. Mi wanaa wa o mɔmbillo niŋnda apum chɔm nda fondaŋnda nda cho laŋ nduyɛ, ma ke nda nɔmbɛila (nimbolola) foŋnda ndalaŋ le ma komal nda o la nda lo bɛɛ. O lɔɔ pilɔɔ, mi kɔɔfaa haa miiŋgu naa waŋnda sim le mɔmbillo chumndo wa ma tual vɛlɛ nɛi pilɛ koŋ kpe kɔɔli. Ma ke vɛlɛ waŋnda yaula “Bandu Mɛŋgɛlaa” a “Tiondoo!” 164 nduyɛ, ma kandu Baabuiyo pɛɛkoo a wana pilɛ. Mɔmbillo wa kɔlaŋ mbo sim o fondaŋ pilɛ le mi waŋndo luɛi. Nduyɛ, naa chalaa pilɛ kpe wa niŋ leniŋ ni. Kɔɔfanɔɔ ikɛi naa chalaa haa wa ni. Mi po chal ndu hoo ikɛiyo nua puaapilɛnɔɔ mbo mam muɛɛŋ. Mbo dimi aa, “I sina maa a nɔ “Bandu Mɛŋgɛlaa” le ya.”

¹¹ Mi wanaa dimiaa yooŋgu kɛndiaa bɔɔbɔɔ soo o waŋnda lo te a wa pɛ kɔlaŋ o mɔmbillo niŋ, o teeniiyo niŋ, ɔɔ o dɛndɛ choo niŋ. Vɛɛ ŋ kandu yɛ suukaŋndo a wana chal num ikɛi o mɔmbillo niŋndo? Wana dimiaa yooŋgu kɛndɛ pilɛ wɔsilaŋ 12 o cho ni. Mbo kandu diomndaŋ veeloo o “Tiondoo!” niŋ mɛɛ o wa o mɔmbillo niŋ. Yeemɛi nduɛi wa ni, le mi yeemɛi bii chuaambɔ chal ndu ikɛi o mɔmbillo niŋndo. Nduyɛ mii yɔŋnuŋ. Mi chuaambɔɔ nyuna ndu. Diomnda suu kuɛɛ ŋ cho yɛ laŋ veeloo? Mi poombɔɔ mulul ndu maa, o cho diomndaŋ veeloo o mulilaŋ a bahawɛila cho hau feleŋguaa komallo laŋ okɔɔ. Mbo chɔɔlu ndu dimul maa, o sɔla bɔɔ tɔnɔɔ o buŋgɛi keŋ niŋ nduyɛ, ndu bɛɛ i tiuba mii mala ndu. Mi chuaambɔɔ naŋ kɔl tau mbo bii yaulaŋ ndaŋ. Teleŋ nda wa suukaŋndo wo, mi feleŋguaa cheleŋ a ŋiɔɔŋ tuɛi nda baltaŋ. Mi nda bɛɛ nyuna le yaulaŋ ndaŋ. O hei niŋ, mi wana wa kɔlaŋ a mɔmbillo wo kɔ simi ndu o nɛiyo daŋgala. Okoŋ, mbo nyuna le sabu waŋnda cho yeemɛi chɔmndo o yaulaŋ ndaŋ niŋndo. Mɛɛ o sina, mi ndu bɛɛ bii yaulaŋ ndaŋ. Tonya icho ni maa te feleŋgɔnɔ dimi hoo yooŋgu kɛndɔɔ wo ndoo kue a yaulaŋ ndaŋ o ba tau le, wanaa ndaa chɔm haa yeemɛiya kpou ve laŋ sɔla le.

¹² Yooŋgu Kɛndɔɔ Dimioo naa Waŋnda Chua Nyɛm Nyaanaŋndoŋ Nda, Yooŋgu kɛndɔɔ dimioo vɛlɛ naa waŋnda chua nyɛm nyaanaŋndoŋnda cho bɔɔ nɛi kɛndɛ le waŋnda komallo a yooŋgu kɛndɔɔ. A kindiŋ niŋ pa le yooŋgu kɛndɔɔ dimioo naa waŋnda chua nyɛm nyaanaŋndoŋnda? Lɔɔlɔɔ fee chua teleŋndo ma tofa le wanaa cho kɔɔli kɔɔli wa. Tofa wana cho lau le la kɔ inɛ le wo, a wana cho vɛlɛ chumndo le nyɛ nyaanaŋndo wo. Kindiŋ le baltaŋ kandɔɔ a nda maa chaaŋaa num. Te o yɔŋ pɛ mi baltaŋ la hiou lachi, a kandu niko nda yooŋgu kɛndɔɔ dimullo a Masale Mɛlɛkaleŋ okɔɔ. Te la kuɛ pɛ yooŋgu kɛndɔɔ dimioo o fondaŋ waa naa, kindiŋ ma wa balɔɔ num pilɛ. Kɛ mɛi chaaŋ num te. Nduyɛ, kua a bɔlɔ bɛndu o ba le yɔŋi waŋnda kpou muli num hɔlla kɔɔli o nyɛ ŋ cho wa tosaa wo. Tosa ndi o nɛi taasi niŋ. Te a tosa pɛ teleŋ pɔmbɔ o fondaŋndo o pilɛ, o wa o bɛndaa ma kuɛ vɛlɛ naa cheleŋ. Te a komal pɛ waŋndo mbo yeema num nila yaŋɔɔ le, mɛi ndu loŋ yɛlɛɛŋ a lebɛɛ ma tofa le wana cheleŋ. O hei niŋ, mi puaapilɛnɔ pilɛ ke waŋnda yaula “Bandu Mɛŋgɛlaa” a “Tiondoo!” 90 o paŋgei pilɛ niŋ naa waŋnda chua nyɛm nyaanaŋndoŋnda.

¹³ Waŋnda apum kua naa waŋnda chua nyɛm nyaanaŋndoŋnda le pɛŋgioo. Apum le pisultaŋ. Apum yɛ, kɔlaŋ a chuauwaa ndaa ma chal le teleŋ pɔmbɔ. O cho ma luei sondoo o nyɛm nda cho tosaa woŋ niŋ te. Kɛ tofa teleŋ bɛnda wo ma dimul nda yooŋgu kɛndɔɔ. Puaapilɛnɔ pilɛ, mbo kandu suukaŋndo a wana tosa wallo naa waŋnda chua nyɛm nyaanaŋndoŋnda. Nduyɛ, mbo sina maa finyaa hoo yeema mbo sina a kooma ŋ chua a ve o numpila niŋ te waŋ, vɛlɛ a chila chuauwaa nduaa okɔɔ. Mbo kandu Baabuiyo pɛɛkoo a ndu nduyɛ, o wa ndu kɔlaŋ pɛɛkoo lɔɔlɔɔ naa nduaa walla.

¹⁴ Yooŋgu Kɛndɔɔ Dimioo o fondaŋ leyulaa, Kundalaŋ lapum, tanda nda dimi yooŋgu kɛndɔɔ wo nɔ fondaŋ waŋnda tosa yulaleŋndo. Puaapilɛnɔ chɔm wanaa cho o kundaa niŋ naa nda nɔ le yooŋgu kɛndɔɔ dimioo wa nɔ mbo chɔm fondala yɛyɛla cho o tanda ndaa niŋndaŋ o yau choo okoŋ, mbo chɔm fondaŋ nda waŋnda tosa yulaleŋndaŋ. Yau o toosiaa hoo wo cho chɔm maa te puaapilla kuɛ pɛ o wali pollo niŋ, chiɛila waŋnda lɔl leniŋndaŋ kinɛi nda dimi yooŋgu kɛndɔɔ ni. A pilaŋ naa waŋnda tosa yulaleŋnda le. O tandala cheleŋ niŋ, mi puaapilla dimi yooŋgu kɛndɔɔ o chiɛila waŋnda lɔl leniŋdaŋ a naa waŋnda tosa yulaleŋnda. Bɛnduaa kundaa veelu wanaa dimi yooŋgu kɛndɔɔ nyɛkɛndɛiya le ma wa hunɔɔ a teleŋndaŋ le yooŋgu kɛndɔɔ dimioo o fondaŋ leyulaa yɔŋi nda puɛɛnuŋ a tanda leyulaa.

¹⁵ Te o yɔŋ pɛ ma veelu num le kɔlaŋ yooŋgu kɛndɔɔ dimioo o tanda waa naa nduyɛ a dimi wɔ yooŋgu kɛndɔɔ loŋ lepilɛ bɛɛ le, kandu o chiɛila pɔmbɔla nda tosa yulaleŋndaŋ. Koŋ mala num ma nɔ ‘kɔl simulaa.’ Te a yiyaŋ pɛ maa a tiuba, a kuɛ o la bɛndulaŋ. (2 Tɛs. 2:2) Te a wa kɔlaŋ yooŋgu kɛndɔɔ dimioo naa waŋnda tosa yulaleŋnda pɛ, toosiaŋ mɛɛ ŋ toosiaŋ le kɔlaŋ o bɔŋaŋndo o Toŋgo naa lepiɛiyo niŋ yɛ. Te o bɛnda pɛ, luɛi chiɛiniŋ a boondii wanaa piandaa hiŋndɔ le ve. Te a luɛi pɛ, nyuna le wana cho nda bolleŋndo, ɔɔ wana nɔ yulaleŋndo. A nɔ ma wa wuye wuye. Nduyɛ chua teleŋ bɔɔ le. O cho suɛi ŋ hiu buulaŋ te. Kanifuule, wanaa leyulaa bɔɔbɔɔ yeema wanaa huŋ nyɔŋ piondɔɔ wa le ma soo o nda lo.

¹⁶ Te a komal pɛ wana leyulaa o fondaŋ ndɔɔ ma yil ndu, a dimi naa aa, “Nya wanaa leyulaa nɔ bɔɔ wallo le tosaa. Nyɛ koŋ tosa ni wana komal nya o bɛɛ le. Lelaŋ naŋ hiŋ num hau yilɔɔ o fondaŋ num leyulaa ni. Yauwo hoo nɔ buŋgɛi pilaŋ num niŋ kɔllo ve leniŋ. Ŋ cho num ndu mel ma koma wa diomndaŋ veeloo leniŋ.” Okoŋ, a chɔm suɛi kulle ipilɛ ɔɔ ŋmuuŋ o yau ŋ cho ndu kioo wo niŋ.

¹⁷ Te o yɔŋ pɛ aa wana cho yulaleŋ bolleŋndo ni, kindiŋ ma kandu aa, “Ŋ sina niŋ maa wanaa leyulaa nɔ yeemɛi le ma sina a nyɛm cho yɔŋnɔŋndo woŋ okɔɔ. “Bandu Mɛŋgɛlaa” (ɔɔ “Tiondoo!”) hoo nɔ buŋgɛi pum leniŋ, i piiliaŋ naa a pilɛŋ pilɛŋ kpou.” Tɛɛsiaa buŋgɛi keŋ ma mɛɛlu dimi aa, “Ŋ laalaŋ maa, a cho ndu tueiyɔɔ yeela te a wa pɛ diomndaŋ veeloo leniŋ.”

¹⁸ Te o yɔŋ pɛ aa wanaa nda chua le yulaleŋnda ni, okoŋ ma sina maa fondaŋ cho, a dimi naa aa, “A chɛlla vɛlɛ mi dimul wanaa numaa leyulaa suɛi pilɛi hei kpe le teleŋ biŋgi?” Te o chɛl pɛ, kɛsiŋ o kɔl maa le teleŋ biŋgi koni ŋ cho isɔɔ ni. Nduyɛ, wana nda lebollo yeema num ma lo o lediom. Te wanaa leyulaa yeema pɛ mila chɔɔlu suukaŋ, o bɛnda ma komal nda o la nda lo bɛɛ.

¹⁹ O viuwɔ bɛɛle, mi wanaa dimiaa yooŋgu kɛndiaa o chiee pɔmbɔ pilɛ niŋ kua yooŋgu kɛndɔɔ dimioo nda buɛi kelaa choo wo o fondaŋ leyulaa. Kɛ waŋnda apum wa buulaŋndo kanifuule, ndaa dimi wɔ yooŋgu kɛndɔɔ o fondaŋ waa naa le. Kɛ haupa mi nda bɛɛ simul kɔl mi nyɔɔ kandu nda hɛnaŋndo. O hawɛi (lɛɛlɛ) pilɛ bɛŋgu kpe, ma suaa o ŋwaŋ 37 lo. Nduyɛ, ma yɔŋgu yaula “Bandu Mɛŋgɛlaa” a “Tiondoo!” 24 a yaulaŋ la 4. Mi puaapilɛnɔ pilɛ dimi maa, te o yɔŋ pɛ aa chiɛiyo a chiɛiyo, a nɔla ma soo tau o waŋnda lo o paŋgii pilɛ bɛŋgu mɛɛ nda soo o fondaŋ leyulaa o teleŋ biŋgi koŋ niŋ yɛ le.

²⁰ Ŋ Nuuviaŋ Nɛilaŋ le Yooŋgu Kɛndɔɔ Dimioo, Chiisu ndoo nɔ nɛila yɛyɛla ndoo dimi yooŋgu kɛndɔɔ laŋ. Lelaŋ, mbo pɛŋgɛla yooŋgu kɛndɔɔ teleŋ o teleŋ ndoo saaluŋ pɛ waŋnda. (Mat. 9:9; Luk. 19:1-10; Chɔŋ 4:6-15) Tofawɔ mɛɛ wanaa dimiaa yooŋgu kɛndiaa apum cho nɛilaŋ nuuviaa le yooŋgu kɛndɔɔ dimioo yɛ.

²¹ Wanaa dimiaa yooŋgu kɛndiaa apum chua ndi niŋ maa kaa nda le yooŋgu kɛndɔɔ dimioo naa kalaŋ chuauwa kua chuauwaa ndaa chumndo o sukuuwo ikɛiya. Naapum ma viou nda chumndo le chemchemndaŋ 20. O teleŋ koŋ bɛŋgu nda huŋ a balta Baabuila chua nda yeemɛilaŋ ni le ma suukaŋ a nda.

²² Kɔɔfaa bɔɔbɔɔ sina suɛi pilaŋ waŋnda kɔltaŋ o yaula naalaŋ niŋnde le ma kɔ ke nda. Le tamaseliiyo, mi ndepilɛnɔ pilɛ soliŋ “Tiondoo!” kpeku Yindimiiyo 22, 1995 ve. Suɛi nduɛi lebolle aa, “Bahawɛila cho o sukuulaŋ.” (O puuluei niŋ o cho ni.) O sukuula ŋɔmpumnda cho o tanda kunda ndɔɔ niŋndaŋ o tosa hei ni. Nduyɛ, mbo sɔla fulamakɔɔli kɛndɔɔ. Kunda tosa wallo le yuŋgulaŋ mandaa wo, mbo kua vɛlɛ o nda lo. Yaula soo a yoomula wanaa cho o yuŋgoo niŋnda vɛlɛ a kiɔɔ chuauwa biyɔɔ kɛndɔɔ okɔɔ laŋ o kuɛ ni. Nduyɛ, mi waŋnda tosa kɛɛsiaa a ndu le mbo miiŋgu vɛlɛ a yaula nɔ sɔɔŋ lebol waa lende woŋ. Mbo kua vɛlɛ o kunda cho le wanaa nɔ wali le tosa le wa lo a yau soo hoo a wali lepɛŋndo okɔɔ wo. “Tiondoo!” Fuoo 8, 1996. (O puuluei niŋ o cho ni.) Nduyɛ, mi nyɔɔ hɛnaŋ nda tau.

²³ Mi buɛi ibuŋga pilɛ duaunuŋ kona maa ndu nda laandɔ te a kuɛ pɛ piinduulaŋ, ma dimul waŋnda yooŋgu kɛndɔɔ. Boondii waŋnda ve tau naa leyulaa le wa nda kua ni. Ma sɔla fulamakɔɔli kɛndɔɔ tau.

²⁴ Wou Yoomuaŋ le Yooŋgu Kɛndɔɔ Dimioo ba o ba Fee, Le miŋ lo o yɔŋgɔŋ naa choo le Chɛhowa piɛiyo, ŋ nɔ miŋ landuŋ kɔl le yooŋgu kɛndɔɔ dimioo a Masale Mɛlɛkaleŋ okɔɔ. Le miŋ komal waŋnda a yooŋgu kɛndɔɔ a teleŋ o bɛnda le nda wo, naapila nɔ miŋ yɛlɛma walta naalaŋ miŋ tofa teleŋndo le miŋ mala atiŋ ma sɔla pioŋɔɔ. Naa buɛiyaa Chɛhowaa yɔŋguŋ le hɛnaŋndɔɔ tosaa wa nɔla miŋ dimi mɛɛ kiilanɔɔ Pɔɔl dimi yɛ aa, “Muŋ kpou I cho machuaa muŋ tosaa le Yooŋgu Kɛndɛ Mɛlɛkaa hiviou lachi le hali kpeŋ mi kindiŋ o nɛi o nɛi niŋ, mi chɔm ndu wanaa cheleŋ.”—Kɔl. Tasoo 9:22, 23, NW.

²⁵ “Mi Pɔɔl hiau lachi a ponyiaa. Mbo dimi aa, “Lelaŋ, I cho a kɔl kɛndɛ le mi kelu yoŋgaa a sɔɔŋ chɔm maa I nɔ kpaaya le woŋ le hali kpeŋ mi Kiliti kpaaya ndɔɔ o va ya choo. . . . Kani fuule, boondii ya nɔ kpaaya le ve, boondii keŋ kpaaya Mɛlɛkaa tosa wallo o ya niŋ ni.” (Kɔl. Diiŋ Ndɔɔ 12:9, 10) Hei chɔm ni maa, ŋ tiuba miŋ tosa wali Mɛlɛkaa hoo a kpaaya naapila nɔ wo le. Ŋ nɔ miŋ piɛi o Chɛhowa lo le mbo mala naa a nyina ndɔ diandaa. Te ŋ piɛi o Mɛlɛka lo pɛ le mbo mala naa, ŋ nɔ miŋ nɔ tiindaŋndo maa o cho piɛile naaleŋ muli. Nduyɛ, kaala naŋ nɔ le waŋnda wo nyindu naa miŋ nuuviaa nɛilaŋ le kɔlaŋ yooŋgu kɛndɔɔ dimioo fondaŋ o fondaŋ naŋ saaluŋ nda pɛ. A lɔɔ cho hoo hunɔɔ wo, kindiŋ ma tol kɛɛsiaalaŋ ndaŋ o pilɛ kɔɔli.