Soliŋ Yaula Paandulaŋ Kpeku Nyɛkɛndɛi

Yaula paandulaŋ la wa naa bɛɛ o ba chiɛiniŋ, ɔɔ miŋ lom ndaŋ, ŋ sɔla tɔnɔ leniŋ kposoŋ te. Lelaŋ, ŋ kindiŋ miŋ ke laŋ waŋnda o wali pollo niŋ. Yauwo o pilɛ kpe pilaŋ waŋndo kɔllo mbo nɔ yeemɛi le tonyaa pɛɛkoo, okoŋ mbo kandu diola Chɛhowalaŋ veeloo. (Luom. 10:13, 14) Kɛɛsiaalaŋ lapum la cho laŋ ni le yaula paandulaŋ soliŋndo kpeku nyɛkɛndɛi.

• Te ŋ wa pɛ kɔlaŋ yooŋgu kɛndɔɔ dimioo o tanda naŋ kue lɔɔ lɔɔ le wo, o naŋ tau miŋ kuɛ a yaula paandulaŋ o ba le waŋnda kioo. Naapum te o bɛnda pɛ, a mɛi yauwo o dio waŋndo te a komal ndu le.

• Te ŋ wa pɛ vɛlɛ kɔlaŋ yooŋgu kɛndɔɔ dimioo naa waŋnda chua nyɛm nyaanaŋndoŋ le kɔlaŋ o lɔɔlaŋ niŋnda, ŋ kua vɛlɛ a laŋ o ba le waŋnda kioo. Ŋ kua a suulaŋ yɛ yɛ miŋ chɔm nda okoŋ, mi nda pila hɛli la nda yeema laŋ.

• Te ŋ wa pɛ kɔlaŋ o sukuu, o lapita, o biisioo, a wanayaŋ naŋ yilɔɔ, ŋ kua a yaulaŋ ndaŋ o ba le waŋnda kioo.

• Te a wa pɛ toosiaŋndo le kɔlaŋ o miiŋgula makɔɔ laŋ, kindiŋ ma sina fɛŋ yeemɛi wana ŋ cho kɔlaŋ o ndu lo wo nɔ ve. Baa wana koŋ nɔ pa yuŋgoo? O hɛnaŋ pa a kelaa? Wali yɛɛ o tosa yɛ? Nua o yaula paandulaŋ ndaŋ tɛɛŋ le suɛi lebol piiliaŋ ndu ve ma kɔ ke ndu.

• Wana ŋ komal o wali pollo niŋ mbo chɔm yeemɛiyo kɛ ma wa niŋ kɔlaŋ o ndu lo a komal ndu le, te a komal ndu niŋ pɛ, ke ndu yaula paandula o nɔ le laŋ.