Kindiŋ le Waa o Teleŋndo Lɔɔlɔɔ
1. Vɛɛ Chɛhowa kɛsullɛ naa tamaseliiyo le waa o teleŋndo lɔɔlɔɔ?
1 Chɛhowa cho o teleŋndo lɔɔlɔɔ. Le tamaseliiyo, o ke wanaa cho ndu piɛiyo wa malaa a boondii nda yeema ve. (Hibu. 4:16) Chɛhowa cho vɛlɛ wanaa nduaa nyɛm mala nda le pɛɛkoo a ndu okɔɔ woŋ kioo a teleŋ nda nɔ ma sɔla muŋ ndo. (Mat. 24:45) Hei ke naa tiindaŋndo maa paale ndɔ le kɔltuuleŋ le chieeŋndo hoo tɛɛmbuuwo cho wa o teleŋndo. (Hab. 2:3, NW) Baa hei cho suɛi tɔnɔ le sinaa maa Chɛhowa cho o teleŋndo lɔɔlɔɔ le? (Chon. 70:5, NW) Wanaa la hakiaa naŋ cho ni. Nduyɛ, ŋ nɔ makolaŋ tau le tosaa. Le hei, le waa o teleŋndo lɔɔlɔɔ, o ve suɛi bɛɛŋ bɛɛŋ te. Kɛ le yɛɛ naŋ kindiŋ yɛ le waa o teleŋndo lɔɔlɔɔ?
2. Le yɛɛ waa o teleŋndo lɔɔlɔɔ chuu yɛ Chɛhowa bɛɛleŋ?
2 O palɛi mɛɛlɛi hei niŋ hau, waŋnda chi waa o teleŋndo maa nyɛ sɔwɛ kposoŋ te. Kanifuule, wanaa bɔɔbɔɔ kaala nda pila mbo hiau chaaŋaa ndaa nduyɛ nyɛ huŋ nda o lakɔllo koni nda tosa ni. (Tim. Diiŋ Ndɔɔ 3:1-3) Lelaŋ, naa Kilisiɔŋnda ŋ nɔ miŋ wa o teleŋndo lɔɔlɔɔ o walta naalaŋ niŋ, te ŋ mɛi pɛ le isɔɔ tosa naa waŋndo, vɛlɛ a bɔŋaŋnda naalaŋ. Te waŋnda che pɛ naa hei tosaa, mi Chɛhowa naŋ kɔl tau. (Pitɛ Tasoo 2:12) Ŋ kua pa o walta naalaŋ niŋ a teleŋndo, kɛ o bɔŋaŋnda naalaŋ ŋ kue a teleŋ te? Waa o teleŋndo le bɔŋaŋnda naalaŋ cho ni, ŋ nɔ miŋ wa o Toŋgo naa lepiɛiyo tuupa mi chondei a piɛileŋ kanduŋ. Te ŋ tosa pɛ hei, mɛɛ o chɔm maa ŋ cho Chɛhowa, Mɛlɛka tosa sɔɔŋ sanaa wo tolɔɔ kɔɔli.—Kɔl Diiŋ Ndɔɔ 14:33, 40.
3. Le yɛɛ waa o teleŋndo lɔɔlɔɔ chɔm yɛ maa ŋ cho yiyaŋndo le acheleŋnda?
3 Waa o teleŋndo chɔm vɛlɛ maa ŋ nɔ yiyaŋndo le acheleŋnda. (Fil. 2:3, 4) Le tamaseliiyo, te ŋ wa pɛ o teleŋndo le bɔŋaŋnda naa la leKilisiɔŋndaŋ, a bɔŋaŋ naŋ bii le kɔlaŋ o wali pollo niŋndo, ŋ pala puaapiliaa naa le. O baa pilɔɔ choo, te ŋ chua ndi pɛ maa kaa naa le waa wana mɛɛlaa le hunɔɔ o bɔŋaŋnda naalaŋ, mɛɛ dimullo naŋ cho koŋ chaanda ni maa teleŋ naa cho nyɛ sɔwɛ mbo hiau o ndaa. Waa o teleŋndo tosa mi waŋnda nɔ tiindaŋndo o naa niŋ, ma sina sɛmbɛ naŋ cho dɔuwɔɔ wo, nduyɛ ma che naa wanaa tonya. Suliŋndaŋ ndaŋ wanaa balu naa wa hɛnaŋ ni.
4. Te o yɔŋ pɛ aa lɔɔlɔɔ ŋ ve o teleŋ te, yɛɛ naŋ nɔ yɛ miŋ tosa?
4 Te o yɔŋ pɛ maa a ve o teleŋ lɔɔlɔɔ le, yiyaŋndɔ sabula tosa koŋndo. Yɛɛ mala yɛ num le bahawɛiyo hoo dɔɔniaa? Tosa kɛɛsiaa le ma chii nyɛ ŋ tuu le tosaa wo a teleŋndo. (Iki. 3:1, NW; Fil. 1:10) Nyuna Chɛhowa o piɛileŋ niŋ le mbo mala num. (Chɔŋ Tasoo 5:14) Waa o teleŋndo lɔɔlɔɔ cho nɛiyo o pilɛ le balika melaa chɔmndo le sawala tiɔɔŋnda hiou sawalaŋ kpou laŋ ni. Laŋ la cho ni, Chɛhowa kaalaa vɛlɛ a chaaŋ num wanachioo.—Mat 22:37-39.