Vɛɛ Ŋ Mala yɛ Wanaa Nɔ Bahawɛiyo le Diomndaŋ Veeloo Wa?

1. Simul kuɛɛnɛ cho yɛ le wanaa nɔ bahawɛiyo le diomndaŋ veeloo wa pɛɛkoo?

¹ Wanaa naŋ komal o wali pollo niŋnda, ma nɔ yeemɛi tau le suɛi Mɛlɛkɛi kɛ ma nɔ bahawɛi veelaa la diomndo. Nduyɛ, mi sioonde wa nda le Baabuiyo a yaula cheleŋndaŋ. A ke pɛ wanaa waa ndoo Yɛɛ Kpeekpei Baabuiyo Pɛɛku Yɛ o kandɔŋndo, a sɔla tɔnɔ leniŋ te. Vɛɛ naŋ mala yɛ nda ma pɛɛku a Mɛlɛka okɔɔ? Ŋ nyuuniaa wanaa viou niŋ yooŋgu kɛndɔɔ dimioo wa hiouwɔɔ lɛŋii yɛyɛi 20 ma chɔm nyɛ nda tosa wo. Kɛɛsiaala ndalaŋ la cho laŋ le bɛŋgu ni.

2. Yaula yɛɛ la bɛnda yɛ le wanaa nɔ bahawɛiyo le diomndaŋ veeloo wa malaa?

² Te wana ŋ cho pɛɛkoo wo chaa pɛ tiŋ diomndaŋ veeloo ɔɔ mbo chiee kposoŋ te, a kandu pɛɛkoo a ndu o yaulaŋ ndaŋ niŋ. Yaŋ Mɛlɛka Nilaŋ ɔɔ Yaŋ Mɛlɛka Nilaŋ ma wa Achal Lefafɛɛŋ. Mi kɔɔfanɔ pilɛ lɛŋnde mapuulu chɔm waŋndo yaula tiɔɔŋndaŋ ndaŋ. Okoŋ, mbo nyuna ndu yau o hɛnaŋ le pɛɛkoo wo. Mi lɛuvii Seiyaa Chɛhowaa o lɛŋnde Kenyiaa leŋ niŋ duaunuŋ kona maa yaulaŋ ndaŋ la cho bɔɔ nda malaa. Kanifuule, o lɛŋii wanaa tiŋiaa niŋ, o bundɔŋ dimioo niŋ nda pɛɛku waŋnda ni mbo hiau suukaŋndo nyunalaŋ, a muliaŋ. Wanaa kuɛ o sukuu ma chaa diomndaŋ veeloo nyɛkɛndɛiya, ma chɛl le pɛɛkoo hoo nyunalaŋ a mulilaŋ. Kɛ a chaa tiŋ diomndaŋ veeloo wa, a ve a dialuŋ fulaa le pɛɛku waa naa le. Wanaa dimiaa yooŋgu kɛndiaa bɔɔbɔɔ, te a sina pɛ maa wana nda cho pɛɛkoo wo chaa tiŋ diomndaŋ veeloo, ma yeema pɛɛkoo kandɔɔ a ndu o yaulaŋ ndaŋ niŋ. Yooŋgu Kɛndɛ Chɛŋ O Mɛlɛka Lo Wo!, A Wa Chaaŋ O Mɛlɛka!, ɔɔ Yau Ni Bundɔŋ Baabuiyo.

3. Sinalapɛŋgu kuɛɛ mala yɛ naa le wanaa nɔ bahawɛiyo le diomndaŋ veeloo wa pɛɛkoo nyɛkɛndɛi?

³ Chandɔɔlaŋ, Wanaa chiee diomndaŋ veeloo le wa, ma nɔ siɔmbulaŋ le pɛɛkoo. Nduyɛ, mi a bɔɔbɔɔ cheŋnuŋ ndapila chɔdɔ. Chɔmndo nda maa a cho wanaa sɔvɛ cho nɛi tase naŋ kandu nda tonyaa pɛɛkoo wo ni. Wanaa bɔɔbɔɔ a chiee diomndaŋ veeloo le wa cho wanaa lebɛɛ nduyɛ, a tiuba ma pɛɛku. Ke nda bɛɛle nda nɔ ma sɔla leŋ nduyɛ, chua nda maa wanaa sɔvɛ nda cho ni. (Pitɛ Tasoo 3:15) A cho chɛlɔɔ ma hiou lachi a pɛɛkoo te a sina pɛ maa sɛmbɛ nda cho dɔuwɔɔ wo cho nyɛ fuule. Nduyɛ, a cho hiouwɔɔ lachioo tosa o Mɛlɛka piɛiyo niŋ. Lelaŋ, a nɔ ma wa nda chandɔɔlaŋ nyɛkɛndɛi.

4. Vɛɛ naŋ dɛɛniaa yɛ wanaa nɔ bahawɛiyo le diomndaŋ veeloo wa ma bɛɛndiaa pɔɔ fondaŋ naŋ cho pɛɛku lɔɔ cheleŋndo?

⁴ Mi wana ŋ cho pɛɛkoo wo chiee bɛɛ diomndaŋ veeloo nyɛkɛndɛi le, dɛɛniaa ndu mbo bɛɛndiaa pɔɔ naa nya nɔ le pɛɛkoo wa. Wanaa dimiaa yooŋgu kɛndiaa apum Saut Afilika, ma dimul wanaa nda cho pɛɛkoo wa le ma dimul yuŋgula ndalaŋ, a chaaŋaa ndaa chaa diomndaŋ veeloo nyɛkɛndɛiya le ma mala nda. Wana dimiaa yooŋgu kɛndɛ pilɛ Bilitiŋ, le wanaa nduaa pɛɛkaa dɛɛniaa, mbo ke nda yau ndɔ ndupilaa le ma nua o pɛlta nda wa pɛɛkoo laŋ choo teleŋ nda wa pɛɛkoo tosaa wo. O tosa hei le nda malaa ma che maa te a kei pɛ pulaleŋ o mulilaŋ bɛŋgu, o wa tɛtɛlɛ le laŋ saalɔŋndo. Mi puaapilɛnɔ pilɛ o lɛŋnde Indiaaleŋ niŋ dɛɛniaa wana ndɔ pɛɛkaa le mbo tofa fotueila cho o buŋgɛi nda nɔ le pɛɛkoo o lɔɔ kɔɔli ve, mbo wa pɔɔ yiyaŋndo o laŋ choo.

5. Vɛɛ naŋ chɔm yɛ kɔl biuwaŋndo te ŋ wa pɛ waŋndo pɛɛkoo?

⁵ Nɔ Kɔl Biuwaŋndo, Yau suu o suu ŋ wa pɛ soliŋndo kpeku le tonya cho o Baabuiyo niŋndo waŋndo pɛɛkoo, mala ndu mbo sina sɔɔŋ kulloŋ nyɛkɛndɛi. O kandɔŋndo, chua teleŋ bɔɔ le suukaŋndo a ndu le. Chemchemndaŋ 10 tei 15 bɛnda bɔɔ. Kindiŋ le buŋgɛi nya cho pɛɛkoo ve chiiyo le. Naapum, nyɛɛmbɔ koni nya tosa pɛlta cho o buŋgɛi keŋ niŋndaŋ ni. Nɔ kɔl biuwaŋndo te o ve diomndaŋ veelu chɔ chɔ le. Hei cho ndu yoomuaŋ ke le hiouwɔɔ lachioo tosaa o diomndaŋ veeloo niŋ nduyɛ, mbo chɔm balika melaa le Chɛhowa. Le wana ŋ cho pɛɛkoo wo malaa mbo tosa hei, dimul ndu mbo wa kɔlaŋ o bɔŋaŋnda naalaŋ teleŋ nya cho kandɔɔ pɛɛkoo wo.

6. Vɛɛ naŋ mala yɛ waŋndo mbo chaa diomndaŋ veeloo?

⁶ Te wanaa cho Baabuiyo pɛɛkoo wa chaa pɛ diomndaŋ veeloo, ma tosa hiouwɔɔ lachioo chɔ chɔ o Mɛlɛka piɛiyo niŋ. (Chon. 1:1-3, NW) Yauwo hoo wanaa bɔɔbɔɔ soliŋ kpeku ni le wanaa ndaa pɛɛkaa malaa. Ndu cho ni, Wou Sɛmbɔɔ le Diomndaŋ Veeloo a Poonyiaa. Le teleŋ biŋgi nda tosa hei ni lɔɔlɔɔ nda chii pɛɛku Baabuiyo pɛ. Te wana ŋ cho pɛɛkoo wo tambu pɛ kɔl, saŋgala ndu maa o tiuba mbo tosa. A chɔm ndu sɔɔŋ o tiuba mbo pɛɛku paandu woŋ nduyɛ a mɛɛ o tiuba mbo pɛɛku muŋ yɛ. Dɛɛniaa ndu maa Chɛhowa cho ndu dɔuwɔɔ sala le sɛmbɛ o cho tosaa wo. Nduyɛ, dɛɛniaa ndu vɛlɛ mbo nyuna Chɛhowa le malaa o piɛileŋ niŋ. (Tal. 16:3, NW; Chɔŋ Tasoo 5:14, 15) Wanaa dimiaa yooŋgu kɛndiaa apum Bilitiŋ, ma dimul wanaa ndaa pɛɛkaa le ma kɛsiŋ kpeleŋnda pɔmbɔla mala nda le ma tosa hiouwɔɔ lachioo wo. Naapum, dimullo nda le ma sina chomultaŋ. A tofa bolii Baabui hɛliŋ le diomndaŋ veeloo ve. O mɛɛlulaŋ, ma dimul nda le diomndaŋ veeloo o yaula Baabuila cho tɛtɛlɛ le diomndaŋ veeloo wo. Le malaa waŋnda ma chaa diomndaŋ veeloo, dɛɛniaa yeemaŋ ni ma pɛɛku nda mɛɛ wana tosa yɛ. O cho ko chɔmndo nda mɛɛ wana tosa yɛ le.

7. Le yɛɛ ŋ nɔ miŋ kɛɛ wanaa nɔ bahawɛiyo le diomndaŋ veeloo wa yooŋgu kɛndɔɔ dimul te?

⁷ Wanaa sina yau bɔɔ le wa, Chɛhowa chue nda wanaa fondo fuu le. (Cho. 34:19, NW) Nyɛ cho waŋndo o kɔllo Chɛhowa cho tofaa ni. (1 Kol. 28:9, NW) Lelaŋ, kɛɛ wanaa nɔ haa bahawɛiyo le diomndaŋ veeloo wa yooŋgu kɛndɔɔ dimul te. Nyɛm waliŋ kɛndɔŋ cho num o ba tau le kandɔɔ a muŋ. Te la kandu pɛ a yaula cho tɛtɛlɛlaŋ, la hiou niko o Yɛɛ Kpeekpei Baabuiyo Pɛɛku Yɛ niŋ. Nduyɛ, o cho ndu mala tau mbo sina a nyɛ Baabuiyo dimi wo okɔɔ.