Le Pɛɛkula Baabuilaŋ Tosaa Nyɛkɛndɛi
1. Kalaŋ suu kuɛɛ wanaa dimiaa yooŋgu kɛndiaa tosa pɛɛkula Baabuilaŋ nda nɔ yɛ?
1 Wana o wana nɔla mbo piɛi Mɛlɛka le mɛɛ mi Chɛhowa tosa “a sabu” malaŋ o piɛi ndu. (Chɔŋ 6:44) O wa bɛɛ lende, wanaa dimiaa yooŋgu kɛndiaa tosa pɛɛkula Baabuilaŋ nda nɔ ma kindiŋ kpeŋgii ndɛi le waŋnda malaa ma sɔɔŋguu Finya nda cho o choo choo niŋndo ikɛi kpɛɛluŋ. (Chemisi 4:8) Le hei tosaa, mɛɛ miŋ bɛɛndiaŋ nyɛkɛndɛi. Diomndaŋ koni veeloo o pɛllo niŋ miŋ nyuna nyunala cho la pooniyaa laŋ o cho le tuu le wana naŋ cho pɛɛkoo wo malaa mbo tosa hiouwɔɔ lachioo le.
2. Te a tosa pɛ pɛɛku Baabuiyo nyɛkɛndɛi, yɛɛ wa yɛ fulamakɔɔlioo?
2 Le pɛɛkula Baabuilaŋ tosaa nyɛkɛndɛi, wanaa dimiaa yooŋgu kɛndiaa nɔ ma mala wanaa nda cho pɛɛkoo wa ma (1) bii nyɛ Baabuiyo pɛɛku wo bila, (2) chɛl nyɛ Baabuiyo pɛɛku wo, nduyɛ (3) ma dɔu nyɛ nda cho pɛɛkoo wo o wali niŋ (Chɔŋ 3:16; 17:3; Chemisi 2:26) O chua paŋguŋ bɔɔbɔɔ le wana ŋ cho pɛɛkoo wo malaa mbo sina a sɔɔŋ muŋ okɔɔ. Kɛ hiouwɔɔ lachi kɛ kɛ o tosa pɛ, o sim le chaŋyɛi nduɛi kindioo nda Chɛhowa nduyɛ mbo yɔŋguŋ o ndu lo.
3. Le yɛɛ wanaa chaa pɛɛkoo nyɛkɛndɛiya soliŋ yɛ nyunala waŋndo yiyaŋ ndaŋ kpeku?
3 Yɛɛ cho yɛ Yiyaŋ Wana ŋ cho Baabuiyo Pɛɛkoo Wo?, Le sinaa te wana ŋ cho Baabuiyo pɛɛkoo wo bii pɛ nyɛ ŋ cho ndu pɛɛkoo wo bila nduyɛ mbo chɛl ndu, wa suɛi numpilɛ suee le, kɛ dɛɛniaa ndu mi ndu bɛɛ soo. (Chemisi 1:19) Baa o bii pa nyɛ Baabuiyo dimi a suɛi naŋ cho yaasiaa ve bila? O nɔla pa mbo tɛɛsiaa nyɛ o pɛɛku wo a mɛɛ o bii ndu bila yɛ? Vɛɛ o yiyaŋ yɛ a nyɛ o pɛɛku wo okɔɔ? Baa o laalaŋ pa maa nyɛ Baabuiyo pɛɛku wo cho nyɛ sɔvɛ? (Tɛs. Tasoo 2:13) Baa o bii pa bila maa nyɛ o cho pɛɛkoo wo mala ndu mbo tosa siŋgaŋndaŋ o yoomu ndɔɔ niŋ? (Kol 3:10) Le mulila nyunalaŋ ndaŋ sɔlaa, mɛɛ miŋ chaa nyunala waŋndo yiyaŋ ndaŋ nyuna nduyɛ miŋ yaŋ ndu nilaŋ. (Mat. 16:13-16)
4. Te o wa pɛ i kala le mi wana naŋ cho Baabuiyo pɛɛkoo wo bii nyɛ naŋ cho ndu pɛɛkoo wo bila le ɔɔ mbo ve ndu dɔwɔɔ o wali niŋ te, yɛɛnɛ naŋ tosa yɛ?
4 Kaalaŋ a yiyaŋnda cho waŋndo niŋndaŋ chua teleŋndo tau le laŋ malɔɔ. (Kɔl. Diiŋ Ndɔɔ 10:5) Te o wa yɛ mi wana naŋ cho Baabuiyo pɛɛkoo wo chɛl nyɛ naŋ cho ndu pɛɛkoo wo le ɔɔ mbo dou ndu o wali niŋ te? O hei niŋ, biuwɔŋndo yeemaŋ ni ma ke ndu teleŋndo tau le mi Diom Mɛlɛkaa a nyina diandaa tosa ndu wallo o kɔl. (Kɔl. Tasoo 13:6, 7; Hibu. 4:12) Te a che pɛ maa o cho nyɛ nya cho pɛɛkoo wo bila biyɔɔ le ɔɔ mbo ve ndu dɔwɔɔ o wali niŋ te, baŋ ndu le. Kɛ o bɛnda mi la mallɔ suɛi keŋ mi la hiou o suɛi cheleŋ. Te a biuŋ pɛ ndu pɛɛkoo nduyɛ ma lambaŋ ndu kaala kpeekpei Baabuiyo soo wo chɔmndo, naapum o cho siŋgaŋndaŋ tosa o chilaŋ niŋ.