A cho Pa Sɛmbɛ Chɛhowa a Chiisu Wo Tolɔɔ Kɔɔli a Boondii Loonuŋyaa Hei?

1. Yɛɛ Seiyaa Chɛhowaa kindiŋ yɛ le tosaa boondii loonuŋyaa?

¹ Chɛhowa tosa nyɛ o dimi le tosaa wo a sɛmbɔɔ. Mɛɛ Aiasaiya wa suɛi a salala Mɛlɛkalaŋ lapum okɔɔ, mbo dimi o Aisaiya 9:7 niŋ aa, “Chɛhowa, Mɛlɛka nɔ kpaayaa kpou wo cho ndi tosa ni.” Sɛmbɛ pilɛ koŋ kpe Chiisu ndoo nɔ le piɛile tonyaleŋ teleŋ o wa o lɛŋndeŋ choo wo ni. (Chɔŋ 2:13-17; 4:34) A boondii loonuŋyaa wɔsi o wɔsi, mi wanaa dimiaa yooŋgu kɛndiaa o miiliɔŋndaŋ niŋ chieeŋndo balɔɔ silɔ kindiŋ kpoke le tolɔɔ sɛmbɛ Chɛhowa a Chiisu wo kɔɔli le ma yɔŋguŋ tau o wali pollo niŋ. A wa niŋ pa waŋnda haa tɛɛŋ?

2. Yɛɛ sɛmbɛ naŋ nɔ niŋndo nyindu yɛ niŋ naa le tosaa te Fuoo 7 kanduŋ pɛ?

² Waŋnda Veeloo le Loonuŋyaa, Ŋ cho waŋnda kandɔɔ veeloo naŋndee le hunɔɔ o loonuŋyaa o paale Ndaamaleŋ choo, a Fuoo 7. Tosa kɛɛsiaa suŋsuŋ le yɔŋgɔŋndo tau o wali pollo niŋ. Puaapiliaa wa niŋ a nyaale le kindiŋ nda wa niŋ le yɔŋgɔŋndo tau le yooŋgu kɛndɔɔ dimioo o tanda ndaa niŋndo. Kindiŋ o nɛi o nɛi niŋ ma ke wanaa ŋ cho Baabuiyo pɛɛkoo wa, miiŋgula makɔɔla numndaŋ, chaaŋaa numaa baalaa, wanayaŋ numndoŋ, a chaaŋaa numaa sukuuwa yau veelaa ɔɔ soliŋ jw.org kpeku ma chɔmnda a bɔŋaŋndo hoo okɔɔ.

3. Vɛɛ naŋ yɔŋguŋ yɛ tau o wali pollo niŋ boondii Fuoo a Nyaakuɛiyo?

³ Kɔɔfale Malalaŋndeŋ, Sɛmbɛ naŋ nɔ wo cho naa vɛlɛ mala miŋ chɔɔlu hiouwɔɔ lachioo tosa o wali pollo niŋ. Ŋ laalaŋ maa wanaa bɔɔbɔɔ cho kɔɔfale malalaŋndeŋ tosa o Fuoo niŋ a Nyaakuɛiyo kanifuule, te ŋ yeema pɛ, ŋ tosa hawɛilaŋ (lɛɛlɛlaŋ) 30. Te la wa pɛɛku nya leyuŋgoo ɔɔ pɛɛkɔŋ ipilayaa tosaa pɛ a teleŋ cheleŋ, wana o wana yiyaŋ o ndi choo mbo piɛi o Chɛhowa lo mɛɛ o tiuba le hei tosaa yɛ. (Tal. 15:22, NW) Sɛmbɛ ŋ cho chɔm le waŋnda veeloo ma hiŋ o loonuŋyaa hoo wo dɛɛniaa niŋ acheleŋnda kɔltaŋ mi nda bɛɛ dɔu sɛmbɔɔ le walta kɛndɛlaŋ tosaa. Te walta numndaŋ ŋ yɛlɛmiaa ni le halikpeŋ ma sɔla teleŋndo le yɔŋgɔŋndo tau o wali pollo niŋ, mɛɛ sɛmbɛ Chiisoo ŋ cho koŋ tolɔɔ kɔɔli ni.—Maki 6:31-34.

4. Tɔnɔla yɛɛ naŋ sɔla yɛ te ŋ tol pɛ sɛmbɛ Chɛhowa a Chiisu wo kɔɔli?

⁴ Te ŋ tol pɛ sɛmbɛ Chɛhowa a Chiisu wo kɔɔli a boondii loonuŋyaa hei, ŋ cho fulamakɔɔlila kɛndɛlaŋ sɔla. Wanaa bɔɔbɔɔ o tanda naa niŋ tuɛi niŋ yooŋgu kɛndɔɔ. Nduyɛ, ŋ cho nyaale kpeekpei cho o Chɛhowa piɛiyo niŋndo vɛlɛ a wanaa cheleŋnda malaa wo tueiyɔɔ yeela. (Walta Wanaa Chiisuaa 20:35) O hiou kpou wo cho ni, ŋ cho Mɛlɛka naa nɔ sɛmbɔɔ wo nda Chiisu Po ndɔ kɔl nɛŋi.