Ŋ WAŊNUŊ MAA ŊKILISIƆŊ
Mɛɛ Ŋ Looku Simnɔŋ Wana Pɛɛkaa Baabui Kɛndɛ Yɛ
A yeema pa ma chɔm tiindaŋndo o tɔɔndaŋndo bɛŋgu maa Daaniɛɛ? Mi Daaniɛɛ pɛɛku Diom Mɛlɛka nyɛkɛndɛi, kɔ bii a sɔɔŋ yiŋgoloŋ Baabuiyo dimi woŋ. (Daa 9:2) Baabuiyo pɛɛkoo yiŋgoloŋ nɔla mbo mala num ma lo o tiindaŋ numndo choo. Vɛɛ keŋ tosaŋ yɛ? O chɔɔlu tiindaŋ numndo kindi maa mɛila Chɛhowalaŋ la cho peelɔŋ. (Chɔ 23:14) O mala num vɛlɛ mi kaala ŋ nɔ le Mɛlɛka wo hiou lachi, nduyɛ mbo nyindu num le o kɛndɔɔ tosaa. (Sam 97:10) Kɛ kuɛɛ ŋ nɔ yɛ ma kandu? Tofawɔ kɛɛsiaalaŋ ndaŋ.
Yɛɛ ya nɔ yɛ mi pɛɛku? Kaa pɛɛkaa kɛndɔɔ opilɛ cho bɛɛndiaŋndo le bɔŋaŋnda naalaŋ ni. A sɔla tɔnɔɔ tau o bolii Baabui naŋ nɔ le diomndaŋ veeloo o lɔɔ bɛŋgu wo, te a tosa pɛ yaasiaa nyɛkɛndɛi o nyɛ ŋ bii bila le wo choo. Le handɔɔ lechoo, apum hɛli le chɔɔloo pɛɛkoo a sɔɔŋ Baabuiyo dimi woŋ okɔɔ, kaala yɛ yɛla nyina Mɛlɛkaa mala naa miŋ nɔ laŋ, fondaŋnda yɛ yɛla kiilanɔɔ Pɔɔ kelalaŋ, ɔɔ a nyɛm Mɛlɛka toosiaa woŋ okɔɔ. Te a yiyaŋ pɛ a nyuna Baabuiyo okɔɔ o paaleŋ niŋ, poonyiaa ndu nduyɛ ma kɛɛsiaa le yaasiaa tosaa a ndu okɔɔ o paale numnde pɛɛkaa leŋ choo.
Kuɛɛ ya saaluŋ yɛ yooŋgulaŋ? Le kɛɛsiaalaŋ lapum, tofa vidueiyo hoo, Nyɛm Naŋ Tosa Yaasiaa le Nyɛm Tɔɔmaŋ Mɛlɛkaŋ Saalɔŋndo Wo. Le sinapɛŋgu numndo tofaa, yaasiaa le ma sina nyɛ kpaayala chieeŋndo simndo, la nda tuu a visiaa o Daaniɛɛ bolle 7 niŋndo.
Vɛɛ kpɛ ya nɔ yɛ mi chua teleŋndo le pɛɛkoo? Pɛɛkoo lɔɔlɔɔ cho nyɛ kpeekpei mala naa o Mɛlɛka piɛiyo niŋndo ni. A kandu pɛɛkoo le teleŋ biŋgi, nduyɛ ma chɔɔlu teleŋ pɛɛkaa a mɛɛ yeemɛi wa yɛ. Diom Mɛlɛkaa pɛɛkoo cho ko mɛɛ wana nuuviaa naa nyɛm baa kalaŋ yɛ. Mɛɛ ŋ saaluŋ nyɛm baa kalaŋ fau yɛ, lende koni ŋ chɔɔ yeemɛi sɔla le nuuviaa ni! (Pulɔ 2:3-6) Yeemɛi numnde le Diom Mɛlɛkaa cho chɔɔlɔŋ nduyɛ mi Baabuiyo pɛɛkoo lɔɔlɔɔ simnuŋ kaa num o yoomu numndo niŋ.—1Pitɛ 2:2.
YƐƐ VISIAA O DAANIƐƐ BOLLE 7 NIŊ SIM YƐ LEWUNDU?
NYUNA CHELEŊ:
Vɛɛ Daaniɛɛ 7:8, 24 sɔla yɛ peelɔŋndo?
NYƐ CHELEŊ Ŋ TOSA YAASIAA CHOO WO:
Yɛɛ visiaa cho o Sɔɔŋ Chɔɔmaŋndoŋ bolle 13 niŋndo sim yɛ lewundu?