A Nɔ Pa Yeemɛi le Ma Peelu Yauwo le Kɔlaŋ o Sukuuwo le Wanaa Dimi Yooŋgu Kɛndɛ leMasaa Wa?

Baa a cho wɔsilaŋ 23 a 65 tɛɛŋ ma wa o wali lɔɔlɔɔ wo niŋ? A nɔ pa kɛndiaa kɛndɔɔ, nduyɛ a nɔla pa ma kuɛ naa yeemɛi cho tau wa? Te o yɔŋ pɛ ma muli nyunalaŋ aa ei, baa a yiyaŋ niŋ pa le yauwo peeloo le ma kuɛ o Sukuu Wanaa Dimi Yooŋgu Kɛndɛ leMasaa Wa? Chɔŋ a toŋgo tase nda kandu ndu wo, puaapiliaa a ndepiliaa yembuaa, vɛlɛ a wanaa cho o nɔlaŋ nda peelu niŋ yaulaŋ tau le kɔlaŋ o sukuuwo hoo. Kɛ puaapiliaa yembuaa naŋ yeema tau ni ma peelu yauwo hoo. Lelaŋ, piɛi o Chɛhowa lo le ma chɔɔlu yeemɛi nɔ le ndu kɔllo nɛŋioo a le taamasi Po ndɔɔ tolɔɔ kɔɔli. (Sam 40:​8; Mat 20:​28; Hibu 10:​7) Okoŋ, ma nuuviaa nɛilaŋ le walta numndaŋ a bahawɛila numndaŋ dɔɔniaa le ma suliŋ le kɔlaŋ o sukuuwo hoo.

Walta yɛɛ wanaa sɔla pɛɛkoo o sukuuwo hoo wa sɔla yɛ fondaa le tosaa o Mɛlɛka piɛiyo niŋ? Ma yɔŋ apum o fondaŋnda nda dimi sɔɔŋ maŋgalaŋ cheleŋndoŋ nda, ɔɔ ma kuɛ yooŋgu kɛndɛ teŋgeŋndo dimioo o fondaŋnda waŋnda hiau tau laŋ. Apum yɛ ma yɔŋ nda buɛile ibuŋgaleŋ tosaa, misiɔnalueileŋ, ɔɔ buɛi ibuŋga malalaŋndeŋ. Te a wa pɛ yiyaŋndo a walta num bɛɛ nɔla ma tosa o wali Chɛhowaa niŋ ndaŋ okɔɔ, a nɔ ma dimi diomnda Aisaya wana ndoo suaa le Mɛlɛka wo dimi laŋ. Mbo dimi aa: “A che ya. Viom ya.”​—Ai 6:​8.

TOFA VIDUEIYO HOO MISIƆNALUEIYA—WANAA WALLA O CHIƐI NIŊ, OKOŊ MI LA MULI NYUNALAŊ NDAŊ:

• 

  Vɛɛ nda hɛli yɛ misiɔnalueiya?

• 

  Wali kɛndɛ yɛɛ misiɔnalueiya cho yɛ tosaa?

• 

  Ɔɔ tɔnɔlaŋ lapum la misiɔnalueiya sɔla o wali ndaa tosaa niŋ ndaŋ?