Soliŋ Yau Tuei Yoomoo Yeela Lefafɛɛŋ! Kpeku le Wanaa Ŋ Cho Baabuiyo Pɛɛkoo Wa Malaa Ma Kindi Laalaŋ Ndaa o Chɛhowa a Chiisu Niŋ

Le mi wanaa naŋ cho Baabuiyo pɛɛkoo wa nɛŋi Mɛlɛka kɔl, mɛɛ ma kindi laalaŋ ndaa o ndu niŋ. (Hib 11:6) Ŋ mala nda ma tosa hei te ŋ soliŋ pɛ yauwo hoo kpeku, Tuei Yoomoo Yeela Lefafɛɛŋ! A soliŋ bolii Baabui sɔvɛi leniŋ, ma tɛɛsiaa ndi nyɛkɛndɛi, ma soliŋ nyunala sɔvɛlaŋ kpeku. Nduyɛ yauwo hoo nɔ vɛlɛ fotueila sɔvɛlaŋ a vidueilaŋ leniŋ. Ŋ nɔ miŋ mala wanaa naŋ cho Baabuiyo pɛɛkoo wa le ma nɔ suliŋnda leKilisiɔŋndaŋ, a chaŋyɛi kpɛɛluŋnde a Mɛlɛka. Te ŋ tosa lende pɛ, mɛɛ taŋgullo naŋ cho koŋ ni a nyɛm yiŋndeŋ le nɔla tɛɛmbuu le woŋ.—1Kɔ 3:12-15.

Mi wanaa bɔɔbɔɔ che ndi ikala le waa chaaŋ o Mɛlɛka le mɛɛ nda cho ndu chɔ le yɛ. Lelaŋ ŋ nɔ miŋ mala nda ma sina Chɛhowa, nduyɛ ma nɔ laalaŋndo o ndu niŋ.

LA TOFA VIDUEIYO HOO, SOLIŊ YAUWO HOO KPEKU “TUEI YOOMOO YEELA LEFAFƐƐŊ!” LE TIINDAŊ NUMNDO KINDIOO O CHƐHOWA NIŊ OKOŊ MI LA MULI NYUNALAŊ NDAŊ:

• Vɛɛ naŋ looku yɛ sina maa mi ndepilɛnɔɔ hoo bɛɛndiaŋ nyɛkɛndɛi le pɛɛkoo?

• Vɛɛ ndepilɛnɔɔ hoo soliŋ yɛ nyunala sɔvɛlaŋ kpeku, le wana ndɔ pɛɛkaa malaa mbo chɔm yiyaŋ ndɔɔ a bolle Baabuile nda veelu diomndaŋ ndeŋ okɔɔ?

• Vɛɛnɛ vidueiyo a bolle Baabuileŋ le pilaŋ yɛ wana ndɔ pɛɛkaa kɔllo?

Wanaa bɔɔbɔɔ biiyɔ sala baŋaa bila le. Ɔɔ a chi ndu maa ke sɔvɛ fula Mɛlɛka o ba wo le o cho le. (Kal 2:20) Lelaŋ ŋ nɔ miŋ mala nda ma kindi laalaŋ ndaa o sala baŋa Chiisu wo niŋ.

LA TOFA VIDUEIYO HOO, SOLIŊ YAUWO HOO KPEKU “TUEI YOOMOO YEELA LEFAFƐƐŊ!” LE TIINDAŊ NUMNDO KINDIOO O CHIISU NIŊ OKOŊ MI LA MULI NYUNALAŊ NDAŊ:

• Vɛɛ naŋ looku yɛ sina maa mi puaapilɛnɔɔ hoo bɛɛndiaŋ nyɛkɛndɛi le pɛɛkoo?

• Vɛɛ o soliŋ yɛ fondaa hoo, “Chɔɔlu Sɔɔŋ Pum Tofa” kpeku le wana ndɔ pɛɛkaa malaa?

• Le yɛɛ piɛileŋ le wana naŋ cho Baabuiyo pɛɛkoo wo cho yɛ suɛi sɔvɛ?