Le yɛɛ Nya Kua Yɛ o Wanaa Nɔ Niŋ Kaaŋnde Wa Lo?

Ŋ saaluŋ maa wanaa bɔɔ bɔɔ, a nɔ niŋ kaaŋnde wa hɛnaŋ tau le suukaŋndo naa ndaa o nyɛ Baabuiyo dimi wo choo. O dimi niŋ, o wa bɛɛ aa waŋndo laalaŋ o nyɛ naŋ laalaŋndo niŋ te, ŋ nɔ bɛɛleŋ le wana koŋ, nduyɛ, ŋ beŋ waŋnda le ma laalaŋ o nyɛ naŋ laalaŋndo niŋ te.

Te o yɔŋ pɛ miŋ wa suukaŋndo a waŋnda o kaŋndeŋ choo, ŋ tual nyɛ Baabuiyo dimi wo kɔɔli. Ndu cho ni, “la dimul nda nyɛ kɛndɛi” a o “bɛɛle kɛsiaa niŋ” le wanaa cheleŋnda. (Pitɛ Tasoo 3:16) Ŋ nɔ laalaŋndo maa, o cho waŋnda kpou le yaŋ niŋ nilaŋ o yooŋgu kɛndɛ Mɛlɛka wo le. (Maatiu 10:14) O baa pilɔɔ choo, ŋ kilu yamɛi o kɔl kpali a waŋndo maa o yeŋ niŋ nilaŋ te le, mɛɛ miŋ soo o ndalo mi nda pila kɛɛ. Ŋ sina vɛlɛ maa mɛɛ waŋndo wa hau yɛ, o ve siɔdii lende le.

Le tamaseliiyo, naapum, waŋndo niŋ hau kɔl le suɛi o naalo le, kɛ, mbo naŋ siɔdii kɔl le suɛi o naalo. Lepum yɛ, mi waŋndo sɔla bahawɛi o nɔ mbo soli wo, mi hei tosa mbo muli hɔlla o nyɛ Baabuiyo dimi wo lo. Le hei, ŋ naŋ kɔl le suɛi o waŋnda lo lɔɔ lɔɔ.