Luehab Veŋ Suaŋsuaŋnda

PUAA haa cho o kpundɔɔ niŋ. Te a nyeenuŋ te, a cho nda diyɔɔ. Isɔluɛitiiya suaŋsuaŋnda haa cho ni. Chua cho nda hoo malaa wo cho Luehab ni. O kpaki balu chioo Chɛliko wo chiɛi Luehaboo wa ni. Leniŋ ndoŋ ndoo lɔl ni. Ŋ yaasiaŋndɔ le nyɛ puaa haa cho o kpundɔɔ niŋndo.

Isɔluɛitiiya cho niŋ a toosiaŋ le ma taŋ Pioo Chɔɔdaŋ le luɛiyɔɔ o lɛŋnde Kenaŋndeŋ niŋ. Kɛ tuupa ma taŋ, mi Chɔɔsuaa viam suaŋsuaŋnda a ŋiɔɔŋ. Mbo dimul nda aa: ‘Lakɔ mɛɛndaŋ lɛŋndeŋ a chioo Chɛliko.’

Mɛɛ suaŋsuaŋnda fuuluu Chɛliko, ma huŋ o Luehab lo chiɛiniŋ. Kɛ mi waŋndo malnuŋ mbo kɔ dimul masaa Chɛliko aa: ‘Puaa Isɔluɛitiiya a ŋiɔɔŋ hiŋ chuɛllɛŋ naŋ le lɛŋndeŋ mɛɛndaŋndo.’ Mɛɛ masaa tuei hei, mbo viam laŋgbaa o Luehab lo. Ma huŋ dimul ndu aa: ‘Soli puaa ŋ yiya o numndo chiɛiniŋnda o bɛɛ naŋ!’ Kɛ Luehab ndoo chii nda niŋ vioŋɔɔ o kaa. Mbo mulul nda aa: ‘Puaa laŋga huŋ o yalo chiɛiyo naŋ, kɛ I sina naa nda fula le. A laŋga kɔ suŋ a fitilioo hoo tuupa ma baŋ dio chioo. Te o yɔŋ pɛ mila keleŋa, la cho nda biyɔɔ.’ Mi laŋgbaa haa baa kiltaŋ nda kɔɔli.

Mɛɛ laŋgbaa haa mal biɔɔ, mi Luehab hel o kaa chɔ chɔ. Mbo dimul suaŋsuaŋnda aa: ‘I sina maa Jɛhowa cho nya lɛŋdeŋ ke. Ŋ tuei a mɛɛ o veesiaa Pee Mɛŋma Siaŋaa teleŋ nya wa fulaa Ichipi wo yɛ. Nduyɛ, a mɛɛ nya dii masaa Saihɔŋ a Ɔɔki yɛ. I tosal nya saboo, lelaŋ a yandii, la yii kpemaa a ya, le chɔmndo maa la cho ya saboo tosal. La chiindialla finya nuu, a kala nuu, yemaa niaa vɛlɛa pɔmbuaa niaa.’

Mi suaŋsuaŋnda haa yii kpemaa a ndu maa a cho tosa, kɛ Luehab nɔ mbo tosa nyɛ pum. Mi suaŋsuaŋnda dimul ndu aa: ‘Chua kɛi siaŋaa ma baa o wundɛiyo, nduyɛ ma chuuŋgiaa wanayaŋ numndoŋ kpou o numndo chiɛiniŋ. Te o yɔŋ pɛ miŋ huŋ hiɔlu Chɛliko, ŋ cho chɔ kɛi siaaŋaa hoo o widɛi numndo, okoŋ wana o wana cho o numndo chiɛiniŋ ŋ dii ndu le.’ Mɛɛ suaŋsuaŋnda miiŋgu o Chɔɔsuaa lo, ma dimul ndu a nyɛ o nyɛ yɔŋnuŋ.