Kiibiɔnaitiiyaa Taasiaa

CHIEEŊ bɔɔ bɔɔ o lɛŋnde Kenaŋndeŋ niŋ wa niko ŋbɛɛndiaŋ le Isɔluɛitiiya simullo a chɔulabaa. Yiyaŋ ndaa wa ni maa a cho nda ba tiu. Kɛ wanaa wa Kiibiɔŋ chiee nda machɛlu wa, ndaa nɔ yiyaŋ koŋ te. Ma laalaŋ kɛsɛ kɛsɛ maa Mɛlɛka cho Isɔluɛitiiya malaa ni, nduyɛ maa a yeema ma chɔulaba a wanaa Mɛlɛkaa le. A sina pa nyɛ Kiibiɔnaitiiya tosa wo?

Ma kɛɛsiaa le chɔmndo maa a chɛŋ bɔɔ naa levil. Mɛɛ mi puaa haa apum wounuŋ nyɛla siɔŋɛɛlaŋ vɛlɛa kɔvɛila siɔŋɛɛlaŋ. Ma chua bɔlɔla siɔŋɛɛlaŋ vɛlɛa beedii vesɛi paandoo, ma dovi sofɛliaa ndaa o lakɔɔ. Okoŋ ma huŋ o Chɔɔsuaa lo ma dimul ndu aa: ‘Ŋ chɛŋ bɔɔ naa levil. Ŋ tuei a Jɛhowa Mɛlɛka nyaa okɔɔ. Ŋ tuei a nyɛ o nyɛ o tosal nya o Ichipi niŋ. Lelaŋ simlachiaa naa dimul naa ni maa naŋ chua nyɛdiaa le dio o nɛi miŋ huŋ dimul nya aa: “Buɛiyaa nyaa naŋ cho ni. La yii kpemaa a naa maa la chɔulaba niŋ a naa le.” Num pila bɛɛ cho chɔɔ mɛɛ nyɛla naalaŋ la siɔŋ yuku yɛ. Beedii naa bɛɛ yɔŋnuŋ o paandu, o kei vesa o nɛi sɛɛŋ a mɛɛ tiŋndo bandu yɛ.’

Mi Chɔɔsuaa a simlachiaa a piliaa laalaŋ Kiibiɔnaitiiya haa. Okoŋ, ma yii kpemaa a nda maa a cho chɔulaba a nda le. Kɛ mɛɛ palɛi hiou iyaa, ma huŋ sina maa Kiibiɔnaitiiya haa cho levil a nda le.

Mɛɛ mi Chɔɔsuaa nyuna nda aa: ‘Le yɛɛ nya dimullɛ naa maa la chɛŋ bɔɔ naa levil?’

Mi Kiibiɔnaitiiya muli aa: ‘Le mɛɛ naŋ tuei maa Jɛhowa Mɛlɛka nyaa dimi le nya lɛŋnde Kenaŋndeŋ kpou kio yɛ. Lelaŋ sioonde bii naa tau ni maa lacho naa diyɔɔ.’ Kɛ mi Isɔluɛitiiya lo o lediom, a dii lɛ Kiibiɔnaitiiya le. Kɛ ma siiŋguu nda buɛiyaa ndaa.

Mi masaa Chulusalɛm duaunuŋ tumbe tau le mɛɛ Kiibiɔnaitiiya tosa diompilɔɔ a Isɔluɛitiiya yɛ. Le hei, mbo dimul masaa hiɔɔluaa cheleŋnda aa: ‘La huŋ mala ya miŋ chɔulaba Kiibiɔŋ.’ Nduyɛ mi masaa ŋuɛɛnuaa haa huŋ le chɔulabaa a nda le mɛɛ nda tosa diompilɔɔ a Isɔluɛitiiya yɛ. Baa taasioo pa Kiibiɔnaitiiya haa tosa koŋ ni le diompilɔɔ a Isɔluɛitiiya? Ŋ cho hunɔɔ chɔ.