Masaleŋ Le Piɔunuŋ Tɛɛŋ

ASINA pa le sabu finyaa hoo cho doma ndɔɔ sɛɛsiaa wo? Jɛhowa dimul ndu ni maa o sɛɛsiaa ndu. Wana suaa le Mɛlɛka wo o cho ni, diola ndɔlaŋ aa Ahicha. A sina pa wana nda veelu aa wana suaa le Mɛlɛka wo? Ndu dimul waŋnda nyɛ Mɛlɛka dimi le hunɔɔ yɔŋnɔŋndo o chilaŋ niŋndo ni.

Ahicha cho suɛi o Chɛloboamndo naŋ. Chɛloboam Sɔlɔmɔŋ ndoo kɛsi chilaŋ ni le walta taŋgulaa laŋ lapum. Mɛɛ Ahicha bɔŋaŋ nda Chɛloboam o nɛi naŋ, mi Ahicha tosa suɛi kaamɛi pum. Mbo soli doma sɛnɛi wa ndu lekɔɔ wo, mbo sɛɛsiaa ndu vɛ vɛ buŋgaŋ 12. Okoŋ mbo dimul Chɛloboam aa: ‘Chua buŋgaŋ tɔ le numpila.’ A sina pa le sabu Ahicha dimul Chɛloboam le mbo chua buŋgaŋ tɔ wo?

Mi Ahicha tɛɛsiaa maa Jɛhowa nɔ le Sɔlɔmɔŋ masaleŋ puuwo o ba. Mbo dimul ndu maa Jɛhowa cho Chɛloboam kaalaŋ tɔ ke. Hei chɔm ni maa kaaye iŋiiŋ koni cho lo le po Sɔlɔmɔŋndo ni, Lihoboam.

Mɛɛ Sɔlɔmɔŋ tuei nyɛ Ahicha dimul Chɛloboamndo, mbo tuulu kɔl tau. O wa pɛŋ kindiŋndo le Chɛloboam diyɔɔ. Kɛ mi Chɛloboam nyaanuŋ Ichipi. Mɛɛ boondii biŋgi hiou, mi Sɔlɔmɔŋ wu. Wɔsilaŋ 40 o chii o masaleŋ choo ni. Kɛ Lihoboam po ndɔ miiŋgu niŋ masaa o fonda ndɔɔ ni. Chɛloboam lo Ichipi mbo tuɛi maa Sɔlɔmɔŋ vi, mɛɛ mbo miiŋgu pila Isɔluɛi.

Lihoboam ve masa kɛndɛ le. Ndu ndoo wɔu kaa ndoo hiou bɛɛ Sɔlɔmɔŋ finya ndɔ. Mi Chɛloboam a wanaa kɔlkaluaa cheleŋaa pum kɔ dimul Lihoboam maa o chaa waŋnda biyɔɔ. Kɛ Lihoboam yeŋ nda pɛŋ lani le. Mi hei tosa mbo chɔɔlu pɛŋ kaa wɔɔŋndo luɛiyɔɔ mbo hiau maa paandu. Mɛɛ mi waŋnda siiŋguu Chɛloboam masaa le kaala tɔlaŋ. Kɛ le kayii ŋiinde ndi, Bɛŋnjamɛŋ a Chuda, Lihoboam nda kɛsi masaa ni.

Wanaa Chɛloboam wa choo masa wa, ndoo yeema nda maa kuɛ Chulusalɛm le Jɛhowa piɛi o maaŋ ndɔɔ niŋ te. Le hei, mbo toosiaa piɔmaa ŋkooliiya a ŋiɔɔŋ le mi wanaa o wa choo masa wa sooluu nda. Mi hei tosa mi lɛŋndeŋ le pia cha a dɛnɛwɔɔŋndo.

Kɛ o masale kayii ŋiinde niŋ bɛɛ kpundɔɔ wa. O wɔsila ŋuɛɛnu bɛŋgu, chɔŋ a sul Lihoboamndo, mi masaa Ichipi huŋ sɔŋga a Chulusalɛm. Mbo chua nyɛm sɔwɛɔŋ tau o maaŋ Jɛhowaa niŋ mbo kuaŋnuŋ a muŋ. Le teleŋ biŋgi koni maaŋndo wa o bandɔɔ choo ni chɔŋ a boondii o taŋguluŋnde.