Kpakioo Chulusalɛm

NUAWƆ se Isɔluɛitiiya wallo nanuŋ. A cho kpakio Chulusalɛm taŋgullo. Wɔsilaŋ 152 laa hiou niŋ ni chɔŋ a boondii masaa Nɛbukanɛɛsa tɛɛmbuu Chulusalɛmnde. Mbo pial kpakio wɔ wɔ. Vɛlɛ, mbo lumi lumi diolaŋ kpede. Kɛ fula nda tasoo o chɛleŋ niŋ Babilɔŋ, ndaa teŋgullɔ kpakio le.

A yiyaŋ pa maa waŋnda haa wa a nyaale teleŋ ndaa nɔ wɔ kpaki loo? Sako. Yaamɔɔwa ndaa huŋ teleŋ o teleŋ ma del nda choo. Lelaŋ Nɛhimaya cho waŋnda haa malaa ni le ma miŋgi vɛlɛ kpaki chioo taŋgul. A sina pa wana Nɛhimaya wa wo?

Isɔluɛinɔɔ Nɛhimaya wa ni. Naa Ɛsta wa ichali Sushaŋ chiee wa o wa ni. O chiɛi lemasaa niŋ Nɛhimaya wa baalaa ni. Chaaŋaa nduaa kɛndiaa pila Ɛsta nda Mɔdikaya wa dɔɔ ni. Mi Baabuiyo dimul naa maa le masaa Atasasi Nɛhimaya wa wallo ni. Kɛ o cho le masaa Ahasaliɔɔ le, pɔnɔɔ Ɛsta.

Loonuŋ maa Atasasi masa kɛndɔɔ pila o wa ni. Ndu ndoo ke Ɛsɛla kanioŋ ni le maaŋ Jɛhowaa toosiaa Chulusalɛm. Kɛ o cho le kpakio taŋgullo le Ɛsɛla ndoo kuɛ le. Nɛhimaya ndoo taŋgul kpakio ni. Ŋ tofaŋndɔ mɛɛ Nɛhimaya looku wallo hoo tosa yɛ.

Wɔsilaŋ 13 laa hiou niŋ ni chɔŋ a teleŋ Atasasi ke Ɛsɛla kanioŋ le maaŋndo toosiaa wo. Le wanaa ndaa talal masaa Atasasi muɛiyaŋ nda kinɛi, Nɛhimaya wa nda bolleŋ ni. Hoo chɔm ni maa ndu ndoo ke masaa muɛiyaŋ ni. Nduyɛ tuupa mi ndoo ke masaa muɛiyaŋ, mɛɛ mi ndoo che fɛŋ maa nyɛ o nyɛ wɔɔŋ cho leniŋ te. Wali sɔwɛɔ pila o wa ni.

Mɛɛ paale pilɛ mi Hanani a chaaŋaa nduaa huŋ Nɛhimaya yilɔɔ Babilɔŋ. Hanani yɛ, wanayɛi Nɛhimaya ve o wa ni. Ma dounuŋ Nɛhimaya kona a simulta Isɔluɛitiiya cho sɔlaa Chulusalɛmndaŋ, nduyɛ a mɛɛ kpaki chioo cho wɔ o piɔlɛi yɛ. Mi hei tɛɛmbuu Nɛhimaya kɔllo tau. Le hei, mbo piɛi o Jɛhowalo.

Paale pilɛ mi masaa cha maa Nɛhimaya tambu kɔl. Okoŋ mbo nyuna ndu aa: ‘Vɛ ma wa hau naa yɔluŋ?’ Mi Nɛhimaya mulul ndu maa le mɛɛ Chulusalɛm cho wɔ o piɔlɛi wɔ wɔ yɛ. Nduyɛ kpaki chioo bɛɛ cho wɔ o tambɛi. Mi masaa nyuna ndu aa: ‘Yɛɛnɛ ŋ yeema yɛ niko ma tosa?’

Mi Nɛhimaya mulul ndu aa: ‘I yeema mi kuɛ Chulusalɛm mi kɔ taŋgul kpakio.’ Masaa Atasasi yɛ kaa kɛndɔɔ pila ndoo nɔ ni. Mbo chɛl le mi Nɛhimaya kuɛ Chulusalɛm, nduyɛ mbo mala ndu a yɔmii taŋgulɛi vɛlɛa pɛŋgɔŋ. Hau pa mi Nɛhimaya kua bɛɛ Chulusalɛm. Mɛɛ o fuuluu, mbo dimul waŋnda nyɛ o nyɛ o kɛɛsiaa. Mi Isɔluɛitiiya kpou naŋ kɔl a kɛɛsiaa hoo. Okoŋ ma chɛl le taŋgullo kandɔɔ.

Mɛɛ yaamɔwaa Isɔluɛitiiya che maa kpaki chioo cho niŋ helɔɔ choo pɔ, ma dimi aa: ‘La ŋ kɔ diinuŋ nda mi wali ndaa mɛɛlu.’ Mɛɛ Nɛhimaya tuei a hei okɔɔ, mbo chua mɔɔŋ a baltaŋ mbo ke wanaa baalaa. Mbo dimul nda aa: ‘La yɔŋ isiooŋ le yaamɔwaa naa haa le. La chɔulaba le pɔmbuaa nyaa, a bɛndaa nyaa, a chuauwaa nyaa, a laandaa nyaa, vɛlɛa chiee nyaa.’

Waŋnda haa siooŋii ve nda le yaamɔwaa ndaa le. A wa tuŋ hiouwɔɔ lachi a taŋgullo. Paaleŋ a nyumndaŋ nyɛmndaŋ chɔuwoŋ wa ŋ toosiaa nyɛ kɛndɛi. O palɛi 52 bɛŋgu, mi kpakio chuu taŋgul. Mɛɛ mi Isɔluɛitiiya naŋ kɔl tau, kanifuule chiee ndaa cho niŋ o kpakio niŋ. Mi Nɛhimaya nda Ɛsɛla pɛɛku waŋnda sawala Mɛlɛkalaŋ, nduyɛ ma duaunuŋ nyaale tau.

Tuupa ma kua a Isɔluɛitiiya o chɛleŋ niŋ Babilɔŋ, nyɔɔ waŋnuŋ nyɛkɛndɛi. Kɛ fula ndaa o chɛleŋ niŋ ma huŋ, nyɔɔ ve lɛ maa paandu le. Kanifuule o masa Paatiaŋnda ba bɛŋgu nda wa wɔ ni. Le ndu koni ndaa tosa wallo ni. Kɛ mi Jɛhowa dimi maa o cho nda masa cheleŋ ke. Masaa hoo yɛ o cho hunɔɔ a kɔl nyuloo o waŋnda lo kpou. Nɛɛ cho yɛ wa masaa hoo? Nduyɛ vɛɛ o looku yɛ niŋ hunɔɔ a kɔl nyuloo o lɛŋndeŋ choo? Wɔsilaŋ 450 la hiou fɛŋ, tuupa mi wana o wana sina a hei okɔɔ. O bundɔŋ cho lachi woŋ niŋ, ŋ cho hunɔɔ pɛɛku a wiolɔŋ chɛlɛkpɛ sɔwɛ pum okɔɔ.