Timotii​—⁠Wana Malaa Sɛnɛi Pɔɔllo

CHUA piaandu sim hoo nda Pɔɔllo cho Timotii ni. Lista Timotii wa ichali ni nda yuŋgu ndɔɔ. Kala ndɔ diolaŋ aa Yuniis. Mama ndɔ diolaŋ aa Luwiis.

Bɛmbɔɔ yaa ndɔɔ Pɔɔl hiŋ niŋ hoo Lista ni. Pɔɔl nda Banabaa ndaa hiŋ niŋ fɛŋ suɛi Mɛlɛkɛi dimio naŋ. Chɔŋ a teleŋ koŋ, o cho niŋ le suɛi wɔsi pilɛ. Mɛɛ mi Pɔɔl miiŋgu vɛlɛ Lista nda Sailaa chaaŋ ndɔ.

A sina pa nyɛ Pɔɔl cho Timotii dimullo wo? Nyunaa o cho ndu ni aa: ‘A yeema ma tol la kɔɔli naa Sailaa?’ Mbo hiau lachi a ndu dimullo aa: ‘Ŋ hɛnaŋ ma mala naa suɛi Mɛlɛkɛi dimi o wanaa cho o fondaŋnda leviltaŋ nda.’

Mi Timotii muli aa: ‘I yeema mi kuɛ.’ Mɛɛ mi Timotii mɛi yuŋgu ndɔɔ mbo tual Pɔɔl nda Sailaa kɔɔli. Kɛ tuupa miŋ sina a kela ndaa okɔɔ, ŋ chɔnuŋndɔ fɛŋ nyɛ yɔŋnuŋ a Pɔɔllo. Teleŋ Chiisu fula ndu o hɔl nɛi tɛɛŋ le kɔlaŋ Damasikɔɔ chiee wo, suɛi wɔsila 17 o wa niŋ ni.

Loonuŋ maa teleŋ Pɔɔl wa kɔlaŋ Damasikɔɔ wo, le nyɛpalaa buɛiyaa Chiisuaa tuisioo choo o wa kɔlaŋ ni. Kɛ ndu bɛɛ simnuŋ niŋ buɛi Chiisoo. Mɛɛ o kandu waŋnda pɛɛkoo a Chiisu okɔɔ, mi yaamɔɔwa kindiŋ le ndu diyɔɔ. Kɛ mi buɛiyaa Chiisuaa apum mala ndu mbo hialuŋ nda. Vɛɛ nda looku yɛ hei tosa? Mɛɛ nda wou ndu o kambɛiyo niŋ, ma tuisi ndu o kpaki chioo kɔɔli.

Okoŋ kɔɔli, mi Pɔɔl kua Aŋtiɔɔ le yooŋgu kɛndɔɔ dimio. Aŋtiɔɔ fɛŋ buɛiyaa Chiisuaa sɔla veelɔŋndo aa Kilisiɔŋnda. Fulaa Aŋtiɔɔ, ma viam vɛlɛ Pɔɔl nda Banabaa o lɛŋii landaŋ landaŋnde le yooŋgu kɛndɔɔ dimio. Lɛŋndeŋ lepilɛ o lɛŋnde hei tɛɛŋ cho Lista ni. Lista wa yɛ chiee Timotii wo ni.

Le suɛi wɔsi pilɛ, mi Pɔɔl miiŋgu vɛlɛ miiŋgu diiŋndɔɔ Lista. Mɛɛ Timotii tol Pɔɔl nda Sailaa kɔɔli, a sina pa naa ndaa kuɛ wa? Nuawɔ niko lɛŋii tuulɛi hei. Ŋ pɛɛkuŋ ndɔ niko a Chioŋ pum okɔɔ.

Aikooniɔm fɛŋ nda kuɛ. Chiee diiŋndɔ nda kuɛ wo wa Aŋtiɔɔ ni. Mɛɛ nda fula Aŋtiɔɔ, ma kua Towaa. Mɛɛ nda fula Towaa, ma kua Filipai. Mɛɛ nda fula Filipai, ma kua Tɛsalonika. Mɛɛ nda fula Tɛsalonika, ma kua Bɛluiya. A cho pa chɔɔ Atɛŋ maluaŋnda? Mi Pɔɔl dimi vɛlɛ yooŋgu kɛndɔɔ loŋ. Mɛɛ nda fula loŋ, ma chii wɔsio a tɛndaa tɛɛŋ Kɔɔliŋ. O mɛɛlulaŋ kpɔŋ, ma kua Ɛfisɔɔ chokobi. Okoŋ, ma luɛi o dɛndɔɔ niŋ ma huŋ Sisaliaa. Mɛɛ nda faŋaŋ ndoŋ, ma huŋ Aŋtiɔɔ. Aŋtiɔɔ naŋ Pɔɔl wa niŋ ni.

Ŋ dimi maa mi Timotii balu chieeŋ siaama siaama le Pɔɔl malaa yooŋgu kɛndɔɔ dimio. Ma kila Kundala Lekilisiɔŋndaŋ tau. Num yɛ, a wa niŋ pa buɛi laalaŋ Mɛlɛkaa maa Timotii?