BUŊGƐI 10

Mɛɛ Ŋ Saaluŋ Piɛile Tonyaleŋ Yɛ

Te a yeema waa chaaŋ o Mɛlɛka pɛ, a nɔ ma pɛɛku a piɛile Mɛlɛka chɛl teŋ. Chiisu dimi maa “wana sooluu ndu Mɛlɛka wo,” cho ndu sooluu o nɛi “tonyaa” choo. (Chɔŋ 4:23, 24) Nɛiyo opilɛ koni cho le Mɛlɛka piɛiyo sanaa ni. (Ɛfisiaŋnda 4:4-6) Piɛile tonyaleŋ le yaa num o yoomu fafɛɛŋndo niŋ, nduyɛ mi piɛile lachoowaleŋ le yɛɛ num o tambei niŋ.—Maatiu 7:13, 14, NW.

Puaa teŋgeŋ teŋgeŋnda cho Sei Chɛhowaa nuaa o tanda ndaa niŋ

A sina piɛile tonyaleŋ te a mɛɛndaŋ pɛ nyɛ wanaa cho leniŋ nda tosa wo. Mɛɛ Chɛhowa cho wana kɛndɛ yɛ, wanaa cho ndu piɛiyo wa nɔ ma wa a kɛndɛ. Mɛɛ siau kɛndɔɔ kuam siauma kɛndiaŋ yɛ, lende koni piɛile tonyaleŋ le kuam wanaa kɛndiaa ni.—Maatiu 7:15-20.

Chaaŋaa Chɛhowaa nɔ bɛɛle yiŋgoloŋndeŋ le Baabuiyo. A sina maa o Mɛlɛka lo Baabuiyo fula ni. A chɛl nyɛ o dimi wo le yoomula ndalaŋ mandaa, le bahawɛila ndalaŋ solioo, vɛlɛ a malaa nda le pɛɛkoo a Mɛlɛka okɔɔ. (Timotii Diiŋ Ndɔɔ 3:16) A kindiŋ le tolɔɔ nyɛ nda dimul waŋnda wo kɔɔli.

Chaaŋaa Chɛhowaa chɔm kaalaa le opilɛ a o cheleŋndo. Mi Chiisu chɔm kaalaa le waŋnda a mɛɛ ndoo pɛɛku nda a Mɛlɛka okɔɔ yɛ, a siŋgioo wanaa wa a naalaŋ nda. Wanaa pɛɛku piɛile tonyaleŋ nda bɛɛ chɔm kaalaa le acheleŋnda. Maa Chiisu, a chi wanaa tambɛiya chɔdɔ le kɛlɛŋgaa ma chɔm hɛliaŋ lekaawo. Mi Chiisu dimi maa waŋnda sina niŋ buɛiyaa nduaa a mɛɛ nda chɔm niŋ kaalaa le opilɛ a o cheleŋndo yɛ.—Chɔŋ 13:35.

Chaaŋaa Mɛlɛkaa ke diola Mɛlɛkalaŋ bɛɛleŋ, Chɛhowa. Te waŋndo kɛɛ pɛ diola numndaŋ soliŋndo kpeku, wana koŋ wa pa chaaŋ num kɛndɛ? Sako! Te ŋ nɔ pɛ chaŋyɛi, ŋ soliŋ diola ndɔlaŋ kpeku vɛlɛ miŋ dimi sɔɔŋ kɛndɔŋ a ndu okɔɔ o wanaa cheleŋnda lo. Lelaŋ, wanaa yeema ma wa chaaŋaa Mɛlɛkaa wa nɔ ma soliŋ diola ndɔlaŋ kpeku nduyɛ ma dimul acheleŋnda a ndu okɔɔ. Chɛhowa yeema naa miŋ tosa keŋ.—Maatiu 6:9; Luomaŋnda 10:13, 14.

Maa Chiisu, chaaŋaa Mɛlɛkaa nɔ ma pɛɛku waŋnda a Masale Mɛlɛkaleŋ okɔɔ. O choo choo niŋ Masale Mɛlɛkaleŋ le cho ni, nduyɛ le cho chieeŋndo siiŋguu kpele hɛnɛkiɔɔ. Mi chaaŋaa Mɛlɛkaa dimi hau yooŋgu kɛndɔɔ hoo a Masale Mɛlɛkaleŋ okɔɔ o wanaa cheleŋnda lo.—Maatiu 24:14.

Seiyaa Chɛhowaa kindiŋ le ma wa chaaŋaa Mɛlɛkaa. A nɔ bɛɛleŋ le Baabuiyo vɛlɛ a nɔ kaalaa ndapila tɛɛŋ. Ma soliŋ diola Mɛlɛka kpeku nduyɛ ma ke laŋ bɛɛleŋ, nduyɛ ma pɛɛku acheleŋnda a Masale Mɛlɛkaleŋ okɔɔ. Seiyaa Chɛhowaa cho hau piɛile tonyaleŋ pɛɛkoo o lɛŋndeŋ choo ni.