Yɛɛ Yɔŋnuŋ Yɛ O Piɔmndo Kɔɔli?

Piɔmndo cho nyɛ pilɛ a yoomoo le. Piɔmndo cho ko maa luaŋ. (Chɔŋ 11:​11-14)Waŋvilɛiya nɔla ma tuei le, a chi le, a suu le, kɛlɛŋgaa ma yiyaŋ a nyɛ o nyɛ. (Ikilisiaatii 9:​5, 10) Piɛile lachoowaleŋ le pɛɛku maa mi waŋvilɛiya miiŋgu o inyinaya ma kɔ wa achal nda wanaa ndaa vi niŋ paandu wa. O cho hei le Baabuiyo pɛɛku le.

Wanaa vi niŋnda mala naa le, vɛlɛ a yɔŋul naa le. Waŋnda hau ba o ba fee cho luaŋndoŋ sooluu wo a salalaŋ solioo. Le wanaa ndaa vi wa kɔllo nɛŋioo nda tosa keŋ ni. Hei tɛɛmbuu Mɛlɛka kɔl kani fuule, o choola Setana laŋ niŋ i fula ni. I nɛŋi waŋvilɛiya kɔl te, kanifuule a nɔ yoomu le. Ŋ nɔ isiooŋ kɛlɛŋgaa miŋ sooluu waŋvilɛiya le. Mɛlɛka ndu pilɛ kpe naa ŋ sooluu ni.—Maatiu 4:​10.

Waŋvilɛiya cho vɛlɛ miiŋgu yoomu. Chɛhowa tindi niŋ waŋvilɛiya ma miiŋgu yoomu o chieeŋ kpele hɛnɛkiɔɔ niŋ. Teleŋ koŋ fuuluu wɔ le. (Chɔŋ 5:​28, 29; Walta wanaa Chiisuaa 24:​15) Mɛlɛka cho hunɔɔ waŋvilɛiya tindi nuawɔ ko mɛɛ num bɛɛ tindi waŋndo o luaŋ yɛ.—Maki 5:​22, 23, 41, 42.

Yiyaŋndo maa ŋ vi le, choola Setana cho pɛŋgɛlaa laŋ la cho ni. Setana a nyinaa nduaa wɔɔŋnda tosa mi waŋnda yiyaŋ maa nyinaa wanaa vi niŋnda cho achal nduyɛ ma tusi waŋnda naalaŋ choo a bahawɛila cheleŋ. Lepum mi Setana hui waŋnda o lɔma sɔlaŋ niŋ a yilaŋnde. Suukaŋndo a wanaa vi niŋnda walta nyinaa wɔɔŋnda o cho ni. Chɛhowa pɛɛsa wanaa kindiŋ le suɛi o waŋvilɛiya lo wa.—Ditɔnɔmii 18:​10-12.