Nyɛpalaa Kpou O Cho Chuwɔɔ Suŋ!
O teleŋ pum niŋ o yoomu numndo niŋ, naapum a nyunaniŋ aa, “Levɛ nyɛpalaa hoo Kpou?” Le wɔsiŋ waala bɔɔbɔɔ, yungu wanachio o sanganiŋ tau a chɔulaŋ, pɛŋndeŋ, halimaalaŋ, sawatɛɛmbaa, kɔɔsɔlakafaa, naalaŋ vɛlɛa piɔmndo. O wɔsila kɛmɛla hiou laŋniŋ waŋchieya sinaŋ niŋ nyɛpalaa mbo hiau paandu fau. Hoo kpou o chuuniŋ pa?
Muli kɔlpɔlulaa choni aa lende, nduyɛ suŋsuŋ! Diom Mɛlɛkaa, Baabuiyo, o dimideŋ aa: “Wana dɛnɛwɔɔndo o velɛ niŋ fɛɛŋ te. . . Kɛnduyɛ wanaa tusiaŋnda ndapila cho lɛŋndeŋ sɔla, vɛlɛ a sɔlaniŋ kɔlhinia tau o kɔlnyulu bɛndoo niŋ.” Le vɛɛ kpɛ? “Wanaasandaa ndapila cho hunɔɔ lɛŋndeŋ sɔla vɛlɛ a chowa achal lechoo le fafɛŋ.”—Chondei 37:10, 11, 29.
Te Mɛlɛka chiipɛ dɛnɛwɔɔndo vɛlɛa nyɛpalaa, lɛŋndeŋ le cho siŋngiŋ o paladaisiiyo niŋ. O koŋ wannda nɔla niŋ mawa achal le fafɛŋ o kɛndia diandaa niŋ vɛlɛa kɔlkɛndɔɔ. Diom Mɛlɛkaa dimilachi aa: “[Mɛlɛka] cho mɛmiaŋ fau wɔɔsuu nda o lahɔl, vɛlɛ piɔmndo velɛ niŋ kposoŋ te, kɛlɛngaa mi mɔnɛi wa baa chaŋndo baa mi nyɛnɛiyaa walɛ bɛɛ kposoŋ.”—Chɔmnɔŋndo 21:4.
O chieŋ sɛnɛi koŋ niŋ, waana vilɛiya bɛɛ cho muungu yoomu ma sɔla salalaŋ: “Fulasɛiniŋndo cho wa vellaa velle le wanaa sandaa vɛlɛa wanaa sendulea.” (Dɛnɛlaŋ 24:15) Lelaŋ Jisɔsi nɔlani mbo dimul wana dɛnɛwɔɔŋ wookuŋndo o chɔm laalaŋndo o ndu niŋndo aa: “A chowa a ya o paladaisiiyo niŋ.”—Luku 23:43.
Leyɛɛ Nyɛpalaa Ndoo Kanduŋyɛ Nɛ?
Mɛɛ Mɛlɛka ndoo tosaasabu dɔɔ le mi wanndachieya ndaa sɔla chila kaamaala waalendelaŋ yɛ, leyɛɛ o chɛllɛ mi nyɛpalaa kanduŋ nɛ? Leyɛɛ o chɛllɛ ndu mbo viau naa tau?
Teleŋ Mɛlɛka toosia Adama nda Ivio, ndoo toosia nda a ndialloŋ vɛlɛa yiyaŋ diandaa. Mbo duau nda o paladaisiiyo niŋ vɛlɛ mbo kenda wali kɔlhinia le tosaa. Baabuiyo dimi aa: “Mi Mɛlɛka cha nyɛnyɛ o toosia nduyɛ, tofawɔ! O wa okɛndɛ tau.” (Gɛnɛsi 1:31) Te ndaa tuei Mɛlɛka diom pɛ, daa nɔlaniŋ ma velu chuawaa diandaa, vɛlɛ lɛŋndeŋ le wa siŋnɔŋ paladaisiiyo chiendofau, naa wanndachieya ndaa waniŋ achal le fafɛŋ o kɔlnyuloo vɛlɛa kɔlkɛndɔɔ niŋnda.
Mi Mɛlɛka duau Adama nda Ivi niŋ ke kaamaapia hɛnaŋ hɛnɛkɛɔ maa nyɛ wanachio tosaŋ a nduwo. Ndoo toosiaŋ maa velaŋnda-nyaa-yoomaa nɔ yiyaŋtea le. O koŋniŋfau, kɔlkɛndɛ ndaa hiowɔɔ lachi ndoo tiindaŋ o hɛnaŋ hɛnɛkɛ ndaa kpeku soliŋndo o nɛi kɛndɔɔ niŋ—le sawala Mɛlɛkalaŋ diom tueiyɔɔ. Mɛlɛka dimi aa: “Ya, Jɛhowa, ya cho Mɛlɛka nyaa ni, Wana cho nya pɛɛkoo le tɔnɔ nyapilaawo, Wana cho nya tosaa le mila kuɛ o nɛi nya nɔ mila kela niŋndowo.” (Aisaya 48:17) Kɛɛ chaa hɛnaŋ hɛnɛkɛɔ kpekusoliŋndo ndoo huŋniŋ a kpundɔɔ, mɛɛ waŋchieya ndaa tosiaŋ le mawa a banda abatiuwaa Mɛlɛka kɔɔli leyɛ. Baabuiyo dimi aa: “Wanachio nɔ nɛi ndɔɔ oba le. Wanachie cho kelaawo onɔla mbo chɔm pelii nduɛi nɛiyo le.”—Jɛlimaya 10:23.
Akɔltambɛi, wanaa vialaa naa tasea ndaa yiyaŋ maa ndaa nɔla mawa abanda fulaa o Mɛlɛka kɔɔli abatiuwaa. Kɛnduyɛ mɛɛ nda kɛɛ manda Mɛlɛkaa, o nɔla lɛ mbo kɛsi nda yoomu o diondɔɔ niŋ te. Lelaŋ ma kadu tabei haa ma yuuwa vɛlɛ ma wu. Lemɛɛ naŋ veluŋ a nda okɔɔyɛ, miŋ sɔla niŋ kɛɛdiondɔɔ a piɔmndo.—Romanda 5:12.
Nyuna Lebollo—Kpaayamandaa
Leyɛɛ Mɛlɛka ndoo kɛɛyɛ Adama nda Ivi tɛɛmbuuwo mi ndoo toosia vɛlɛ yungu wanachie cheleŋ nɛ? Kanifuule kpaayamandaa chieŋfau Mɛlɛkaa, koŋ choni maa, di ndɔɔ le mandamasaa ndoo simuluŋ niŋ. Nyunaa wani maa, Onɛɛ nɔyɛ dio le mandamasaa, vɛlɛ mandamasa nɛɛnɛ chiɛ o dioniŋ? Lelaŋniŋ, Waŋchieya nɔlapa ma hiouchaa tosa taa mandaŋ a Mɛlɛka le? O nda kio teleŋndo tuuleŋ le ma tofa hɛnɛkɛ kpouwo, Mɛlɛka ndoo wa sinawalaŋ le teleŋndo fau te ndaa chaaniŋ wapɛ tau o mandalemasa ndɔɔ bɛngu baa a banda. Teleŋ chɛlnuŋndo ndoo nɔ mi ndoo bandu tuuleŋ le mi waŋchieya ndaa tofa toosiala le yalalaŋ, lachaŋchɛi waŋchieya, lanyɛnuuwa, vɛlɛa la lepiɛilaŋ lakɛkɛ fulaa o nɛichɔmaa Mɛlɛkaa kɔɔli.
Yɛɛnɛ wayɛ niŋ Kɔɔliaŋ? Wɔsiŋ waalabɔɔ o sɔɔŋpaadu wanachio niŋ ŋ dimul naa maa nyɛpalaa waniŋ chɔɔlɔŋndo tau tau. O wɔsiŋ kɛmɛ hiouwoŋ niŋ, yungu wanachio sinaŋ niŋ nyɛpalaa hioulewɔu kpouwo. Kɛmɛchuuchɔmteleŋ ndaa diinuŋ o Chɔu Chieŋ II. Ohiou kɛmɛchuuchɔmtelaŋ 100 a diinuŋ niŋ o chɔulaŋ niŋ. Sawatɛɛmbaa vɛlɛa tandalaŋ la kuiniŋ. Koowaŋ chuawɔɔdo o tiusɔ. Naala hiviŋ ahinielaŋ lacho kɔlaŋ a pɛngɛlaŋndo. Kɛmɛchuuchɔmtelaŋ tɔtɔ acho wuo a yiaŋ vɛlɛa naalaŋ okɔɔ wɔsio wɔsi. Yoomu yungoo vɛlɛa kaala diandaalaŋ latambu niŋ babafee. Gɔmɛtii wanachie bɛɛ nɔ lamuli le bahawɛilaŋ ndaŋ te. O pilɛ bɛɛ tiuwɔ yuuwɛi, naalaŋ, a piɔmndo bale.
Fonda wanachio choniŋndo o cho kpeŋ a mɛɛ Baabuiyo dimilachi le teleŋnda naalaŋyɛ. Diom Mɛlɛkaa chɔmwalaŋ pɛngu naa hoo maa “palɛi mɛɛlɛi” toosia ŋnyɔɔ hoo lɔɔ “teleŋnda kalala kendu le biyɔɔlaŋ lachowa naŋndo.” Vɛlɛ amɛɛ Baabuiyo ndoo dimi kpeŋyɛ “wanaa dɛnɛwɔɔnda vɛlɛa wanaahuiyaa a chɛŋ o wɔuleŋ mahiau lachi.”—2 Timoti 3:1-5, 13.
Nyɛpalaa Ochoniŋ Kpɛɛlaŋ Lɛ Chuwɔɔ
Seileŋ kpou lechɔm maa ŋ choniŋ Kpɛɛlaŋ o mɛɛlula tɔɔndaŋ kpundɛ wanachio le waa-abandɔ fulaa o Mɛlɛka kɔɔli. O chɔmnuŋ niŋ kpendekele maa mandalemasaa a waŋchieya fulaa o Mɛlɛka kɔɔli, o nɔla fɛɛŋ mbo tiubale. Mandalemasa Mɛlɛkaa ndupilɛ kpe nɔlani mbo hiŋ a kɔlnyuloo, kɔlkɛndɔɔ, kɛndia diandaa, vɛlɛa yoomu fɛɛŋndo. Lelaŋ chɛlɔɔ Mɛlɛka chɛl dɛnɛwɔɔndo vɛlɛa nyɛpalaawo o choniŋ kpɛɛlaŋ le chuwɔɔ. Suŋsuŋ Mɛlɛka cho balaŋwou o sɔɔŋ wanachio niŋ a toosia nyɛm kɛɛkɔlhinia hoo kpou tɛɛmbuuwo okɔɔ.
Mandele Baabuiyo le dimi aa: “O palɛi masaa kaŋ niŋ [mandalemasala waŋchieyaa cho haulaŋ] Mɛlɛka cho choochoowo ocho masaleŋ kila [o choochoo niŋ] le tebuniŋ fɛɛŋ teleŋ. . . Lecho hunɔɔ pesi vɛlɛ mile chuu o mɛɛlulaŋ masɛi hee kpou [mandalemasalaŋ hau], vɛlɛ leŋ pila lecho isisi le teleŋ nɔpɛnguloo.” (Daniɛl 2:44) Dioyɔngoo o kpaayamandaa Jɛhowaa, di ndɔɔ le mandalemasaa, a masale choochoole ndɔleŋ okɔɔ ndu cho pɛɛku lebol Baabuiyo ni. Mɛɛ owa tɔmbɛ lebol “palɛi mɛɛlɛi” dimiolachi, mi Jisɔsi dimi aa “Yoongu kɛndɛ lemasaa hoo ocho dimiŋ o lɛŋnde chalaaleŋ niŋ fau le seileŋ o kaalaŋ lo kpou; vɛlɛ o koŋ mɛɛlulaŋ lacho hunɔɔ.”—Maatiu 24:14.
Lɔɔ mɛɛlulaŋ lacho hunɔɔwo, onɛɛ chiɛ pioŋɔɔ? Baabuiyo muli aa: “Wanaa sakpoa nda cho wa achal o lɛŋndeŋ choo ni, vɛlɛ wanaa nɔtɔɔyaalea nda cho lo lechoo ni. A wanaa dɛnɛwɔɔnda nda, a cho kiolɔŋ ma faŋaŋ o lɛŋnde kalaleŋ choo.” (Talelaŋ 2:21, 22) Wanaa sakpoa nda cho wanaa pɛɛku hɛnaŋ Jɛhowaa vɛlɛ ma tosa nduwa ni. Jisɔsi ndoo dimi aa: “Hoo simsɔngɔ yoomu fɛɛŋfɛɛndo ni, taa sɔla kɔlkaloo a num, Mɛlɛka tonyaa kpe o kɔɔpɛ, vɛlɛ a wana ŋ vem lachiwo, Jisɔsi Kraist.” (Jɔŋ 17:3) Lende, “chiendo cho hiowɔɔ fokpi. . . , kɛnduyɛ wana tosa hɛnaŋ Mɛlɛkaawo o cho lo lefafɛɛŋ.”—1 Jɔŋ 2:17.
Mɛɛ mbo chɔmnuŋ ocheleŋ, bolii Baabuiye fula o Muli Chieŋ Senɛi Yaula Diandaala suɛi mangalai waalio niŋ—A Tɛɛsialaŋ.