BUŊGƐI 4

Nɛɛ Cho yɛ Mɛlɛka?

MI WAŊNDA piɛi hau mɛlɛkaa yɛ yiaa. Kɛ Diom Mɛlɛkaa dimi maa Mɛlɛka tonyaa ndu pilɛ kpe cho ni. O nɔ velaŋ te, Mɛlɛka bɛndoo kpou o cho ni, nduyɛ o cho le fɛɛŋ a fɛɛŋ. Ndu toosiaa nyɛ o nyɛ fee o choo choo niŋ a o chieeŋndo choo ni, nduyɛ ndu ke naa yoomoo ni. Lelaŋ, ndu pilɛ kpe naŋ nɔ ni miŋ piɛi.

Muuse bii sawala tɔla Mɛlɛka ke ndu o poutaŋ choo laŋ — Mɛŋma nyɛ yoomaa cho le niŋ te waŋ o sindɔɔ niŋ a Yau Simbulaa a diola Mɛlɛkalaŋ lechoo

Mɛlɛka nɔ nɛila yɛ yɛla nda veelu ndu laŋ, kɛ diolaŋ la pilɛ kpe o nɔ ni, CHƐHOWA. Mi Mɛlɛka dimul Muuse aa, “Dimul Isɔluɛiya maa ya Mɛlɛka Yaawɛɛ, Mɛlɛka finyaa ndaa mamaa, Ebilaham, a Aase, a Chekɔpu, ya vem num naa nda chua ni. Diola nilaŋ la cho laŋ le fɛɛŋ a fɛɛŋ ni. Nduyɛ, chɔŋ niŋ a hau mbo kuɛ a lachi kɛ diolaŋ ndaŋ waŋnda wa ya niŋ veloo ni.” (Ɛsɔdɔɔ 3:15) Diolaŋ ndaŋ Chɛhowa la cho o Diom Mɛlɛkaa niŋ le 7,000. Mi Sam 83:18 dimi a Mɛlɛka okɔɔ aa, “Tosa ma sina maa num pilɛ kpe cho Mɛlɛka Yaawɛɛ ni, maa num cho Mɛlɛka hiou kpou wo ni.”

Mɛŋma nyɛ yoomaa cho leniŋ te waŋ o sindɔɔ niŋ a yau simbulaa a diola Mɛlɛka lechoo — Wana suaa le Mɛlɛka wo Muuse Mɛlɛka ndoo yɔŋgu sawalaŋ ni aa, “yooŋgu kiilaa Mɛlɛkaa hiŋndo”

Wana o wanachiee chi wɔ Mɛlɛka a lehɔl te. Mi Mɛlɛka dimul Muuse aa, “I cho tosa ma che ya hɔlla le, kani fuule, wana o wana, a chi ya hɔlla ma lo yoomu le.” (Ɛsɔdɔɔ 33:20) Choo choo Mɛlɛka cho i chali ni nduyɛ wanachiee nɔla ma che ndu a lehɔl te. O cho suɛi wɔɔŋ le miŋ piɛi o piɔmnda lo, fotueilaŋ, ɔɔ miŋ toosiaa nyɛ o nyɛ le ndu piɛiyo maa Mɛlɛka. Mi Chɛhowa dimul wana ndɔ suaa Muuse aa, “La toosiaa velaŋ nyɛ o nyɛ mi la sooluu ndu maa mɛlɛka nya le, nyɛm waa choo choo ni, nyɛm waa o chieeŋndo choo ni, nyɛm waa o mɛŋndaŋ bɛŋgu ni. La tunduŋ mɛlɛka o mɛlɛka cheleŋ o labɛŋgu niŋ le ndu sooluuwo le, kɛlɛŋgaa niŋ te, mi la saaŋgial ndu, kani fondole, ya Mɛlɛka Yaawɛɛ, Mɛlɛka nyaa, Mɛlɛka paŋalɛiyo ya I cho ni. Wanaa tul la leyɛ wa, wanaa kaŋ chuauwaa ndaa ni, a chuauwaa ndaa mamaa, nduyɛ a chuauwaa ndaa mamaa kaŋ chuauwaa ndaa mamaa, dɛnɛ palaa ya I tusi nda choo ni, le yɔŋ wɔɔŋ finyaa ndaa kaŋ a tosa koŋ ndo.” (Ɛsɔdɔɔ 20:2-5) Mɛɛ nyɔɔ viou tiŋ, Mi Mɛlɛka dimul wana ndɔ suaa Aisaya aa, “Ya cho Mɛlɛka Yaawɛɛ ni. Diola nilaŋ la cho laŋ ni. I piɔuwaŋ naŋɔɔ cho le ya wo a wana o wana le. Saŋgala waŋnda chieeya a nɔ ma ke ya wo, I chɛl, ma ke mɛlɛkaa cheleŋnda saŋgala koŋ te.”—Aisaya 42:8.

Waŋnda apum laalaŋ o Mɛlɛka niŋ, kɛ ma yiyaŋ maa wana nɔla ma sina Mɛlɛka le nduyɛ wana nɔla ndu sɔɔŋguu ikɛi kpɛɛluŋ te. Wana ŋ nɔ ma nɔ siooŋnde le ndu wo Mɛlɛka cho ni kɛ wana nɔla ma kaala ndu le. Vɛɛ num yiyaŋ yɛ? Baa Mɛlɛka buulaŋ pa a num? Baa a nɔla pa ma sina ndu nduyɛ ma sɔɔŋguu ndu ikɛi kpɛɛluŋ? Ŋ tofawɔ mɛɛ Diom Mɛlɛkaa dimi a suiliŋnda Mɛlɛkalaŋ okɔɔ yɛ.

Nyina Diandaa Mɛlɛkaa a Maalikɛiyaa Nduaa

Vɛɛ Mɛlɛka tosa yɛ mi hɛnaŋ ndɔɔ yɔŋnuŋ? Nɛiyo opilɛ o tosa heiyo cho nyina ndɔ diandaa soliŋndo kpeku ni. Nyina Mɛlɛkaa cho wanachiee yoomaa ɔɔ maalikɛinɔ le. Kɛ nyɛ o nyɛ o yeema pɛ le tosaa, kpaaya ndɔ nɔ lamɛɛlu le wo, o wana chiee chi hoo a lehɔl te wo, ndu o soliŋ kpeku ni. Kpaaya koŋ Mɛlɛka soliŋ kpeku ni mbo toosiaa choo choo a lɛŋndeŋ. “A diomndo Mɛlɛka Yaawɛɛ toosiaa halaa ni, a diomnde fula ndu o sondo leŋ o toosiaa paaleŋ a paŋgei a looŋ ni.” (Sam 33:6) Chɛnɛsee 1:2 tɛɛsiaa maa mɛɛ chieeŋndo wa o kumbaa kpou a mɛŋndaŋ, nduyɛ mi Mɛlɛka wa wɔ chieeŋndo toosiaa le mi waŋchieeya wa achal lechoo, “nyina Mɛlɛkaa o wa balɔɔ o mɛŋndaŋ choo.” Mi Mɛlɛka soliŋ nyina ndɔ diandaa kpeku le toosiaa nyɛ o nyɛ yoomaa cho o chieeŋndo choo.

Mɛlɛka soliŋ vɛlɛ maalikɛiya kpeku le hɛnaŋ ndɔɔ tosaa. Mɛlɛka toosiaa nda le ma wa choo choo a ndu latulu. Maalikɛiya nɔ bɔɔ kpaayaa. Maalikɛiya dimi yooŋgula chaŋ o Mɛlɛka lo laŋ, nduyɛ ma tosa vɛlɛ walta kɛndɛla cheleŋ. Le tamaseliiyo, mi Diom Mɛlɛkaa dimi a Sawala Mɛlɛka ke wana ndɔ suaa Muuse wo aa, “yooŋgu kiilaa Mɛlɛkaa hiŋndo.” Maalikɛiyaa Mɛlɛkaa mala vɛlɛ wanaa cho Mɛlɛka piɛiyo o chieeŋndo choo wa. Nduyɛ Diom Mɛlɛkaa dimi pɛɛŋ a maalikɛiya okɔɔ aa, “Kiilaa Mɛlɛkaa nda nda cho machuaa nyinaa a tosa wallo le Mɛlɛka wa. Nda Mɛlɛka viam ni le wanaa sɔla pioŋɔɔ wa malaa.”—Hibuluiya 1:14; 2:2.