Nyɛ Naŋ Pɛɛku Mɛsaya o Ba Wo, Wana Cho Simlachinɔɔ Wo

MI MƐLƐKA dimi maa o cho Mɛsaya iso yulɔɔ le mbo wa Simlachinɔɔ le waŋnda kpou. Mɛlɛka sina simlachinɔ kpeekpei naŋ yeema wo nduyɛ mbo hɛli Simlachinɔ hiou bɛnda kpou wo. Simlachinɔ suu kuɛɛ Mɛsaya simnuŋ yɛ? Baa wana kpaaya bɛndoo waŋnda choo? Baa wana chaa sɔɔŋ yalale chieeŋndeŋ ndo? Baa wana ndoo nɔ kɔl kalu iwana chieeyaa tau wo? A mɛɛ Diom Mɛlɛkaa dimi yɛ, wana teŋgeŋ ndoo suaa le Mɛlɛka wo, Chiisu Kiliti, Mɛsaya wa ni.—Maatiu 23:​10.

Mi Mɛlɛka tosa a sabu ma vialu Chiisu, ndoo nɔ haki le. Le handɔɔ lechoo, mi Chiisu simul kindiŋ kɛ kɛ Setana wa le ndu lueiyo o hakioo niŋ. O nyɛ Chiisu tosa wo a nyɛ o dimi wo niŋ, mbo tual tamasi Mɛlɛkaa kɔɔli a mɛɛ o soliŋ kpaaya Mɛlɛkaa, sandii Mɛlɛkɛi, taasi Mɛlɛkaa, vɛlɛ a kaala Mɛlɛkaa kpeku yɛ. Ŋ yaasiaŋndɔ nyɛ naŋ pɛɛku o tamasi Chiisoo niŋndo.

Mi Chiisu soliŋ kpaaya Mɛlɛka ke ndu wo kpeku le waŋnda malaa. Chiisu ndoo buulaŋ bɔɔ le waŋchieeya nduyɛ, mbo soliŋ kpaaya ndɔɔ kpeku mbo ke nda nyɛ ndaa yeema wo. Mbo dimi aa, “Nyiɛɛye cho ya le faŋgaa hoo. . . . Nyɛ diaa bɛɛ a nɔ lɛ le.” (Maki 8:​2) Okoŋ, mi Chiisu tosa kaamaa mbo ke faŋga bɛndu hiŋ ndu nilaŋ yaŋɔɔ wo nyɛdiaa.

Mi Chiisu balu waŋnda pɛɛkoo ba o ba fee nduyɛ “mbo siŋgi wanaa wa a naala ŋkɔŋnjalaŋ nda a wanaa wa a naala yɔŋaa laŋ nda.” (Maatiu 4:​23) O kpeekpei niŋ, mi faŋga bɛndoo tual Chiisu kɔɔli. Nduyɛ, “kpaayaa wa chɔnɔŋndo Chiisu o ŋdial mbo siŋgi waŋnda. Le hei, faŋgaa kpede a wa kindioo le ndu pilaŋndo.” (Luku 6:​19) Lekɛndɛi, Chiisu “hiŋ le mi wana saaŋgial ndu le, kɛ le mbo saaŋgial waŋnda, o koŋ kɔɔli, mbo yɔŋgu yoomu ndɔɔ le wanaa faŋga faŋga baŋaa.” (Maatiu 20:​28)a Waŋchieeyaa simlachiaa kuɛɛ chɔm yɛ sala soliaŋ suu waa naa?

Mɛlɛka o vel ni le sandei chɔmndo. Sawala Mɛlɛkalaŋ Chiisu tol kɔɔli ni nduyɛ mbo tosa nyɛ o nyɛ a mɛɛ sawalaŋ ndaŋ la dimi yɛ. A mɛɛ i dimiŋ o Diom Mɛlɛkaa niŋ yɛ aa, “Oo Mɛlɛka nuu, I hini bɔɔ kɔl le nyɛ ŋ hɛnaŋndo tosaa. I kɛsiŋ sawala numndaŋ o kɔl.” (Sam 40:​8) Mi Chiisu chua wana sulaa ni, wana bala fondo ni, wana pɔnɔ ni, wanalanɔ ni, chuaambɔ ni, kaasoŋnɔ ni, wanaa sɔvɛ. Mbo ke nda bɛɛleŋ, nduyɛ o hɛli wana o wana le, mɛɛ Mɛlɛka bɛɛ cho yɛ. Teleŋ pilɛ, mi buɛiyaa Chiisuaa kuuna kalaŋ chuauwaa wa hunɔɔ a chuaambuaa ndaa naa Chiisu cha wa. Kɛ mi Chiisu dimul nda aa, “La mal chuaambuaa ma hiŋ naa ya chua. La kuuna nda le. Kani fondole, le haa ndoo masale Mɛlɛkaleŋ le cho ni.”—Maki 10:​14.

Taasi Mɛlɛkaa Chiisu tol kɔɔli ni. Chiisu ndoo sina bɔɔ yiyaŋnda waŋnda. Lelaŋ Diom Mɛlɛkaa dimi ni aa, “Ndu pila sina yiyaŋnda ndalaŋ.” (Chɔŋ 2:​25) Mɛɛ yaamɔɔwaa Chiisuaa vem waŋnda le ma kɔ bii ndu, mi wanaa kuɛ le ndu biyɔɔ wa dimi aa, “Diomnda fula po koŋ o sondo laŋ, kani bɛɛ ŋ tuii yɔ laŋ wana o wana cheleŋ o sondo le.” Kuɛɛ Chiisu ndoo sɔla yɛ taasioo hoo? Mbo dimi aa, “Mɛlɛka o vem ya wo, o ndu lo pɛɛku ya I pɛɛku waŋnda wo o chɛŋ ni. O cho pɛɛku ni ya pila le.”—Chɔŋ 7:​16, 46.

Mi Chiisu chɔm kaala iMɛlɛkayaa. Chiisu ndoo nɔ vɛlɛ nyiɛɛye le waŋchieeya. Mi po ndoo nɔ “naa wɔɔŋ pum o tiuwaa ndu lekɔɔ silɔ” wo nyɔɔlu Chiisu aa, “Fallo, siŋgi ya fɔ, mi simnuŋ o diandaa Mɛlɛka o hɔl. A nɔla ma siŋgi ya, te o wa pɛ ma chɛl.” Mi nyiɛɛye bii Chiisu tau le poo hoo okoŋ, mi Chiisu “siɛndi ba ndɔɔ mbo pilaŋ poo hoo. Mbo dimul ndu aa, “I chɛl mi siŋgi num. Lelaŋ, sioŋgu ma simnuŋ vɛlɛ o diandaa.” Mi naa wɔɔŋ koŋ faŋaŋ poo hoo lekɔɔ o le pilɛ niŋ kpe.” (Luku 5:​12, 13; Maki 1:​41, 42) Chiisu wa bɔɔ a yeemɛi le po tambɛi koŋ solioo o nyɛkindilaa koŋ bɛŋgu.

Baa num bɛɛ Chiisu buulaŋ a num? Mi Chiisu pila muli aa, “Wana o wana cho o yɔkpaa a nyɛ palaa, la huŋ naa ya chua. I nɔla mi soli nya o dɛnɛla palaalaŋ niŋ. La simnuŋ buɛiyaa ni, mi la sɔla pɛɛkoo ya o ba bɛŋgu. Kani fondole, I cho wana chaa ŋwaŋnda chiee biyɔɔ. Nduyɛ wana tusiaŋndo ya cho ni. Nduyɛ, la nɔla mi la sɔla pɛŋgioo o kɔlta nyalaŋ niŋ.”—Maatiu 11:​28, 29.

Chiisu cho Simlachinɔ kɛndɛ naŋ sɔla mbo hiau kpou wo ni. Lelaŋ o dɛɛniaa naa ni aa, “la sɔla pɛɛkoo ya o ba bɛŋgu.” Baa a cho pa veelu kɔl dɛɛniaa hoo chɛlɔɔ? Te a tosa hei pɛ, o chuu num yoomu nyaaloo.