Walta Yɛɛ la Tosaŋ yɛ o Lɛuwuŋ Seiyaa Chɛhowaa?

Yuŋgoo Bɛtɛl tosa walta faŋga faŋga. Le mi wali dimiaa yooŋgu kɛndɔɔ hiou lachi o lɛŋii bɔɔbɔɔ niŋ nda tosa waltaŋ ndaŋ ni. Mi apum hivi yaulaŋ o sɔɔŋ maŋgalaŋ yɛ yiɔŋ niŋ. Apum, yaulaŋ toosiaa. Apum, boolaŋ holioo o yaula bɛndulaŋ kɔɔ. Apum, yaulaŋ kɛsioo kpɛ kpɛ o chiɛi kɛsiaa layauwo niŋ. Apum, diomndaŋ chuaa, te koŋ te, kasɛtiila vidueilaŋ toosiaa. Ma tosa vɛlɛ sɔɔŋ cheleŋ tau le buŋgɛi nda cho niŋnde.

Kunda Cho Lɛuve Chilaŋndo. O lɛuvii kɛ kɛ fee niŋ, Dialii Kuumbaŋ Choo Ve yulu ŋwaŋ iso choo le chilaŋ chuaa. Wanaa chua haa chilaŋnda a yaa wa ni. Lepum ma hiou a yaa choo. Kundaa hoo dimul Dialii Kuumbaŋ Choo Ve ni a mɛɛ wallo cho kɔlaŋ o lɛŋii cho nda o babɛŋgu ve niŋ yɛ. Nduyɛ, nda koni chɔm vɛlɛ bahawɛila cho loŋndaŋ ni. Konaa hoo mala Dialii Kuumbaŋ Cho Ve, le ma kɛɛsiaa sɔɔŋ lebol bɛnda le ma poonyiaa o yaula nda nɔ le toosiaa o chilaŋ niŋndaŋ. Hei mala nda vɛlɛ ma toosiaa sɔɔŋ yɔŋguŋ o bɔŋaŋnda naalaŋ o lɔɔ bɛŋgulaŋ vɛlɛ a bɔŋaŋnda bɛndaŋ. Dialii Kuumbaŋ Choo Ve nɔ vɛlɛ wanaa i viam hɔlte ndɔ o lɛuwoŋnda. Lɛuvii o lɛuvii nda kuɛ yilɔɔ pɛ, a ke Kunda Cho Lɛuve Chilaŋndo nɛi chɔmaa le mɛɛ nda looku ma chaa wali ndaa tosa yɛ. (Pulɔwaa 11:14) Mi dialle hei kɛɛsiaa vɛlɛ le mi waŋnda haa yɔŋgu suɛi le wanaa cho o lɛuvii keŋ bɛŋgu wa kpou.

Mi malaa yɔŋguŋ o kundala leKilisiɔŋndaŋ niŋ. Kunda cho lɛuve chilaŋndo chɛl ni le mi kundala leKilisiɔŋnda sɛnɛilaŋ la kilaŋ. Ma yɔŋgu vɛlɛ nɛi chɔmaa le kɔɔfaa pilichiaa, wanaa kua o lɛŋii cheleŋ niŋ le yooŋgu kɛndɔɔ dimioo wa, vɛlɛ a buɛiyaa ibuŋgaa kei yilɔɔ o buŋgɛi keŋ niŋnda. Nda kɛɛsiaa le bɔŋaŋ­nda bɛndaŋ ni. Nda ko kɛɛsiaa ni le Toŋgola leMasalaŋ taŋgullo, nduyɛ ma tosa vɛlɛ a sabu mi kunda leKilisiɔŋ kɛ kɛ fee sɔla yaulaŋ. Wali o wali tosaŋ o lɛuve, le wali dimiaa yooŋgu kɛndɔɔ hivioo lachi o tosaŋ ni.—Kɔliŋtiaŋ Tasoo 14:33, 40

• Vɛɛ kunda cho lɛuve chilaŋndo mala yɛ Dialii Kuumbaŋ Choo Ve?

• Walta yɛɛ kunda cho lɛuve chilaŋndo cho yɛ hɔlteŋ choo?