Yɛɛ Cho Yɛ Tuu Mɛlɛkaa le Chieeŋndo?

1. Le yɛɛ Mɛlɛka toosiaa yɛ chieeŋndo?

Le waŋchieeya Mɛlɛka toosiaa chieeŋndo ni. Chiee naa o cho ni. Lelaŋ, lɛŋ naŋ Mɛlɛka toosiaa Adam nda Ifi ni. Lɛŋ naŋ koni o dimul nda ni maa a violu ma kuii, o cho o choo choo niŋ te. Mɛlɛka ndoo chii niŋ maalikɛiya toosiaa o choo choo niŋ. (Choobu 38:4, 7) Le hei, mi Mɛlɛka chua wana pɔnɔ tase o toosiaa wo mbo kɛsi ndu o kpele hɛnɛkiɔɔ niŋ. Fonda koŋ diolaŋ aa Idɛŋ. (Chɛnɛsee 2:​5-17) Mi Chɛhowa ke ndu dioo le mi ndu a chuauwaa o nɔ le violɔɔ o chilaŋ niŋnda tuei yoomu nɔ lamɛɛlu le wo yeela o lɛŋndeŋ choo.​—Nuawɔ Chɔŋ Tasoo 2:17; Walta Wanaa Chiisuaa 17:26.

O kandɔŋndo, Idɛŋ kinɛi kpele hɛnɛkiɔɔ wa o lɛŋndeŋ choo ni. Adam nda Ifi vɛlɛ a chuauwaa ndaa, aa nɔ ma velu ma pei chieeŋndo cha. Okoŋ kɔɔli, mi chieeŋndo kpou ndoo wa nda o babɛŋgu, nduyɛ mi ndaa siiŋguu ndu kpele hɛnɛkiɔɔ. (Chɛnɛsee 1:28) Fɛɛŋ fɛɛŋ bɛɛ chieeŋndo hoo ndu tembu niŋ te. Le waŋchieeya o cho lɔɔlɔɔ ni.​—Nuawɔ Sam 104:​5.

Tofa vidueiyo Le Yɛɛ Mɛlɛka Toosiaa yɛ Chieeŋndo?

2. Le yɛɛ chieeŋndo cho lɛ kpele hɛnɛkɛ le?

Adam nda Ifi tuii Mɛlɛka diom te, nyɛ koŋ Chɛhowa tou nda o kpele hɛnɛkiɔɔ niŋ ni. Chɔŋ a boondii keŋ mi kpele hɛnɛkiɔɔ hialuŋ nda. Nduyɛ wana o wana tiu wɔ ba le mbo miŋgi ndu toosiaa le. Chɔŋ niŋ a boondii keŋ mbo huŋ bii a hau, Baabuiyo dimi aa, “Mɛlɛka bii mbo mal wanaa dɛnɛ wɔɔŋnda chieeŋndo o ba.”​—Choobu 9:24. Nuawɔ Gɛnɛsi 3:23, 24.

Baa Chɛhowa puɛɛnuŋ pa a tuu ndɔ tasoo le waŋchieeya? Sako. Mɛlɛka nɔ kpaayaa kpou wo o cho ni. O dimi lachoo le. (Aisaya 45:​18) O cho hunɔɔ waŋchieeya miŋgi mɛɛ ndoo yeema nda ma wa yɛ.​—Nuawɔ Sam 37:11, 34.

3. Vɛɛ Kpele Hɛnɛkiɔɔ looku yɛ niŋ miiŋgu?

Kpele Hɛnɛkiɔɔ cho hunɔɔ miiŋgu pila o lɛŋndeŋ choo. Hei yɔŋnuŋ niŋ teleŋ Chiisu cho kandɔɔ masaleŋ o lɛŋndeŋ choo wo. Chiisu a maalikɛiyaa nduaa huŋ niŋ a chɔuwo ma tɛɛmbuu wanaa simul Mɛlɛka wa kpou. Baabuiyo veelu chɔuwo hoo aa Amakɛdɔŋ. Okoŋ, mi Chiisu bii Setana mbo dɔu ndu o chiɛi manyumndo niŋ le wɔsilaŋ 1,000. Wanaa Mɛlɛkaa nda sɔla niŋ tambei le, kanifuule Chiisu cho nda manda. A tuɛi niŋ yoomoo yeela lefafɛɛŋ o ­Kpele ­Hɛnɛkiɔɔ niŋ o lɛŋndeŋ choo.​—Nuawɔ Sɔɔŋ Chɔɔmaŋndoŋ 20:1-3; 21:3, 4.

4. Teleŋ kuɛɛ nyɛpalaa chuu yɛ niŋ?

Teleŋ kuɛɛ Mɛlɛka chii yɛ niŋ dɛnɛ wɔɔŋndo o lɛŋndeŋ choo? Mi Chiisu chɔm “taamasi” wa niŋ yɔŋnɔŋndo suŋ suŋndo. Taamasi koŋ cho chɔm ni maa mɛɛlula chieeŋndo hoo cho niŋ kpɛɛluŋ. Nyɛm cho hau yɔŋnɔŋndo miŋ wa wanachioo kindilaa woŋ chɔm maa, “chieeŋndo hoo fuuluu niŋ o mɛɛlulaŋ.”​—Nuawɔ Maatiu 24:3, 7-14, 21, 22.

Chiisu wa niŋ masaa le wɔsilaŋ 1,000 o choo choo niŋ vɛlɛ a o lɛŋndeŋ choo. O teleŋ koŋ niŋ, o cho nyɛpalaa kpou chii o lɛŋndeŋ choo. (Aisaya 9:6, 7; 11:⁠9) O fula wɔ okoŋ kɔɔli, Chiisu wa niŋ vɛlɛ Masa Wanaa Soliaa Lasalaa ni. Nduyɛ mbo soli wanaa kaala Mɛlɛka wa o hakioo niŋ. Chiisu Mɛlɛka soliŋ niŋ kpeku le naalaŋ, yuuwɛi, vɛlɛ a piɔmndo chiiyo ni.​—Nuawɔ Aisaya 25:8; 33:​24.

5. Nɛɛ yaa wa yɛ niŋ o Kpele Hɛnɛkiɔɔ niŋ?

Wanaa cho hɛnaŋ Mɛlɛkaa tosaa wa wa niŋ o Kpele Hɛnɛkiɔɔ niŋ ni. (Chɔŋ Tasoo 2:17) Mi Chiisu viam buɛiyaa nduaa le ma kɔ nuuviaa wanaa tusiaŋnda. Okoŋ, ma pɛɛku nda mɛɛ nda looku ma simnuŋ wanaa kɛndɛ Mɛlɛka o hɔl lɛ. Hau bɛɛ, Chɛhowa cho waŋnda pɛɛkoo o miiliɔŋndaŋ niŋ le chilaŋ. Le ma huŋ wa achal o Kpele Hɛnɛkiɔɔ niŋ o lɛŋndeŋ choo. (Sɛfanaya 2:​3) O Toŋgo leMasa Seiyaa Chɛhowaa, waŋpiaanduaa pɛɛku le simnɔŋndo piaanduaa kɛndɛ. A pɛɛku vɛlɛ le simnɔŋndo finyaa kɛndɛ. Waŋlaanduaa bɛɛ pɛɛku le simnɔŋndo laandaa kɛndɛ. A pɛɛku vɛlɛ le simnɔŋndo kalaa kɛndɛ. Chuauwa a wanaa velu nda wa pɛɛku diompilɛ a Mɛlɛka okɔɔ. Hei tosaa mala nda ma sɔla tɔnɔ yooŋgu kɛndɔɔ.​—Nuawɔ Makal 4:​1-4.