La Malnaŋ Te

Chɛhowa yeema miŋ “kaala sandei.” (Makal 6:​8) Hei cho suɛi sɔvɛ o bii fau o nɔ nyaa niŋ. Kanifule, te sandei ve o nɔɔ niŋ te, laalaŋ bɛɛ ve le. Nduyɛ laalaŋndo kpeekpei tosa ni mi kaalaa hiou lachi.

Hau sandii cho o nɔɔ niŋ te. Le nɔ numndo kiindiaa, a nɔ kuee ma nɔ kɔllo sikpa le sɔɔŋ ŋ muuŋ tosaa.

1 NƆ NUMNDO WA NYƐ TASE NUM O HƆL

NYƐ BAABUIYO DIMI WO: “Hɛli suɛi hiou bɛnda kpou le tosaa ve.” (Filipiaŋnda 1:10) Nɔ numndo cho nyɛ sɔviɔɔ o pilɛ o yoomu numndo niŋ ni. Chua ndu maa nyɛ tase.

Chɛhowa yeema num ma muli hɔlla o wana nya cho o nɔɔ niŋndo lo, nduyɛ mila “tuei yoomoo yeela” diompilɛ. (Ikilisiaatii 9:​9) O dimi ndi walaŋ maa a nɔ ma buulaŋ le wana nya cho o nɔɔ niŋndo, nduyɛ mi la nuuviaa nɛilaŋ le mi nyaaloo wa nya tɛɛŋ. (1 Kɔliŋtiaŋ 10:24) Tosa mi wana nya cho o nɔɔ niŋndo sina maa a yeema ndu, nduyɛ maa a hini kɔl a ndu.

NYƐ Ŋ NƆ MA TOSA WO:

• Chua teleŋndo le waa diompilɛ lɔɔlɔɔ. Yɔŋgu hɔlaa muliaa o wana nya cho o nɔɔ niŋndo lo

• Yiyaŋ le nya “ŋiɔɔŋ” o cho le “numpilɛ” le

2 MANDA KƆL NUMNDO

NYƐ BAABUIYO DIMI WO: “Wana o wana tofa wana lanɔɔ pɛ, mbo lo o koŋ kɔɔli, ma del kɔl le hinilaŋ a ndu pɛ, mɛɛ sava dimi maa wana suunda a lanɔ pila le wo, mɛɛ a chii ndu tɛɛmbuu o kɔl niŋ.” (Maatiu 5:28) Te waŋndo lambaŋ pɛ yiyaŋndo a sɔɔŋ nɔɔlɛiyoŋ okɔɔ, mɛɛ ŋ dimi maa o sendu a wana nda cho o nɔɔ niŋndo le.

Chɛhowa dimi maa a nɔ ma “manda kɔl numndo.” (Pɔlɔwaa 4:23; Chɛluimaya 17:9) Le hei tosaa, a nɔ kuee vɛlɛ ma manda hɔlta numndaŋ. (Maatiu 5:29, 30) Tol tamasi Choobu wo kɔɔli. Mbo yii kpemaa a hɔlta ndɔlaŋ maa pesiŋ bɛɛ o tofa wanalanɔ cheleŋ mbo nɔ yeemɛi suundɛiye le. (Choobu 31:1) Lelaŋ, kindiŋ kpoke le ma kɛɛ wunduma tumfonduaŋ nuaa. Nduyɛ, kindiŋ vɛlɛ o nɛi o nɛi niŋ le ma faŋaŋ itɛsɛtɛsɛi nya wana nya cho o nɔ niŋ te wo.

NYƐ Ŋ NƆ MA TOSA WO

• Tosa mi acheleŋnda sina maa a sandu a wana nya cho o nɔɔ niŋndo

• Yiyaŋ a yeemɛi wana nya cho o nɔɔ niŋndo, nduyɛ ma kelu chaŋyɛi kɛ kɛ tɛɛmbuu ndu kɔl