BUŊGƐI ŊUƐƐNUEI

La Miiŋgu “Mi La Tol Wana Manda Nya wo Kɔɔli”

A tiu pa ba ma chɔm simultaŋ opilɛ ɔɔ tau, la naŋ yaasiaa o yauwo hoo niŋndaŋ? Te o wa lende pɛ, mɛɛ a sim o nɛi kɛndɔɔ choo. Buɛiyaa laalaŋaa Mɛlɛkaa a bɔɔbɔɔ o sindɔɔ niŋ, a o teleŋ naa hoo niŋ, chɔulaba niŋ simulta waa naa. Mɛɛ Chɛhowa mala nda le simultaŋ ndaŋ chɔulabaa yɛ, lende koni o cho num mala ni.

Chɛhowa cho wa a num latulu te a miiŋgu pɛ ndu o ibuŋ

KƐSIŊ O KƆL maa Chɛhowa cho wa a num latulu te a miiŋgu pɛ ndu o ibuŋ. O cho num mala le buulaŋndo chɔulabaa, suɛi waŋndo tɛɛmbuu num kɔlle soliŋndo o kɔl, nduyɛ ma sɔla kɔlnyulu kpeekpeiyo o yoomu numndo niŋ le mɛɛ kɔl num iyamaa cho walaŋ yɛ. Okoŋ, a cho vɛlɛ wa a yeemɛi le Chɛhowa piɛiyo latulu nya chaaŋaa numaa laalaŋnda. Nyɛ yɔŋnuŋ numndo cho wa mɛɛ nyɛ yɔŋnuŋ Kilisiɔŋnda apum o wɔsiŋ kɛmɛ tasoŋ niŋndo yɛ. Mi kiilanɔɔ Pitɛ poonyiaa a nda okɔɔ aa, “Mɛɛ saa o laasiaŋ nuaa yondoo niŋ yɛ, lende nya wa a laasiaŋnda ni. Kɛ pɛŋgoo hoo niŋ Mɛlɛka miiŋgu a nya le mi la tol wana manda nya wo kɔɔli, mɛɛ waŋndo o manda nuaa saa nduaa yɛ. Ndu cho wana manda nya wo ni.”—Pitɛ Tasoo 2:25.

Chɛhowa miiŋgoo o ibuŋ cho nyɛ sɔvɛ ŋ nɔ ma tosa wo ni. Le sabu yɛɛ? Koŋ tosa mi Chɛhowa dɔunuŋ nyaale. (Pulɔwaa 27:11) A mɛɛ numpila sina yɛ, mi kaala naala wɔɔŋndaŋ la tɛɛmbuu Chɛhowa kɔllo. Kɛ o wa bɛɛ lende, Chɛhowa beŋ naa le miŋ kaala ndu nduyɛ miŋ piɛi ndu le. (Ditɔnɔmii 30:19, 20) Mi wana pɛɛkaa Baabui pilɛ dimi aa, “Nyɛ o nyɛ cho miŋ saa le kɔl wanachioo kumbioo mɛɛ naŋ kumbi dioo yɛ le. Mɛɛ mi ndupila dimul num nyɛ cho ndu o kɔllo.” Te ŋ chɛl pɛ le Chɛhowa piɛiyo a kɔl naa kpou, mɛɛ ŋ chɛl le dio cho koŋ o kindaa wo kumbioo. Te ŋ lo pɛ o pimbi naa simiaa choo, mɛɛ nyɛ sɔviɔɔ pila naŋ ke koŋ Chɛhowa ni, nduyɛ, hei tosa mbo dɔuŋ nyaale tau. O kpeekpei niŋ, nyaale naŋ sɔla o Chɛhowa piɛiyo niŋndo a mɛɛ o yeema yɛ, ŋ tuu ndu a nyɛ o nyɛ le.—Walta Wanaa Chiisuaa 20:35; Sɔɔŋ Chɔɔmaŋndoŋ 4:11.

A cho ndepilɛnɔ Kilisiɔŋnɔ vi dialloŋ o Mɛlɛka piɛiyo niŋndo demullo o kundaa niŋ a dialuŋ fulaa

Le handɔɔ lechoo, te a kandu pɛ vɛlɛ hunɔɔ o bɔŋaŋnda leKilisiɔŋndaŋ, yeemɛi numnde cho peelɔŋ o Mɛlɛka piɛiyo niŋ. (Maatiu 5:3) O nɛi kuɛɛ niŋ? Waŋnda chieeŋndo balɔɔ silɔ cho a kɔndɔfillo hoo, ‘Le sabu yɛɛ naŋ cho yɛ naŋ?’ A yeema mulilaŋ sinaa le nyunala cho a sabu yoomoo okɔɔ wo. Waŋchieeya yeema nyunalaŋ ndaŋ sinaa kanifuule, a yeemɛi keŋ Chɛhowa toosiaa nda ni. O toosiaa naa le miŋ wa a nyaale o ndu piɛiyo niŋ. Nyaale o nyaale cho mbo hiou sinaa maa ŋ cho Chɛhowa piɛiyo le mɛɛ naŋ kaalaa ndu yɛ le.—Sam 63:1-5.

A yandii, kɛsiŋ o kɔl maa Chɛhowa yeema num ma miiŋgu ndu o ibuŋ. Vɛɛ ŋ looku yɛ hei sina? Yiyaŋndɔ. A piɛi fɛŋ o Chɛhowa lo le yauwo hoo toosiaa nyɛkɛndɛi. Naapum bɛndu kundaa ɔɔ chaaŋ num laalaŋndo chɔm num ndu ni. Okoŋ, ma kandu diomndaŋ veeloo leniŋ, nduyɛ ma tual sila cho leniŋndo kɔɔli. Muŋ kpou chɔm ni maa Chɛhowa puɛɛnuŋ a num te. O kpeekpei niŋ, Chɛhowa cho num dɛɛniaa le ma miiŋgu ndu o ibuŋ.—Chɔŋ 6:44.

Ŋ sɔla kɔl dɛɛniaa le sinaa maa, fɛɛŋ fɛɛŋ bɛɛ Chɛhowa puɛɛnuŋ a buɛiyaa nduaa laasiaŋnda le. Lelaŋ ndepilɛnɔɔ hoo diolaŋ Dani dimi ni aa, “I lo dialoŋ wuoo nyɛɛmbɔ nyɛɛmbɔ mi fulaŋ o tonyaa niŋ. Kɛ lɔɔlɔɔ I wa yiyaŋndo o diomnda dimiŋ o Sam 139:23, 24 niŋndaŋ choo. Loŋ o dimi ni aa, “Mɛlɛka, mɛɛndaŋ o kɔl nuu niŋ ma sina nyɛ cho ya o kɔl lo. Ke ya tofaa ma sina yiyaŋnda nilaŋ. Mɛɛndaŋ ya ma sina, te balaŋ la cho ya o yɔŋ wɔɔŋndo niŋ pɛ. Chɔm ya nɛi ya I kua choo wo, o ke wana yoomu kpeekpeiyo, o nɔ la mɛɛlu le wo.” Mi sina maa o cho le chieeŋndo hoo le ya cho le. I nɔla mi wa le chieeŋndo hoo le. Nduyɛ, mi sina maa o kɔɔna Chɛhowaa niŋ ya nɔ ni mi wa. Mi kandu sinaa maa Chɛhowa puɛɛnuŋ a ya kposoŋ te. Nyɛ yaa nɔ mi tosa kinɛiyo cho miiŋgoo ndu o ibuŋ ni. Nduyɛ, I cho bɔɔ a kɔl kɛndɛ le mɛɛ ya tosa lende yɛ!”

“Mi kandu sinaa maa Chɛhowa puɛɛnuŋ a ya kposoŋ te. Nyɛ yaa nɔ mi tosa kinɛiyo cho miiŋgoo ndu o ibuŋ ni”

Ŋ cho piɛileŋ a kɔl naa kpou maa num bɛɛ cho vɛlɛ “kɔl nyulu Mɛlɛka Yaawɛɛ” wo tueiyɔɔ yeela. (Nɛhimaya 8:10) Te a miiŋgu pɛ Chɛhowa o ibuŋ, a tembu niŋ kɔl kposoŋ te.

Nyunalaŋ A Mulila Cho le Miiŋgoo Chɛhowa o Ibuŋndo

KUƐƐ YA NƆ YƐ MI KANDU?

Wana fula hoo o naa ŋdiallo niŋndo kendu ko wali o wa tosaa paandu wo o lepilɛ niŋ kpe le. Num bɛɛ, te a yeema pɛ yoomuaŋ sɔlaa maa Kilisiɔŋnɔ, mɛɛ ma kindiŋ le pɛɛkoo a Mɛlɛka okɔɔ o pɔm pɔmbɔ. Yiyaŋ naa maa mɛɛ ma tosa nyɛ o nyɛ fee o lepilɛ niŋ kpe le. Naapum a chua teleŋ pɔmbɔ le nuaa o Baabuiyo niŋ ɔɔ ma yaŋ nilaŋ o diomnda veelaa Baabui nda chua o kasɛtiiyo choo wo. A pɛɛku yaula naalaŋ opilɛ, a tofa Tɛɛŋgii nɛi jw.org ɔɔ tofa suɛi ipilɛ o jw.org. Duaŋ tamala le hunɔɔ o bɔŋaŋ naa leKilisiɔŋndo le. Nyɛ hiou kpou wo cho ni, nyuna Chɛhowa o piɛilɛŋ niŋ le num malaa. Baabuiyo dimi aa, “Buulaŋ o buulaŋ nya nɔ kpou, la nyindu o Mɛlɛka lo. Kani fuule ndu manda nya ni.”—Pitɛ Tasoo 5:7.

“Mɛɛ ya vi ŋdial o Chɛhowa piɛiyo niŋ, mi bumba piɛileŋ o ndulo a siɔmbula wa ya laŋ. Teleŋ ya sɔla yoomuaŋ le piɛileŋ o Chɛhowa lo wo, mi bɛndu kundaa huŋ ya yilɔɔ. Mbo mala ya le sinaa maa Chɛhowa puɛɛnuŋ a ya le. Mbo kɛɛsialla maa I kandu diomndaŋ veeloo lepaa o lepaa o Baabuiyo niŋ. Mɛɛ ya tosa lende, mi sɔla yoomuaŋ vɛlɛ le kɔlaŋ o bɔŋaŋnda naalaŋ. Nduyɛ, mi kandu vɛlɛ kɔlaŋ o wali pollo niŋ. I cho bɔɔ a kɔl kɛndɛ le mɛɛ Chɛhowa puɛɛnuŋ a ya le yɛ.”—Ɛva.

VƐƐ NDA CHO YA BIIYƆƆ O KUNDAA NIŊ?

Kɛsiŋ o kɔl maa wanaa cho o kundaa niŋnda cho num demul a kɔl kɛndɔɔ. A cho num pɛɛsa ɔɔ ma kelu num iyama le. Kɛ a cho num chɔm maa a kaala num nduyɛ ma tosa nyɛ o nyɛ fee nda tiuba le num kɔllo dɛɛniaa.—Hibuluiya 10:24, 25.

“Siɔmbulaŋ la wa ya bɔɔ le miiŋgoo o Tongo naa leMasaa niŋ. Yaa sina mɛɛ chaaŋaa niaa wa ya biyɔɔ yɛ le. Mi ndepilɛnɔ yuwɛi wa niŋ o kunda koŋ niŋ le wɔsilaŋ 30 wo dimulla aa, ‘Po nuu, a chaa hunɔɔ o numdo chiɛiniŋ!’ Mi hei pilaŋ ya kɔllo tau. Mi cha kɛsɛ maa I miiŋgu chiɛiniŋ.”—Kavia.

“Mɛɛ ya kuɛ o Tongo naa leMasaa niŋ, mi chalnuŋ kɔɔli pɔ yɔŋii wana chɔ ya. Kɛ, mi a bɔɔbɔɔ loonuŋ ya teleŋ ya wa o pɔmbɔ mi yaa huŋ o bɔŋaŋnda leKilisiɔŋndaŋ ndo. Ma demulla a kɔllo wuye wuye, nduyɛ mi cha kɛsɛ maa a kaala ya. Mi kɔllo nyulula vili vili. Mi cha maa I miiŋgu o yalo chiɛiniŋ.”—Mako.

VƐƐ BƐNDUAA KUNDAA CHO YƐ YA MALA?

Bɛnduaa kundaa cho num biiyɔɔ nyɛkɛndɛi. A cho num chandɔɔ le mɛɛ ŋ yeema vɛlɛ ma chɔm ‘kaala numaa nɔ o tasela ndɔɔ’ wo yɛ. (Sɔɔŋ Chɔɔmaŋndoŋ 2:4) Bɛnduaa cho num nyɛiye tuiinɔŋ ma mala num le bɛɛndiaa biondɔŋ kɛ kɛ ŋ tosa. Nduyɛ a cho chaa isɔɔ o numndo te a wa hei tosaa pɛ. (Kaleesiaŋnda 6:1; Pulɔwaa 28:13) Naapum, bɛnduaa cho kɛɛsiaa tosa le mi waŋndo wa pɛɛku Baabuiyo tosaa a num o yauwo hoo niŋ, Tuei Yoomoo Yeela Lefafɛɛŋ! ɔɔ hoo o puuluei niŋ aa, Draw Close to Jehovah (Approchez-vous de Jéhovah).Kɛsiŋ o kɔl maa bɛnduaa cho num kɔllo dɛɛniaa nduyɛ ma mala num o nɛi o nɛi niŋ.—Aisaya 32:1, 2.

“Le wɔsiŋ ŋɔɔmaa ya wa a diaIluŋ vilɛiyoŋ o Chɛhowa piɛiyo niŋndo, bɛnduaa kundaa wa hunɔɔ naa ya cha. Paale pilɛ, mi bɛndu kunda chɔm ya fotueila ndoo chua naa paandu laŋ latiŋ. Mi fotueilaŋ ndaŋ la yiyalaŋ ya a nyaale yaa nɔ paandu o Chɛhowa piɛiyo niŋndo. Mi bɛnduaa mala ya le simndaŋ vɛlɛ o peloŋ choo le Chɛhowa piɛiyo.”—Vitɔɔ.

O Cho Num Kpaayaa Ke

Yau naa ŋChondoo, “‘Soli Chonduŋ Kɔl Kɛndɔŋ Choo Choo’ o Chɛhowa lo” nɔ chonduŋ dɛɛniaa waŋnda kɔltaŋ ndoŋ tau. Ŋ mala num ma miŋgi chaŋyɛi numnde kpɔlɔka a Mɛlɛka. Le tamaseliiyo, nuawɔ diomnda cho o chondii 38 niŋnde. O Pitɛ Tasoo 5:10 chondei hei fula ni. Suɛi lebolle aa, “O Cho Num Kpaayaa Ke”

Chɛhowa nɔ sabu o chɔm num tonyaa wo;

Mbo huŋ a num o naa nduaa wawoŋnda.

Num o kɔl niŋ mbo cha mɛɛ yeemɛi wa num yɛ;

Le ndu nuuviaa a nyɛ sakpoo tosaa.

Ma chua buŋgɛi le nyɛ kɛndɔɔ tosaa.

Mbo toolu num o cho num ndɔ malaa.
Mi Mɛlɛka yɔŋgu Po ndɔ kaalaa le num;

O yeema num ma sɔla batiuwaa.

Te o bii pɛ kɔllo mbo yɔŋ Po ndɔɔ le num;

Mɛɛ kiisaŋ te o nɔ le num malaa.

Lɔɔlɔɔ bɛɛ o puɛɛŋ laalaŋ numndo le.

O dema le wanaa nduaa mandaa le.

(CHƐLƆƆ)

Le num Chiisu huŋ wu ni Chɛhowa nɔ num ni.

O cho num kpaayaa ke, ndu ke num yoomuaŋ ni.

O cho num nɛi chɔmaa ke, nduyɛ mbo manda num.

O cho num kpaayaa ke, ndu ke num yoomuaŋ ni.

Le nilaŋ yaŋɔɔ o diomnda chondei hei a ŋ cheleŋndoŋ, kɔ o jw.org.