Mɛlɛka Toosiaa Choo Choo a Lɛŋndeŋ

Chɛhowa Mɛlɛka cho wana toosiaa naa wo ni. Nyɛm naŋ cha woŋ a ŋ naŋ chi le woŋ, muŋ kpou ndu toosiaa ni. Tuupa mbo toosiaa nyɛm naŋ cha woŋ, o toosiaa fɛŋ maalikɛiya tau tau. A sina wanaa suu maalikɛiya cho wa? Mɛɛ Chɛhowa pila cho yɛ, lende koni o toosiaa maalikɛiya ni. Mɛɛ naŋ chi Mɛlɛka le yɛ, maalikɛiya bɛɛ ŋ nɔla miŋ che nda le. Mi maalikɛinɔ tase Chɛhowa toosiaa wo simnuŋ wana ndɔ malaa. Mi maalikɛinɔ koŋ mala Chɛhowa le looŋ toosiaa, vɛlɛ a nyɛm cheleŋndoŋ kpou. Nyɔɔ opilɛ o nyɛm cheleŋndoŋ muŋ tɛɛŋ, ndu cho lɛŋndeŋ ni. Nduyɛ, leŋ le cho fondaŋ naa chalaa kɛndɛ kɛndɔɔ ni.

Okoŋ, mi Chɛhowa toosiaa lɛŋndeŋ le mi visiaa a waŋnda chieeya wa lechoo. Mbo toosiaa paaleŋ le mi nyɛ wawoŋndo wa o lɛŋndeŋ choo. Mbo toosiaa pemboŋ, pee mɛŋma ihɛllo, a peela cheleŋ.

Yɛɛ ndoo yɔŋnuŋ yɛ okoŋ kɔɔli? Mi Chɛhowa dimi aa: ‘I cho billo toosiaa, a tɔlɔɔlaŋ, vɛlɛ a yɔmnde.’ Mi nyɛmdiaŋ yɛ yiɔɔŋ, tɔlɔɔlaŋ, a bilta peeŋgelaŋ la wul. Okoŋ kɔɔli, mi Chɛhowa toosiaa visiaa kpou. A labɔɔ wa, haa o peelo, a lakɛkɛu wa, vɛlɛ a susaŋ o demboo choo wa. Mbo toosiaa visiaa pɔmbuaa mɛɛ saŋnda cho nuaa yɛ, vɛlɛ a visiaa bɛndu bɛnduaa mɛɛ kamaa cho nuaa yɛ. Visi kuɛɛ ŋ hiou yɛ hɛnaŋ?

Okoŋ, mi Chɛhowa dimul maalikɛinɔ tasoo aa: “Ŋ toosiaa wanachioo.” Waŋnda chieeya wa wa teŋgeŋ a visiaa. A wa wa nyɔɔŋ toosiaa, ma soo, ma mam nduyɛ ma piɛi Mɛlɛka. Ndaa nɔ ma handu visiaa hɔlteŋ choo vɛlɛ a lɛŋndeŋ. A sina pa wana tase Mɛlɛka toosiaa wo? Ŋ yaasiaŋ ndɔ miŋ che.