Adam Nda Ifi Tui Mɛlɛka Diom Te

Paale pilɛ, mɛɛ Ifi wa ndupilɛ kpe, mi kɛuwo suaa o ndu lo. Mbo nyuna ndu aa: ‘Baa Mɛlɛka yeema nya mi la de komɔɔ yɔmnde kpou le?’ Mi Ifi muli aa: ‘Ŋ dia komɔɔ yɔmnde kpou, mɛɛ o pilɛ kpe. Te ŋ de pɛ komɔɔ yɔm koŋ, ŋ cho wu.’ Mi kɛuwo dimi aa: ‘La dio bɛɛ, la cho wu le. Nduyɛ pɛŋ, te la de ndu pɛ, la cho simnɔŋ maa Mɛlɛka.’ Baa tonya pa keŋ wa ni? Ɛ ɛ. Choolaŋ la wa laŋ ni. Kɛ mi Ifi laalaŋ nyɛ kɛuwo dimi wo. Mɛɛ Ifi wa hiouwɔɔ lachi a komɔɔ yɔmndo nuaa fau, lende koni yeemɛi wa ndu le ndu dioo ni. Le hei, mbo dia komɔɔ yɔm koŋ, nduyɛ mbo ke Adam o tiŋ. Adam ndoo sina maa a cho wu te a tui Mɛlɛka diom te. Kɛ a koŋ kpou, mi Adam dia komɔɔ yɔm koŋ kaŋgalaŋ.

O paale leŋ choo, mi Chɛhowa suaa o Adam nda Ifi lo. Mbo nyuna nda le sabu nda kɛɛ ndu diomndo tueiyɔɔ wo. Mi Ifi bii kɛuwo tɔɔyaŋ, nduyɛ mi Adam bii Ifi tɔɔyaŋ. Le mɛɛ Adam nda Ifi tui Chɛhowa diom te yɛ, mbo soli nda o kpeloo niŋ. Le nda kuunaa a miiŋgu lɛ o kpeloo niŋ te, mi Mɛlɛka handu maalikɛiya a muɛi leyiŋnde o nɛi.

Mi Chɛhowa dimi maa, wana dimul Ifi choolaŋ ndo bɛɛ o cho ndu nyɛpalaa tusi choo. O ve kɛuwo kpeekpei le soo naa Ifi chua le, kanifuule Chɛhowa toosiaa kɛuwa le ma soo le. Maalikɛinɔ wɔɔŋ pum tosa ni mi kɛuwo suaa. Le Ifi huiyo o tosa hei ni. Maalikɛinɔ koŋ cho Setana Nyina Wɔɔŋndo ni. O chilaŋ niŋ, Chɛhowa cho hunɔɔ Setana tɛɛmbuu, o nɔla lɛ waŋnda hui le sɔɔŋ wɔɔŋndoŋ tosaa le.