A Lo o Buŋgɛi Nda Chua Ve Choo Le

Mi Chɛhowa dimul Muuse aa: ‘Huŋ naa ya chua o pembei choo. I cho sawala nilaŋ poonyiaa o pouta yɛndɛlaŋ choo, mi ke num ndaŋ.’ Okoŋ, mi Muuse hel o pembei choo, mbo kɔ chii loŋ palɛi 40 a nyumndaŋ 40. O wa loŋ mi Chɛhowa poonyiaa Sawalaŋ Tɔ o pouta yɛndɛla tiɔɔŋndaŋ choo, okoŋ mbo ke ndu laŋ.

Mɛɛ palɛi hiou i tiŋ, mi Isɔluɛiya yiyaŋ maa Muuse kɛɛ nda. Ma dimul Elɔŋ aa: ‘Ŋ yeema waŋndo mbo sim naa lachi. Lelaŋ, toosial naa mɛlɛka!’ Mi Elɔŋ dimul nda aa: ‘La huŋ a kooliŋ nyaŋ.’ Mɛɛ nda hiŋ a muŋ, mbo teeŋgiaa muŋ, okoŋ mbo toosiaa nau ŋkooliiyo. Mi waŋnda dimi aa: ‘Nau ŋkooliiyo hoo cho mɛlɛka naa ni. Ndu soli naa Ichipi ni!’ Ma kandu nauwo hoo piɛiyo, nduyɛ ma kandu kɔl kɛndɔɔ. Baa suɛi kɛndɛi pa nda tosa keŋ ni? Pɛ pɛ bɛɛ. Kanifuule, ndaa chua buŋgɛi maa Chɛhowa kinɛi nda cho piɛi ni. Kɛ ma kɛɛ le nyɛ ndaa dimi wo tosaa.

Mi Chɛhowa cha nyɛ wa yɔŋnɔŋndo wo. Okoŋ mbo dimul Muuse aa: ‘Tol ma kuɛ naa waŋnda haa chua. A kɛɛ le ya diomndo tueiyɔɔ, ma wa mɛlɛka cheleŋ piɛiyo.’ Mi Muuse tual pembei a pouta yɛndɛla tiɔɔŋndaŋ ndu o laba.

Mɛɛ Muuse kandu dɔɔŋgɔɔ sɔɔŋguuwo ikɛi, mbo tuɛi waŋnda chondoŋ. Mbo cha nda yolaŋ, nduyɛ a wa nau ŋkooliiyo hoo wulaŋ baŋɔɔ lachi. Mi Muuse tuulu kɔl tau. Okoŋ mbo viɔl pouta yɛndɛla tiɔɔŋndaŋ lɛŋ kpɔl, mi la yomi yomi. Mbo kua sakpo mbo kɔ tɛɛmbuu nau koŋ. Mbo nyuna Elɔŋ aa: ‘Le yɛɛnɛ ŋ chɛllɛ mi waŋnda haa hiŋ num hɔlla le suɛi wɔɔŋ waa nuaa tosaa?’ Mi Elɔŋ muli aa: ‘Tuulu kɔl te. Numpila sina mɛɛ waŋnda haa cho yɛ. Ndaa yeema mi toosial nda mɛlɛka. Lelaŋ, mi teeŋgiaa kooliŋ ndaŋ o yiŋ, nduyɛ mi toosiaa nauwo hoo.’ Elɔŋ ndoo nɔ mi ndoo tosa keŋ kposoŋ te! Mi Muuse miiŋgu vɛlɛ o pembei choo, mbo kɔ nyɔɔlu Chɛhowa le mbo mal nda haki.

Mi Chɛhowa mal wanaa ndaa yeema ma tuei ndu diom nda haki. A che mɛɛ i wa suɛi sɔvɛ le mi Isɔluɛiya ndaa tol nɛi chɔmaa Muuse wo kɔɔli yɛ?