Tɛndiiyo le Mɛlɛka Piɛiyo

Mɛɛ Muuse wa o Pembii Sanai Ve choo, mi Chɛhowa dimul ndu le mbo taŋgul tɛndii teŋgeŋndo le mi Isɔluɛiya wa ndu piɛiyo leniŋ. Ndaa tiuba ma kuɛ a tɛndiiyo hoo ba o ba ndaa wa pɛ kɔlaŋ.

Mi Chɛhowa dimul ndu aa: ‘Dimul waŋnda ma yɔŋgu nyɛ o nyɛ nda tiuba pɛ le yɔŋgoo, le num malaa ma taŋgul tɛndiiyo hoo.’ Mi Isɔluɛiya yɔŋgu kooliiyoŋ, kaniŋ humbuŋ, kapaa, pouta sɔvɛ sɔvɛlaŋ, vɛlɛ a kelaŋ yɛ yiɔɔŋ. Ma yɔŋgu fuŋnde, kolalaŋ, yaula visiaa, a nyɛm bɔɔbɔɔ cheleŋ. Mɛɛ nda yɔŋgu nyɔɔŋ tei, mi Muuse dimul nda aa: ‘Ŋ nɔ niŋ nyɔɔŋ tau. La huŋ lɛ a muŋ te.’

Mi waŋ piaanduaa a waŋ laanduaa chaa nyɛ tosa a laba wa yɔŋgu malaa le tɛndiiyo hoo taŋgullo. Mi Chɛhowa ke nda taasioo le wallo hoo tosaa. Apum wa womullo, kolalaŋ toosiaa, ɔɔ kɔlɛila yɛ yɛlaŋ handɔɔ o kolalaŋ choo. Apum wa wali la pouwo tosaa, apum wali ŋkooliiyo, apum yɔmnde siɔlɔɔ.

Mi waŋnda haa taŋgul tɛndiiyo hoo a mɛɛ Chɛhowa ndoo dimul nda yɛ. Ma toosiaa kola kɛndɛ kɛndɔɔ, le tɛndiiyo hoo piɔuwo tɛɛŋ sala tiɔɔŋ. Fondaŋ Diandaa a Fondaŋ Hiou Diondɔɔ Wo. O Fondaŋ Hiou Diondɔɔ Wo niŋ ndaa kɛsi kɔfu kpemaa ni, o ndaa toosiaa a yɔm akeesiaa wo vɛlɛ a kooliiyoŋ ndo. O Fondaŋ Diandaa niŋ ndaa kɛsi nyɛ kɛsiaala lambui nda toosiaa a kooliiyoŋ ndo ni, tibiiyo, vɛlɛ a bandu luamaa nyɛm chuŋ kɛndɔɔ. O luŋ ndoo balu chiɛi Mɛlɛkaa wo, ma kɛsi hɛŋgɛi nda toosiaa a kapaa wo, vɛlɛ a bandu luamaa lasala bɛndoo. Kɔfu kpemaa hoo ndoo yiyalaŋ Isɔluɛiya ni maa a chuel Chɛhowa buŋgɛi le ndu diomndo tueiyɔɔ. A sina nyɛ cho kpemaa wo? Ndu cho ni, suɛi teŋgeŋ waŋndo dimi maa o cho tosa ve.

Mi Chɛhowa hɛli Elɔŋ nda puaa nduaa le ma wa wanaa soliaa lasalaa, nduyɛ ma wa wallo tosaa o tɛndii ndɔɔ niŋ. Ndaa nɔ ma bii tɛndiiyo hoo nyɛkɛndɛi, nduyɛ ma wa salalaŋ solioo loŋ naa Chɛhowa chua. Elɔŋ wa masa wanaa soliaa lasalaa ni. Nduyɛ ndupilɛ kpe ndoo nɔ dioo le luɛiyɔɔ o Fondaŋ Hiou Diondɔɔ Wo niŋ ni. Le pilɛ kpe ndoo luɛi loŋ o wɔsioo niŋ ni le salalaŋ solioo le hakila ndɔlaŋ, hakila yuŋgu ndɔɔ, vɛlɛ a hakila waŋnda kpou Isɔluɛi.

Mɛɛ Isɔluɛiya faŋaŋ Ichipi, wɔsioo o pilɛ hiou ni ma chii tɛndii Mɛlɛkaa taŋgul. Ndaa nɔ niŋ fondaa le Chɛhowa piɛiyo.

Mi Chɛhowa chɔm maa o naŋ kɔl a tɛndiiyo hoo, nduyɛ mbo tosa mi yumbu yumboo kumbu ndu kpu. Te yumbu yumboo ndoo wa pɛ o tɛndii Mɛlɛkaa choo, mɛɛ Isɔluɛiya ndaa nɔ ma faŋaŋ o fondaŋ nda cho wo le. Kɛ te yumbu yumboo ndoo faŋaŋ pɛ, ndaa sina dɔɔ maa a nɔ ma hiou lachi a kɔlaŋ. Okoŋ, a puusiaa tɛndiiyo, a tol yumbu yumbu koŋ kɔɔli.