Ma Simul Chɛhowa

Mɛɛ teleŋ tiŋ hiou, Isɔluɛiya wa wɔ o pollo niŋ, mi Kolua, Detaŋ, Abiluam, a wanaa cheleŋ 250 simul Muuse. Ma dimul ndu aa: ‘Le yɛɛnɛ ŋ chuaŋnuŋ yɛ numpila o bɛndu! Le yɛɛnɛ ma wa naa bolleŋ, nduyɛ mi Elɔŋ ndu wa masa wanaa soliaa lasalaa? Naa kpou Chɛhowa cho a naa latulu, o cho ko num nya Elɔŋ te.’ Mi hei tɛɛmbuu Chɛhowa kɔllo. Mbo cha ndi maa ndu nda cho simullo ni!

Mi Muuse dimul Kolua a wanaa wa ndu tooloo wa aa: ‘La huŋ siɔdii o tɛndii Mɛlɛkaa, a nyɛm nya chua yiŋndeŋ ndoŋ, nduyɛ mi la pei nyɛm chuŋ kɛndɔŋ leniŋ cha. Chɛhowa cho naa chɔm wana o hɛli wo.’

Diimandɔɔ, mi Kolua, a puaa 250 kua naa Muuse chua o tɛndii Mɛlɛkaa. Mɛɛ nda kuɛ, ma kɔ wa nyɛm chuŋ kɛndɔŋ lomɔɔ naŋ chaa wanaa soliaa lasalaa nda cho ni. Mi Chɛhowa dimul Muuse nda Elɔŋ aa: ‘La faŋaŋ Kolua a wanaa toolu ndu wa ikɛi.’

Mi che bɛɛ mi Kolua kua naa Muuse chua o tɛndii Mɛlɛkaa, kɛ Detaŋ, Abiluam, a yuŋgula ndalaŋ, ma kɛɛ le kɔlaŋ. Mi Chɛhowa dimul Isɔluɛiya maa a faŋaŋ o tɛndiila Kolua, Detaŋ, a Abiluam ndaŋ ikɛi. O lepilɛ niŋ kpe, mi Isɔluɛiya faŋaŋ. Detaŋ, Abiluam, a yuŋgula ndalaŋ, ma sim o tɛndiila ndalaŋ hɔlndɔ. Mi lɛŋndeŋ le kumbiŋ o lepilɛ niŋ kpe mi le mial nda kpou! Mi yiŋndeŋ le fula choo choo mi le huŋ lom Kolua a puaa 250 wa ndu kɔɔli o tɛndii Mɛlɛkaa wa.

Okoŋ mi Chɛhowa dimul Muuse aa: ‘Bii tindaa wana o wana cho kaaleŋ bolleŋ o ba, nduyɛ ma poonyiaa diola wana koŋ lechoo. Kɛ tinda ŋ cho biyɔɔ wana cho kaale Livaiya bolleŋ ndo o ba wo, poonyiaa diola Elɔŋ ndaŋ lechoo. Chua tindalaŋ ndaŋ kpou ma wou o tɛndiiyo niŋ. Nduyɛ wana ya hɛli wo, bil lapeeŋgoo cho wulɔɔ o tinda ndɔɔ.’

Diimandɔɔ, mi Muuse soli tindalaŋ ndaŋ kpou mbo chɔm ndaŋ wanaa wa kaalaŋ bolle wa. Mi bil lapeeŋgoo wul o tinda Elɔŋ ndo nduyɛ Amɔŋ diuwaa wa lechoo. O nɛiyo hoo choo, mi Chɛhowa chɔm kpendekele maa Elɔŋ o hɛli ni le mbo wa masa wanaa soliaa lasalaa.