Chɛhowa Hɛli Chɔɔsuaa

Le wɔsiŋ bɔɔbɔɔ, Muuse wa Isɔluɛiya chilaŋ ni. Kɛ mɛɛ o wa niŋ kpɛɛluŋ le piɔmndo sɔlaa, mi Chɛhowa dimul ndu aa: ‘O cho num te cho fuuluu a Isɔluɛiya o Lɛŋnde Mɛyaaleŋ niŋ te. Kɛ I cho tosa ma che lɛŋnde leŋ kɔɔli kɔɔli.’ Mi Muuse dimul Chɛhowa le mbo hɛli wana cheleŋ, o cho wa Isɔluɛiya chilaŋndo. Mi Chɛhowa dimul ndu aa: ‘Kɔ o Chɔɔsuaa lo ma dimul ndu maa ndu cho wana ya hɛli wo ni.’

Mi Muuse dimul Isɔluɛiya maa o teleŋ biŋgi bɛŋgu, o cho wu. Nduyɛ mbo dimul nda maa Chɔɔsuaa Chɛhowa hɛli ni, le mbo sim nda lachi ma kuɛ o Lɛŋnde Mɛyaaleŋ niŋ. Okoŋ, mi Muuse dimul Chɔɔsuaa aa: ‘Yɔŋ isiooŋ te. Chɛhowa cho num mala.’ Okoŋ kɔɔli, mi Muuse kua o Pembii Nibo Ve choo. O pembii keŋ choo Chɛhowa kɔ chɔm ndu lɛŋnde o dimi le Ebilaham, Aase, a Chekɔpu kioo leŋ ni. Muuse wa wɔsilaŋ 120, mbo wu.

Mi Chɛhowa dimul Chɔɔsuaa aa: ‘Taŋ Pioo Chɔɔdaŋ, ma kuɛ o lɛŋnde Kenaŋndeŋ niŋ. I cho num mala mɛɛ ya mala Muuse yɛ. Tosa a sabu ma wa diomndaŋ veeloo o sawala nilaŋ niŋ lepaa o lepaa. Yɔŋ isiooŋ te. Nɔ kɔl simulaa. Kɔ, nduyɛ ma tosa nyɛ ya dimul num le tosaa wo.’

Mi Chɔɔsuaa viam suaŋ suaŋnda a ŋiɔɔŋ, le ma kɔ mɛɛndiaŋ chioo Chɛluiko. O bundɛi cho lachi ve niŋ, ŋ cho chɔɔlu pɛɛku a nyɛ yɔŋnɔŋ loŋ ndo okɔɔ. Mɛɛ nda miiŋgu, ma kɔ dimul Chɔɔsuaa maa teleŋ kɛndɔɔ pila cho hoo ni le kɔlaŋ o lɛŋnde Kenaŋndeŋ niŋ. Diimandɔɔ, mi Chɔɔsuaa dimul waŋnda kpou le ma bɛɛndiaŋ le kɔlaŋ. Okoŋ, mɛɛ nda fuuluu o Pioo Chɔɔdaŋ, mbo hivi wanaa soliaa lasalaa wa kɔlaŋ a kɔfu kpemaa wa lachi. Mɛŋndaŋ ma wa ma piaa cha o peelo, kɛ dimioo nuaa mi wanaa soliaa lasalaa haa tusi peloŋ o peelo, mi mɛŋndaŋ ma pɛŋgi hiouwɔɔ nduyɛ mi ma vela sɛɛŋ. Mɛɛ wanaa soliaa lasalaa haa fuuluu o pioo tɛɛŋ, ma sim. A lo isisi loŋ haaa mi Isɔluɛiya kpou chuu taŋɔɔ. A yiyaŋ pa maa mi kaamaa hoo yiyalaŋ nda a nyɛ Chɛhowa tosal nda o Pee Siaŋa Mɛŋma iHɛllo wo?

Mɛɛ wɔsiŋ bɔɔbɔɔ hiou, o mɛɛlulaŋ kpɔŋ mi Isɔluɛiya fuuluu o Lɛŋnde Mɛyaaleŋ niŋ. Ndaa nɔla ma taŋgul chiɛilaŋ a chieeŋ bɛndoŋ. Ndaa tiuba ma tosa chiɔɔŋ, kpelelaŋ, nduyɛ mi ndaa tɔl yɔmii kuamɛi cheleŋ. Lɛŋndeŋ ndeŋ le wa le piaa cha a nyɛm kɛndɔŋ, nduyɛ lee nɔ fondaŋnda kɛndɛ kɛndɛla tɔlɔɔlaŋ la naŋ ndaŋ.