Masa Tasoo le Isɔluɛi

Wanaa kialaa ŋyamaa Chɛhowa ndoo hɛli ni le ma wa Isɔluɛiya chilaŋ. Kɛ ma dimi maa masaa kpeekpei nda yeema ni. Ma dimul Saamiɛɛ aa: ‘Lɛŋii balu naa ve kpou i nɔ masaa. Naa bɛɛ ŋ yeema masaa.’ Mi Saamiɛɛ yiyaŋ maa hei ve suɛi kɛndɛ kposoŋ te. Le hei, mbo piɛi o Chɛhowa lo a ndi okɔɔ. Mi Chɛhowa dimul ndu aa: ‘O cho num te waŋnda haa kɛɛ le. Kɛ ya nda kɛɛ ni. Dimul nda maa a nɔla ma sɔla masaa. Kɛ masa koŋ cho wa nda nyɛm bɔɔbɔɔ biyɔɔ o ba.’ A koŋ kpou, ma dimi aa: ‘Ŋ buulaŋ le keŋ te. Masaa naŋ yeema ni!’

Mi Chɛhowa dimul Saamiɛɛ maa Sɔɔ cho wa masa tasoo ni. Mɛɛ Sɔɔ kuɛ Saamiɛɛ yilɔɔ Luama, mi Saamiɛɛ tala ndu chuɛiyaŋ o lebol le ndu pɔyaa mbo wa masaa.

Okoŋ kɔɔli, mi Saamiɛɛ veelu Isɔluɛiya kpou naapilɛ le mbo chɔm nda masa nda sɛnɛiyo. Kɛ a nuuviaa Sɔɔ fee a chi ndu le. A sina le sabu koŋ? Kanifuule, mbo kɔ vioŋnuŋ o bɔlɔlaŋ tɛɛŋ. Mɛɛ nda saaluŋ ndu, ma huŋ a ndu ma simi ndu waŋnda kpou tɛɛŋ. Wanaa wa loŋ nda kpou, Sɔɔ ndoo hiou nda bandei. Nduyɛ naŋɔɔ pila ndoo naŋ ni. Mi Saamiɛɛ dimi aa: ‘La che masa Chɛhowa hɛli le nya wo.’ Mi waŋnda kpou deŋi choo choo aa: ‘Maa masaa viou naa choo fɔ!’

O tasela ndɔ, mi Masaa Sɔɔ ndoo yaŋ Saamiɛɛ nilaŋ, nduyɛ mi ndoo tuei Chɛhowa diom. Kɛ mi Sɔɔ siŋgaŋ. Le taamaseliiyo, masaa ndoo nɔ di mbo soli salalaŋ kposoŋ te. A teleŋ pilɛ, mi Saamiɛɛ dimul Sɔɔ le mbo chum ndu haaa mbo hiŋ. Kɛ Saamiɛɛ keleŋa hunɔɔ le. Le hei, mi Sɔɔ kɛɛsiaa le mbo soli salaa a ba ndɔ. Mɛɛ Saamiɛɛ hiŋ, yɛɛ ndoo tosa yɛ? Mbo dimul ndu aa: ‘Num aa nɔ ma kɛɛ Chɛhowa diom tueiyɔɔ le.’ Baa mi Sɔɔ pɛɛku pa nyɛ o biondɔŋ ndɔɔ niŋ?

Okoŋ kɔɔli, mɛɛ Sɔɔ wa kɔlaŋ Amalakaitiiya sɔŋgɔɔ, mi Saamiɛɛ dimul ndu maa o kɔ diu diu nda kpou. Kɛ mi Sɔɔ kɛɛ le Masaa Aka diyɔɔ. Mi Chɛhowa dimul Saamiɛɛ aa: ‘Sɔɔ mal la, nduyɛ o kɛɛ le ya nilaŋ yaŋɔɔ.’ Mi Saamiɛɛ tambu kɔllo tau. Okoŋ mbo dimul Sɔɔ aa: ‘Le mɛɛ ŋ kɛɛ le Chɛhowa diomndo tueiyɔɔ yɛ, o cho masa cheleŋ hɛli.’ Mɛɛ Saamiɛɛ muliŋ le kɔŋndaŋ, mi Sɔɔ saa ndu domaa amakɔɔ, okoŋ mi domaa sɛɛsa. Mi Saamiɛɛ dimul ndu aa: ‘Chɛhowa puu num masaleŋ o ba.’ Wana ndoo kaala Chɛhowa, nduyɛ mbo tuɛi ndu diomndo o wa masaleŋ ndeŋ ke ni.