Chɛhowa Luei Ilaicha Yoomuaŋ

Mɛɛ Chɛsibɛɛ tuei nyɛ Ilaicha tosal wanaa suaa le Baal la wo, mbo tuulu kɔllo tau. Mbo yɔŋ Ilaicha yooŋgoo aa: ‘Siɔdii a teleŋndo hoo, num bɛɛ cho wa o vilɛiyo mɛɛ wanaa suaa le Baal la a cho hau a vilɛiya yɛ.’ Mi siooŋnde bii Ilaicha tau, okoŋ mbo nyaanuŋ o pollo niŋ. Mbo piɛi aa: ‘Chɛhowa, I nɔla lɛ hei biuwɔŋ te. Dii ya le pilɛ kpe.’ Ilaicha wa o saŋgɛi yɔkɔɔ, nduyɛ mbo hiaunuŋ o luaŋ o yɔmndo bɛŋgu.

Mi Maalikɛinɔɔ kɔ tindi ndu mbo dimul ndu aa: ‘Chɔŋ ma de nyɛdiaa.’ Mɛɛ Ilaicha tendu, mbo cha beediiyo o pouta tuulaŋ choo a mɛŋndaŋ o nyɛ kolaa niŋ. Mɛɛ o de mbo kol, mbo miiŋguŋ vɛlɛ o luaŋ. Mi maalikɛinɔɔ tindi ndu vɛlɛ mbo dimul ndu aa: ‘Chɔɔlu nyɛdiaa dio. Kanifuule, a nɔ ma sɔla yoomuaŋ le tiŋ ŋ cho kɔlaŋ ndo.’ Mi Ilaicha chɔɔlu nyɛdiaa dio. Okoŋ mi Ilaicha kua o tiŋndo hoo niŋ le palɛi 40 a nyumndaŋ 40. O lo kɔlaŋ haaa mbo fuuluu o Pembii Holuɛɛbi Ve. Loŋ Ilaicha kɔ luɛi o buuloo niŋ ni le luaŋ. Kɛ mi Chɛhowa suaa naa ndu chua. Mbo nyuna ndu aa: ‘Yɛɛnɛ ŋ hiŋ yɛ tosa naŋ Ilaicha?’ Mi Ilaicha mulul ndu aa: ‘Isɔluɛiya faŋaŋ o buŋgɛi nda chua le num piɛiyo ve choo. Ma tɛɛmbuu bandula luamaa lasalala numndaŋ, nduyɛ ma diu diu wanaa suaa le numnda. Ya bɛɛ a cho kindiŋndo le ya diyɔɔ.’

Mi Chɛhowa dimul ndu aa: ‘Kɔ sim o pembei choo.’ O lepilɛ niŋ kpe, mi hueiyii fuku fukuei suŋgu hɔŋndo mii kei o buuloo. Okoŋ kɔɔli, mi lɛŋndeŋ le nyiiya, nduyɛ mi yiŋndeŋ le fula. O mɛɛlulaŋ kpɔŋ, mi Ilaicha tuɛi diomndo toolo toolo, nduyɛ mbo kumbu hɔlla a doma ndɔɔ, mbo sim o buuloo sondoo. Okoŋ mi Chɛhowa nyuna ndu aa, le yɛɛ ŋ nyaanuŋ yɛ? Mi Ilaicha dimi aa: ‘Ya pilɛ kpe lo niŋ ni.’ Kɛ mi Chɛhowa dimul ndu aa: ‘A cho numpilɛ le. Waŋnda cho wɔ 7,000 o Isɔluɛi niŋ a cho wɔ ya piɛiyo wa. Kɔ ma yulu Ilaisia iso maa wana suaa le ya wo, mbo miiŋgu o foofo numndo.’ O lepilɛ niŋ kpe, mi Ilaicha kua mbo tosa mɛɛ Chɛhowa dimul ndu yɛ. A yiyaŋ pa maa num bɛɛ Chɛhowa tiuba mbo mala num te a tosa pɛ nyɛ o yeema num ma tosa wo? Ei, o tiuba. Ŋ pɛɛkuŋ ndɔ miŋ che nyɛ ndoo yɔŋnuŋndo teleŋ wɔɔle kala kalaleŋ le wa wo.