A Tusi Wanalanɔ Dɛnɛ Wɔɔŋndo Nyɛpalaa Choo

Masaa Ehaabi ndoo loŋnuŋ o ndu lo chiɛiniŋ Chɛsiluɛɛ, mbo che kpele Nabɔti wo o wundɛi ndɔɔ. Ehaabi ndoo yeema kpeloo hoo. Le hei, mbo kindiŋ le mbo pendu ndu Nabɔti o ba. Kɛ mi Nabɔti kɛɛ, kanifuule Sawa Chɛhowaa ndoo dimi maa wana pisi lɛŋnde cho le yuŋgoo leŋ te. Baa mi Ehaabi ndoo chɔm pa bɛɛleŋ le mɛɛ Nabɔti kɛɛ le ndu kpeloo pisioo o ba yɛ? Sako bɛɛ. Mi Ehaabi tuulu kɔl tau. Mɛɛ o tuulu kɔl tei, mbo kɛɛ le fulaa o lumui ndɔɔ niŋ, nduyɛ mbo kɛɛ le nyɛdiaa dioo.

Wana dɛnɛ wɔɔŋndo lanɔɔ Ehaabi wa ni. Diola ndɔlaŋ la wa Chɛsibɛɛ ni. Mbo dimul pɔnɔ ndɔ aa: ‘Num cho masaa le Isɔluɛi ni. A tiuba ma sɔla nyɛ o nyɛ ŋ yeema pɛ. I cho tosa ma sɔla lɛŋnde leŋ.’ Okoŋ, mbo poonyiaa yaulaŋ o bɛnduaa chieeya lo, mbo dimul nda maa a nyiinduu Nabɔti choolaŋ choo maa o yei Mɛlɛka, okoŋ ma vii vii ndu a poutaŋ ma dii ndu. Mi bɛnduaa chieeya haa tosa nyɛ Chɛsibɛɛ dimul nda wo. Okoŋ, mi Chɛsibɛɛ dimul Ehaabi aa: ‘Nabɔti sɔla piɔmndo. Num nɔ niŋ kpele ndɔɔ ni.’

O cho ko Nabɔti le Chɛsibɛɛ dii le. Kɛ mbo diu diu wanaa bɔɔbɔɔ ndaa kaala Chɛhowa wa. Piɔmnda Chɛsibɛɛ ndoo sooluu ni, nduyɛ mbo tosa sɔɔŋ wɔɔŋ cheleŋ. Mi Chɛhowa cha sɔɔŋ wɔɔŋ Chɛsibɛɛ wa tosaa woŋ kpou. Yɛɛ ndoo nɔ yɛ niko mbo tosa a ndu?

Mɛɛ Ehaabi vi, mi po ndɔɔ Chɛholuam simnuŋ masaa. Mi Chɛhowa viam Chehu le mbo kɔ tusi Chɛsibɛɛ a yuŋgu ndɔɔ nyɛpalaa choo.

Mi Chehu luɛi o nyɛ ndɔ nyaanaŋ suaa naŋndo niŋ, le kɔlaŋ Chɛsiluɛɛ, naa Chɛsibɛɛ wa wa. Mi Chɛholuam bɛɛ luɛi o nyɛ ndɔ nyaanaŋ suaa naŋndo niŋ, ma bɔŋaŋ nda Chehu. Okoŋ Chɛholuam nyuna ndu aa: ‘Baa kɔl nyuloo cho naa pa tɛɛŋ?’ Mi Chehu mulul ndu aa: ‘Te kala num wa pɛ hiouwɔɔ lachi a sɔɔŋ wɔɔŋndoŋ tosaa, kɔl nyulu o kɔl nyulu cho naa tɛɛŋ te.’ Mi Chɛholuam kindiŋ le nyɛ ndɔ nyaanaŋ suaa naŋndo mulioo mbo kuɛŋnuŋ. Kɛ mi Chehu via ndu a chiŋɔleŋ, mbo wu.

Okoŋ, mi Chehu kua o chiɛi lemasa Chɛsibɛɛ wo. Mɛɛ Chɛsibɛɛ tuei maa Chehu cho hunɔɔ o ndu lo, mbo suunuŋ nyɛm kɛvɛlɛŋ waŋ laanduaa suunuŋ ndoŋ, mbo toosiaa yiiŋii nduɛi, mbo chal ndu chumndo o chiɛi choo choo wo o wundɛiyo. Mɛɛ Chehu fuuluu, mi Chɛsibɛɛ yil ndu o yoŋgaa niŋ. Nduyɛ Chɛsibɛɛ yɛ, buɛiyaa nduaa apum wa ndu ikɛi. Mi Chehu deŋul nda aa: “La nyindu ndu!” Ma nyindu Chɛsibɛɛ o wundɛiyo, mbo del lɛŋ, mbo wu.

Okoŋ kɔɔli, mi Chehu dii puaa Ehaabi wa ŋwaŋ 70. Nduyɛ mbo tosa mi waŋnda pɛŋgi Baal sooluuwo o lɛŋnde Isɔluɛileŋ niŋ. A sina pa maa Chɛhowa sina nyɛ o nyɛ, nduyɛ maa a teleŋ bɛnda wo kinɛi, mbo tusi wanaa tosa sɔɔŋ wɔɔŋndoŋ nda nyɛpalaa choo?