Kuubanɔ Chɔuwo Nda Chuaambɔ Pɔmbɔɔ

Chuaambɔ Isɔluɛinɔ pilɛ wa o lɛŋnde Siiliaaleŋ niŋ, nduyɛ o wa landaŋ a wanaa nduaa. Puaa chɔuwaa Siilianda bii ndu ni ma kuaŋnuŋ a ndu, mbo kɔ wa wallo le lanɔɔ wana bɛndu puaa chɔuwa diolaŋ aa Naamaŋ. Chɛhowa chuaambɔɔ hoo ndoo piɛi ni, mi che bɛɛ wanaa ndaa balu ndu wa ve ndu piɛi le.

Mi naa wɔɔŋ wɔɔŋndo fula Naamaŋ lekɔɔ, nduyɛ teleŋ o teleŋ o wa o nyɛ nɛiyaa niŋ. Chuaambɔ pɔmbɔɔ hoo ndoo yeema le ndu malaa. Mi chuaambɔɔ dimul lanɔɔ Naamaŋ aa: ‘I sina wana tiuba mbo siŋgi pɔnɔ numndo. O lɛŋnde Isɔluɛileŋ niŋ, wana suaa le Chɛhowa wo cho loŋ diolaŋ aa Ilaisia. O tiuba mbo siŋgi pɔnɔ num.’

Mi chuaa dimul Naamaŋ nyɛ chuaambɔ pɔmbɔɔ hoo dimul ndu wo. Naamaŋ wa o bɛɛndiaŋ le mbo tosa nyɛ o nyɛ le halikpeŋ mbo seŋgu. Le hei, mbo kua o Ilaisia lo o Isɔluɛi niŋ. Naamaŋ ndoo yiyaŋ ko maa Ilaisia cho ndu chua maa wana sɔvɛ bɛndoo pila o cho ni. Ilaisia pila suu o Naamaŋ lo le, kɛ mbo viam buɛi ndɔɔ le mbo kɔ soo naa Naamaŋ chua, nduyɛ mbo chɔm ndu nyɛ o nɔ mbo tosa wo. Mbo dimul ndu aa: ‘Kɔ ma kɔ del o Pioo Chɔɔdaŋ niŋ le ŋɔmmɛu, okoŋ a cho sioŋgɔɔ.’

Mi Naamaŋ tambu kɔl tau. Mbo dimi aa: ‘Yaa yiyaŋ ko maa wana suaa hoo le Mɛlɛka wo cho Mɛlɛka ndɔɔ piɛi, mbo keela ya balaŋ choo, okoŋ mi seŋgu. Kɛ o tosa keŋ te, mbo dimul la le mi kuɛ o pee cho o Isɔluɛi niŋndo. Ŋ nɔ peela kɛndɛ kɛndɛlaŋ o Siiliaa niŋ. Vɛ I kue loŋ te?’ Mi Naamaŋ tuulu kɔl, okoŋ mbo faŋaŋ o Ilaisia lo bɛɛ.

Mi buɛiyaa Naamaŋ nda mala ndu le mbo siŋga yiyaŋ ndɔɔ. Ma nyuna ndu aa: ‘A tosa nyɛ nda dimul num hoo wo le halikpeŋ ma seŋgu le? Nyɛ wana suaa hoo le Mɛlɛka wo dimul num le tosaa wo cho bɔɔ tɛtɛlɛ. Vɛ a tosa ndu le?’ Mi Naamaŋ yaŋ nda nilaŋ. Mbo kua o Pioo Chɔɔdaŋ, mbo kɔ chicha o mɛŋndaŋ niŋ haaa le ŋɔmmɛu. Mɛɛ Naamaŋ chicha chicha ŋɔmmɛu wo mbo fula o kɔŋgɔ, mbo siaŋgu. Mbo naŋ kɔl tau, nduyɛ mbo miiŋgu pila naa Ilaisia chua le ndu balikaa mello. Mi Naamaŋ dimi aa: ‘I sina niŋ kɛsɛ maa Chɛhowa cho Mɛlɛka tonyaa ni.’ O yiyaŋ numndo niŋ, vɛɛ kɔllo wa yɛ chuaambɔ Isɔluɛinɔɔ hoo mɛɛ Naamaŋ seŋgu mbo miiŋgu o ndu lo?