Maalikɛinɔ Chɛhowa Wo Chiindiaa Hɛsikaya

A teleŋ pilɛ, Masale kaayii tɔ wa Isɔluɛi ve, Asiiliaŋnda nda wa o ba bɛŋgu ni. A teleŋ koŋ, Sɛnachɛluibi wa masaa le Asiiliaa ni. Nduyɛ, ndoo yeema vɛlɛ mi ndoo bii masale kayii ŋiiŋ wa Chuda ve. Le hei, mbo kandu chieeŋ bɛnduŋ wa Chuda woŋ chiŋalaŋndo a sɔŋgɔɔ ŋ pilɛŋ pilɛŋ. Kɛ chiee bɛndu ndoo yeema biyɔɔ kpeekpeiyo wa Chulusalɛm ni. Kɛ Sɛnachɛluibi ndoo sina maa Chɛhowa le wa Chulusalɛm mandaa le.

Hɛsikaya wa masaa le Chuda ni. Nduyɛ, mbo ke masaa Sɛnachɛluibi kanioŋ tau le ndu nyɔɔloo maa o chiŋalaŋ Chulusalɛm a sɔŋgɔɔ le. Mi Sɛnachɛluibi bii kaniŋ muŋ, kɛ a koŋ kpou, mbo yɔŋ puaa nduaa chɔuwa le ma kɔ del Chulusalɛm choo. Mɛɛ puaa chɔuwaa Asiiliaŋnda wa Chulusalɛm sɔɔŋguuwo ikɛi kpɛɛluŋ, mi siooŋnde bii wanaa wa o chioo niŋnda kpou. Okoŋ, mi Hɛsikaya dimul nda aa: ‘La yɔŋ isiooŋ te. Kpaayaa pila Asiiliaŋnda nɔ ni. Kɛ Chɛhowa cho naa kpaayaa ke mbo hiou nda.’

Mi masaa Sɛnachɛluibi viam wana wa puaa nduaa chɔuwa bolleŋ ndo Chulusalɛm a yooŋgoo, le mbo kɔ mam wanaa wa lo nda. Mi wana bɛndu o vem koŋ ndo sim Chulusalɛm chiee lekɔɔ, mbo deŋi choo choo aa: ‘Chɛhowa nɔla mbo mala nya le. La chɛl mi Hɛsikaya hui nya le. Mɛlɛka o mɛlɛka cho mbo piŋi nya naa o ba le.’

Mi Hɛsikaya nyuna Chɛhowa le nyɛ o nɔ mbo tosa wo. Mi Chɛhowa mulul ndu aa: ‘Yɔŋ isiooŋ a nyɛ wana bɛndu puaa chɔuwaa kaŋ o dimul numndo le. Sɛnachɛluibi nɔla mbo del Chulusalɛm choo mbo bii ndu le.’ Okoŋ kɔɔli, mi Sɛnachɛluibi yɔŋ Hɛsikaya yaulaŋ, nduyɛ mbo dimul ndu o yaula laŋ niŋ aa: ‘Simul naa le. Chɛhowa nɔla mbo piŋi num te.’ Mi Hɛsikaya piɛi aa: ‘Yandii Chɛhowa, piŋi naa fɔ! Le halikpeŋ mi wana o wana sina maa numpilɛ kpe cho Mɛlɛka tonyaa ni.’ Mi Chɛhowa dimul ndu aa: ‘Masaa Asiiliaa pila pelei Chulusalɛm te. I cho chiee nuu chiindiaa.’

Sɛnachɛluibi ndoo laalaŋ kɛsɛ maa o teleŋ biŋgi bɛŋgu, Chulusalɛm cho ndu wa o ba bɛŋgu. Kɛ nyumma pilɛ, mi Chɛhowa yɔŋ maalikɛinɔɔ o pilɛ o dɔɔŋgɔ puaa chɔuwaa Asiiliaŋnda wa Chulusalɛm chiee lekɔɔ wo. Mi maalikɛinɔɔ hoo diu diu puaa chɔuwaa Asiiliaŋnda 185,000! Mi puaa chɔuwaa kpaayaa bɛnduaa masaa Sɛnachɛluibi wa kpou chuu wu. Mi dialloŋ wu ndu pɛ. Okoŋ, mbo miiŋguŋ o ndu lo chiee. Mi Chɛhowa chiindiaa Hɛsikaya a Chulusalɛm a mɛɛ ndoo chua buŋgɛi yɛ. Te num oo wa pɛ Chulusalɛm a teleŋ koŋ, baa a wa pa tiindaŋndo dɔwɔɔ o Chɛhowa niŋ?