SUƐI LEBOLII 56
Choosaya Ndoo Kaala Sawala Mɛlɛkalaŋ
Choosaya wa wɔsilaŋ la ŋɔmaa mbo simnuŋ masaa le Chuda. A teleŋ koŋ, waŋnda wa walta nyinaa wɔɔŋnda tosaa a piɔmnda sooluuwo. Choosaya wɔsilaŋ 16, mbo kindiŋ le pɛɛkoo mɛɛ wana piɛi Chɛhowa o nɛi kɛndɔɔ choo yɛ. Mɛɛ o fuuluu wɔsilaŋ 20, mbo kandu piɔmnda a maaŋndaŋ kpou tɛɛmbuuwo o lɛŋnde Chuda leŋ niŋ. Mɛɛ o fuuluu wɔsilaŋ 26, mbo tosa kɛɛsiaa le ma miŋgi chiɛi Chɛhowa wo toosiaa.
Mi masa wanaa soliaa lasalaa Hilikaya, saaluŋ yau simbulaa ndoo nɔ Sawala Chɛhowa laŋ leniŋndo o chiɛi Mɛlɛkaa niŋ. Naapum Muuse ndoo poonyiaa yau simbulaa koŋ ni. Mi wana poonyiaa le masaa wo diolaŋ aa Siafaŋ, huŋ a yau simbulaa hoo naa Choosaya chua. Okoŋ, mbo kandu diomndaŋ veeloo leniŋ choo choo. Mɛɛ Choosaya wa nilaŋ yaŋɔɔ o diomnda o wa veeloo laŋ, mbo sina maa o cho niŋ suɛi wɔsila bɔɔbɔɔ, waŋnda cho Chɛhowa diom tueiyɔɔ le. Mi Masaa Choosaya dimul Hilikaya aa: ‘Chɛhowa dɔɔnuŋ bɔɔ tumbe a naa. Kɔ nyuna Chɛhowa o piɛileŋ niŋ, mbo chɔm naa nyɛ naŋ nɔ miŋ tosa wo.’ Mi Chɛhowa muli piɛile ndaleŋ sanaa a wana lanɔ ndoo suaa le Mɛlɛka wo diolaŋ aa Hulidaa. Mbo dimul nda aa: ‘Waŋnda Chuda mal la. I cho nda nyɛpalaa tusi choo, kɛ o cho a teleŋ Choosaya cho o masaleŋ choo wo le, kanifuule o cho wana tusiaŋ.’
Mɛɛ Masaa Choosaya tuei yooŋgoo hoo, mbo kua o chiɛi Mɛlɛkaa niŋ, mbo chuuŋgiaa waŋnda Chuda kpou naapilɛ. Mbo veelul waŋnda diomndaŋ o Sawala Chɛhowa laŋ niŋ choo choo kpeleŋ. Mi Choosaya a waŋnda chua buŋgɛi o Chɛhowa lo a kɔllo kpou maa a cho Chɛhowa diom tueiyɔɔ.
Le wɔsila bɔɔbɔɔ, waŋnda Chuda ve Bɔŋaŋ Hiouwɔɔ Choo Wo biyɔɔ le. Kɛ mɛɛ Choosaya veelu diomndaŋ o Sawala Mɛlɛkalaŋ niŋ maa a nɔ ma wa Bɔŋaŋ Hiouwɔɔ Choo Wo biyɔɔ iwɔsi o iwɔsi, mbo dimul waŋnda aa: ‘Ŋ nɔ miŋ bii Bɔŋaŋ Hiouwɔɔ Choo Wo le Chɛhowa.’ Okoŋ mi Choosaya bɛɛndiaŋ le mbo soli salalaŋ tau, nduyɛ mbo kɛɛsiaa le mi wanaa soliaa ŋchonduaa wa o chiɛi Mɛlɛkaa niŋ. Mi waŋnda bii Bɔŋaŋ Hiouwɔɔ Choo Wo, okoŋ kɔɔli, ma bii vɛlɛ Bɔŋaŋ Beedii nɔ Yiisii Leniŋ te Wo. Nduyɛ palɛi i ŋɔmmɛu nda chii o bɔŋaŋndo hoo choo ni. Chɔŋ a teleŋ Saamiɛɛ wo, ndaa biiyɔ Bɔŋaŋ Hiouwɔɔ Choo kɛ kɛ maa koŋ te. Choosaya ndoo kaala bɔɔ Sawala Mɛlɛkalaŋ. A kaala pa pɛɛkoo a Chɛhowa okɔɔ?
“Diom numndo cho nyɛ teŋgaa le peluŋ nuŋ ni, nduyɛ ndu chɔm ya nɛi ya kua choo wo ni.” —Sam 119:105