Puaambuaa Hiɔɔluaa Tuei Chɛhowa Diom Nda

Mɛɛ Nɛbukanɛɛsa chua wanaa fula o yuŋgu lemasaa choo wa Chuda mbo kua a nda o chɛleŋ niŋ Babilɔŋ, mbo dimul laŋgbaa nduaa kalla o pilɛ diolaŋ aa Asipenaasi, le mbo wa nda hɔlteŋ. Mi Nɛbukanɛɛsa dimul Asipenaasi le mbo hɛli puaambuaa nɔ kɛndiaa sɔviɔɔ, nduyɛ ma nɔ kɔl kaloo tau wa nda tɛɛŋ. Puaambuaa haa ndaa nɔ ma sɔla pɛɛkoo le wɔsilaŋ la yaa. Nduyɛ, pɛɛkoo hoo wa nda bɛɛndiaa le foofola sɔvɛlaŋ o masale Babiloniaŋnda niŋ. Ndaa nɔ ma pɛɛku le diomndaŋ veeloo, poonyiaa, okoŋ ma dimi suɛi maŋgalɛi Babilɔŋ. Nduyɛ, ndaa nɔ vɛlɛ ma de nyɛdiaa masaa ndoo dia nda laŋgbaa nduaa kalla wo. O nda tɛɛŋ, a hiɔɔlu ndaa nɔ diolaŋ ni aa Daaniɛɛ, Hananaya, Misiayɛɛ, a Asaluaya. Mi Asipenaasi ke nda diola Babiloniaŋnda aa: Bɛtisiaasa, Siɛduaa, Misiaki, a Abɛniko. Baa pɛɛkoo hoo ndoo kuuna nda niŋ pa Chɛhowa piɛiyo?

Mi puaambuaa hiɔɔluaa haa kɛɛsiaa a kɔl ndaa kpou le Chɛhowa diikɔŋndo. Ndaa sina maa a nɔ ma de nyɛdiaa masaa le. Kanifuule, a mɛɛ Sawa Chɛhowa wo dimi yɛ, nyɛdiaa hoo opum ve o diandaa Mɛlɛka o hɔl te. Le hei, ma dimul Asipenaasi aa: ‘Yandii, ke naa nyɛdiaa masaa miŋ de le.’ Mi Asipenaasi dimul nda aa: ‘Te la di nyɛdiaa hoo le, okoŋ mi masaa che nya a nyavɛi, o cho ya diyɔɔ.’

Mi Daaniɛɛ huŋ a kɛɛsiaa. Mbo dimul wana wa nda hɔlteŋ ndo aa: ‘Yandii fallo, wa naa lamnda yɔŋaalaŋ kioo a mɛŋndaŋ le palɛi tɔ. Okoŋ, ma mɛɛndaŋ naa a wanaa cho nyɛdiaa lemasaa dioo wa vellaa velle ma kelu yamɛi.’ Mi wana wa nda hɔlteŋ ndo chɛl.

Mɛɛ palɛi tɔ nda wa o tofaa bɛŋgu ve hiou, Daaniɛɛ a chaaŋaa nduaa yaa wa wa nyɛkɛndɛi o dialloŋ niŋ mbo hiau puaambuaa tuaa kpou. Mi Chɛhowa naŋ kɔl tau a nda le mɛɛ nda diikuŋ ndu yɛ. Mbo ke pɛŋ Daaniɛɛ taasioo le yilaŋndoŋ a lɔma sɔlaŋ sinaa.

Mɛɛ nda chii nda pɛɛku, mi Asipenaasi kua a nda naa Nɛbukanɛɛsa chua. Mi masaa suaa o nda lo. Nduyɛ mbo cha maa Daaniɛɛ, Hananaya, Misiaki, a Asaluaya, ndaa nɔ kɔl kaloo ma hiau puaambuaa tuaa kpou. Mbo hɛli puaambuaa hiɔɔluaa haa le wallo tosaa o chiɛi ndɔ lemasaa niŋ. Nduyɛ teleŋnda bɔɔbɔɔ, mi ndoo nyuna nda le silaa a sɔɔŋ sɔviɔŋ ŋpum okɔɔ. Mi Chɛhowa ke nda taasioo mbo hiau wanaa ndaa sila masaa wa, a wanaa nduaa viamaa layawaa.

Mi che bɛɛ Daaniɛɛ, Hananaya, Misiaki, a Asaluaya wa o lɛŋnde cheleŋ niŋ, kɛ a puɛɛnuŋ maa wanaa Chɛhowa wa le nda cho le. Baa num bɛɛ cho pa yiyaŋndo lɔɔlɔɔ a Chɛhowa okɔɔ o yɔŋ bɛɛ mi wanaa velu numnda ve num ikɛi le?