Elisabɛɛ Velu Chɛlɛkpɔɔ

Wɔsilaŋ 400 laa hiou niŋ ni mɛɛ nda chii kpakioo Chulusalɛm taŋgul. Nduyɛ Sɛkalaya nda laa ndɔ Elisabɛɛ, Chulusalɛm ikɛi chiee ndaa wa ni. Wana soliaa lasalaa Sɛkalaya wa ni. Ndaa chal niŋ o nɔɔ niŋ le wɔsila bɔɔbɔɔ, kɛ ndaa vilu chua le. Paale pilɛ, mɛɛ Sɛkalaya kuɛ nyɛm chuuŋ kɛndɔŋ lomɔɔ o chiɛi Mɛlɛkaa niŋ, mi maalikɛinɔ Mɛlɛkaa diolaŋ aa Keebilɛɛ fula ndu o hɔl. Mi siooŋnde bii Sɛkalaya. Kɛ mi Keebilɛɛ dimul ndu aa: ‘Yɔŋ isiooŋ te. I chuu num yooŋgu kɛndɛ fula Chɛhowa o ba wo. Elisabɛɛ laa num cho poo violɔɔ, nduyɛ ma ke ndu diolaŋ aa Chɔŋ. Chɛhowa hɛli Chɔŋ le wali teŋgeŋndo tosaa.’ Mi Sɛkalaya nyuna ndu aa: ‘Vɛɛ ya looku yɛ mi laalaŋ num? Kanifuule, ya naa laa nuu, ŋ yuuwa niŋ bɔɔ. Ŋ tiu lɛ ba miŋ velu le.’ Mi Keebilɛɛ dimul ndu aa: ‘Mɛlɛka vem ya ni le num yooŋgoo hoo dimullo. Kɛ le mɛɛ ŋ kɛɛ ya laalaŋndo yɛ, haaa mi poombɔɔ hoo veluŋ, a nɔla niŋ suɛi le.’

Mi Sɛkalaya viau o chiɛi Mɛlɛkaa niŋ mbo hiau maa paandu. Mɛɛ o fula o bɛɛ, mi wanaa wa ndu chumndo wa yeema le sinaa nyɛ ndoo yɔŋnuŋ ndu wo. Sɛkalaya ndoo tiuba mbo soo le. A laba kinɛi o wa nda tuuliallo ni. Okoŋ, mi waŋnda sina maa Sɛkalaya sɔla yooŋgoo fulaa Mɛlɛka o ba.

Nyɔɔ viu bɛɛ le, mi Elisabɛɛ chua folioo, mbo vialu poombɔɔ a mɛɛ maalikɛinɔɔ ndoo dimi yɛ. Mi chaaŋaa nduaa a wanayaŋ ndɔŋ huŋ le chɛlɛkpɔɔ hoo chɔɔ. A wa a kɔl kɛndɛ tau le Elisabɛɛ. Mi Elisabɛɛ dimi aa: ‘Diola ndɔlaŋ aa Chɔŋ.’ Ma dimul Elisabɛɛ aa: ‘Wana o wana cho o yuŋgu nyaa niŋ mbo nɔ diolaŋ aa Chɔŋ te. Ke ndu diola finya ndɔ laŋ Sɛkalaya.’ Mi Sɛkalaya dimi aa: ‘Diola ndɔlaŋ aa Chɔŋ.’ A teleŋ koŋ kinɛi, mi Sɛkalaya kandu vɛlɛ suɛi! Mi yooŋgoo a chɛlɛkpɔɔ hoo okɔɔ tiu o lɛŋnde Chuda leŋ niŋ kpou. Mi kɔndɔfillo bii waŋnda, ma wa nyunaŋndo aa: ‘Te poombɔɔ hoo huŋ sul pɛ, wana maavɛɛ o wa yɛ niŋ?’

Mi nyina diandaa tual Sɛkalaya choo, okoŋ mbo kandu yooŋgu Mɛlɛkaa dimioo aa: ‘Maa Chɛhowa sɔla saŋgalaa. Mbo chuel Ebilaham buŋgɛi maa o cho wana piŋiaa yɔŋgu. Ndu cho Mɛsayanɔɔ ni, o cho waŋnda chieeya chiindiaa wo. Wana suaa le Mɛlɛka wo Chɔŋ cho wa ni, nduyɛ ndu cho nɛiyo bɛɛndiaa le Mɛsayanɔɔ ni.’

Mi suɛi teŋgeŋ pum yɔŋnuŋ a wanayɛi Elisabɛɛ ve diolaŋ aa Meele. Ŋ cho sina a hei okɔɔ o buŋgɛi cho lachi ve niŋ.