Chiisu Fula Wanaa Yɔɔyaa o Hɔl

Mɛɛ Chiisu miiŋgu yoomu, mbo fula kiilaa nduaa o hɔl. Nyɔɔ viu bɛɛ le, mi Pitɛ kɛɛsiaa le kɔlaŋ yɔɔyaa o Pioo Kalili. Mi Tɔmɔsi, Chemisi, Chɔŋ a buɛiyaa cheleŋ tual ndu kɔɔli. Ichɔl koŋ pii a lɔl yɔɔyaa, kɛ a bii nyɛ o nyɛ le.

Idiiyo puŋ, ma cha poo isisi o siooŋnde choo. Mbo nyuna nda aa: ‘Baa la bii pa suuwa?’ Ma mulul ndu aa: “Ɛ ɛ!” Mi poo dimul nda aa: ‘La wuuwɔ yalaa o ba kɛndɔɔ choo.’ Mɛɛ nda wuu, mi suuwa pia o yalaa niŋ cha. Nduyɛ, ma bumba ndu nanɔɔ o dɛndɔɔ niŋ. Mi Chɔŋ sina sakpo maa Chiisu ni. Okoŋ, mbo dimi aa: “Masanɔɔ ni!” O lepilɛ niŋ kpe, mi Pitɛ del o peeloo a saanaa le kɔlaŋ o kɔŋgɔ. Mi buɛiyaa tuaa kua ndu kɔɔli o dɛndɔɔ niŋ.

Mɛɛ nda fuuluu o siooŋnde choo, ma cha beediiyo a suuwa o dɛŋgultaŋ choo. Mi Chiisu dimul nda maa a huŋ a suwaa ndaa a tiŋ le ma chɔɔlu lechoo. Okoŋ mi Chiisu dimul nda aa: ‘La huŋ mi la de nyɛdiaa.’

Mɛɛ nda chii nyɛdiaa dio, mi Chiisu nyuna Pitɛ aa: ‘A kaala ya mbo hiau yɔɔyaa?’ Mi Pitɛ muli aa: “Ei, Masanɔɔ. A sina maa I kaala num.” Mi Chiisu dimul ndu aa: “Mɛɛ ke saa niaa nyɛdiaa.” Mi Chiisu nyuna ndu vɛlɛ aa: ‘Pitɛ, a kaala ya?’ Mi Pitɛ muli aa: ‘Masanɔɔ, a sina maa I kaala num.’ Mi Chiisu dimul ndu aa: “Manda saa niaa pɔmbuaa.” Mi Chiisu nyuna ndu vɛlɛ nyuna yaa ndɔɔ. Okoŋ, mi Pitɛ tambu kɔl, mbo dimi aa: “Masanɔɔ, a sina nyɛ o nyɛ fee. A sina maa I kaala num.” Mi Chiisu dimul ndu aa: “Ke saa niaa pɔmbuaa nyɛdiaa.” Okoŋ, mbo dimul Pitɛ aa: “Hiou lachi a ya tolɔɔ kɔɔli.”