Mɛɛ Piɛiyii Lachoowɛi Cho Mɛlɛka Tɔɔ Tɛɛmbuuwo Yɛ

Te wana kaalaa Mɛlɛka cho ni, mɛɛ le yɛɛ piɛiye cho yɛ sɔɔŋ wɔɔŋndoŋ tosaa mi che bɛɛ a dimi maa le Mɛlɛka nda cho ni? O kpeekpei niŋ, piɛiyii lachoowɛi piɛiye hei cho ni. Nduyɛ, tɔɔ wɔɔŋndo koni i cho Mɛlɛka chuu wo ni. Vɛɛ i cho yɛ ndu tɔɔ wɔɔŋndo chuu wo? Vɛɛ kɔllo cho yɛ ndu a hei? Nduyɛ yɛɛ o cho yɛ hunɔɔ tosa a ndi okɔɔ?

1. Vɛɛ pɛɛkula piɛiyii lachoowɛi cho yɛ Mɛlɛka tɔɔ tɛɛmbuuwo?

Piɛiyii lachoowɛi “siŋga tonya cho a Mɛlɛka okɔɔ wo a choolaŋ.” (Luomaŋnda 1:​25) Le tamaseliiyo, piɛiyii bɔɔbɔɔ cho hau wanaa ndaa pɛɛku a diola Mɛlɛkalaŋ okɔɔ le. Kɛ, Baabuiyo dimi maa naŋ nɔ miŋ soliŋ diola Mɛlɛkalaŋ kpeku. (Luomaŋnda 10:​13, 14) Simlachiaa apum o piɛiye niŋ dimi maa te kpundɔɔ del pɛ, mɛɛ hɛnaŋ Mɛlɛkaa ni. Kɛ hei cho tonya le kanifuule, fɛŋ bɛɛ Mɛlɛka tosa mi sɔɔŋ wɔɔŋndoŋ yɔŋnuŋ te. (Nuawɔ Chemisi 1:​13.) Choola piɛiye cho laŋ dimioo a Mɛlɛka okɔɔ laŋ la tosa mi waŋnda yiyaŋ maa wana wɔɔŋndo o cho ni.

2. Vɛɛ sɔɔŋ piɛiyii lachoowɛi cho tosaa woŋ cho yɛ Mɛlɛka tɔɔ tɛɛmbuuwo?

Piɛiyii lachoowɛi cho waŋnda biyɔɔ mɛɛ Chɛhowa pila bii nda yɛ le. Baabuiyo dimi pɛŋ maa hakila piɛiye hei la “lo deŋgelaŋndo haaa mi la fuuluu o choo choo niŋ.” (Sɔɔŋ Chɔɔmaŋndoŋ 18:​5) Le wɔsiŋ bɔɔbɔɔ niŋ, piɛiye luei niŋ balaŋ o sɔɔŋ lemasaŋ niŋ a chɔulaŋ. O faŋaŋ o hei kɔɔli, piɛiye hei tosa niŋ vɛlɛ mi wanaa bɔɔbɔɔ sɔla piɔmndo. Simlachiaa lepiɛiya apum yeema hau ma sul le ma tuei yoomoo yeela. Le hei, ma handu wanaa ndaa chuuŋgiaa choo le kaniŋ nda yeema woŋ sɔlaa. Sɔɔŋ nda cho muŋ tosaa woŋ chɔm kɛsɛ maa a sina Mɛlɛka le. A nɔ pɛŋ di le ma dimi maa, le Mɛlɛka le nda cho le.—Nuawɔ 1 Chɔŋ 4:​8.

3. Vɛɛ Mɛlɛka che yɛ piɛiyii lachoowɛi?

Te sɔɔŋ piɛiyii lachoowɛi cho tosaa woŋ tɛɛmbuu num pɛ kɔllo, mɛɛ vɛɛ Chɛhowa bɛɛ yiyaŋ yɛ? Chɛhowa kaala waŋnda. Le hei, te o che pɛ mi simlachiaa lepiɛiya wa ndu tɔɔ tɛɛmbuu wo nduyɛ ma bii wanaa ndaa biyɔɔ wɔɔŋndo, mbo tuulu kɔl a nda. O mɛi lediom maa o cho hunɔɔ piɛiyii lachoowɛi tɛɛmbuu. Nduyɛ ‘fɛɛŋ bɛɛ ŋ chi lɛ niŋ ndi le.’ (Sɔɔŋ Chɔɔmaŋndoŋ 18:​21) Mɛlɛka cho suŋ hunɔɔ chii a piɛiyii lachoowɛi kpou.—Sɔɔŋ Chɔɔmaŋndoŋ 18:​8.

CHƆƆLU YAASIAA

4. O cho piɛiye kpou le Mɛlɛka chɛl te

Wanaa bɔɔbɔɔ laalaŋ maa nɛila yɛ yɛla yaa wana o Mɛlɛka lo laŋ piɛiye kpou cho ni. Kɛ baa tonya pa keŋ cho ni? Nuawɔ Maatiu 7:​13, 14, okoŋ mi la suukaŋ o nyunaa hoo choo:

• Vɛɛ Baabuiyo tɛɛsiaa yɛ nɛi yaa wana o yoomoo wo?

Handu VIDUEIYO, okoŋ mi la suukaŋ o nyunaa hoo choo:

VIDUEIYO: Baa Mi Mɛlɛka Chɛl Pa Piɛiye Kpou?—Buŋgɛi Pɔmbɔ (3:22)

• Baa Baabuiyo dimi pa maa piɛiyii cho hɛnaŋ Mɛlɛkaa tosaa ve cho tau?

5. Piɛiyii lachoowɛi nɔ kaala le waŋnda maa Mɛlɛka le

Piɛiyii lachoowɛi tɛɛmbuu niŋ Mɛlɛka tɔɔ o nɛila bɔɔbɔɔ niŋ. Nɛi wɔɔŋ wɔɔŋndo opilɛ cho balaŋ lueiyo o chɔulaŋ niŋ ni. Le tamaseliiyo chɔɔ a hei okɔɔ, handu VIDUEIYO. Okoŋ mi la suukaŋ o nyunalaŋ ndaŋ choo:

VIDUEIYO: Nyɛ Kaaŋnde Tosa o Chɔu Chieeŋ Diiŋ Ndɔɔ Niŋndo (2:​22)

• Mɛɛ chɔu chieeŋ diiŋ ndɔɔ del, yɛɛ kaaŋii bɔɔbɔɔ ndii tosa yɛ?

• Vɛɛ ŋ yiyaŋ yɛ a nyɛ nda tosa koŋ ndo?

Nuawɔ Chɔŋ 13:​34, 35 a 17:​16. Okoŋ mi la suukaŋ o nyunalaŋ ndaŋ choo:

• Vɛɛ ŋ yiyaŋ yɛ mɛɛ kɔllo wa Chɛhowa yɛ, te piɛiye luei pɛ balaŋ o chɔulaŋ niŋ?

• Piɛiyii lachoowɛi cho hau tosaa ni mi sɔɔŋ wɔɔŋ bɔɔbɔɔ wa yɔŋnɔŋndo. O nɛila kuɛɛ choo num che yɛ niŋ mi piɛiye kɛɛ le waŋnda kaalaa chɔmndo maa Mɛlɛka?

6. Mɛlɛka yeema mi waŋnda fula o piɛiyii lachoowɛi niŋ

Nuawɔ Sɔɔŋ Chɔɔmaŋndoŋ 18:​4,a okoŋ mi la suukaŋ o nyunaa hoo choo:

• Vɛɛ kɔllo cho yɛ num le sinaa maa, Mɛlɛka yeema mbo soli waŋnda o piɛiyii lachoowɛi niŋ?

7. Hiou lachi a pɛɛkoo a Mɛlɛka tonyaa okɔɔ

Baa sɔɔŋ wɔɔŋ piɛiyii lachoowɛi cho choo woŋ nɔ pa miŋ tosa ma che Mɛlɛka wana wɔɔŋ? Yiyaŋndɔ a poombɔ kɛɛ silala kɛndɛla finya ndɔ ke ndu laŋ, mbo luɛi bolle kalaleŋ ndo okɔɔ. Mɛɛ o fulaŋ chiɛɛniŋ, mbo luei niko balaŋ o sɔɔŋ wɔɔŋndoŋ niŋ. Finya ndɔ niŋ kɔl a kaa o cho choo wo le. Le yɛɛ o bɛnda mi wana bii finyaa tɔɔyaŋ, le nila kalula po ndɔɔ luɛi laŋ te?

• Baa o bɛnda pa ma bii Chɛhowa tɔɔyaŋ le sɔɔŋ wɔɔŋ piɛiyii lachoowɛi cho tosaa woŋ, okoŋ ma mal pɛɛkoo a ndu okɔɔ?

SƆƆŊ KULLOŊ

Piɛiyii lachoowɛi tɛɛmbuu Mɛlɛka tɔɔ a pɛɛkula ndalaŋ, vɛlɛ a sɔɔŋ wɔɔŋ wɔɔŋ nda cho tosaa woŋ.

Nyunala miiŋgaa choolaŋ

• Vɛɛ num yiyaŋ yɛ a nyɛ piɛiyii lachoowɛi cho waŋnda pɛɛkoo wo vɛlɛ a sɔɔŋ nda cho tosaa woŋ?

• Vɛɛ Chɛhowa che yɛ piɛiyii lachoowɛi?

• Yɛɛ Mɛlɛka cho yɛ tosa a piɛiyii lachoowɛi?

CHƆƆLU SƆƆŊ PUM TOFA

Pɛɛku ma sina mɛɛ piɛiyii bɔɔbɔɔ cho hau Mɛlɛka kɔllo tɛɛmbuuwo o nɛilaŋ la tiɔɔŋ choo yɛ.

“Baa Nyɛ Pilɛ Piɛiye Kpou Cho Ni? Baa Ndi Kpou Pɛɛku Wana Tonyaa a Mɛlɛka Okɔɔ Ni?” (Kɔ o tɛɛŋgei choo)

Le yɛɛ Chɛhowa yeema yɛ naa miŋ chuuŋgiaŋ le ndu piɛiyo?

“Baa o Bɛnda Pa Miŋ Wa a Kɔɔnaa le Mɛlɛka Piɛiyo a Waŋnda Latulu?” (Kɔ o tɛɛŋgei choo)

Mi suɛi pala wana bɛndu lekaaŋ pilɛ a piɛile o wa niŋndeŋ okɔɔ. Kɛ hei kuuna ndu tonyaa pɛɛkoo a Mɛlɛka okɔɔ le.

“Le Sabu Wana Bɛndu leKaaŋndo Fulaŋ o Kaaŋnde Ndɔleŋ Ndo” (“Tiondoo!”, Doŋdoŋndo 2015)

Le wɔsila bɔɔbɔɔ niŋ, piɛiye cho waŋnda choolaŋ pɛɛkoo a Mɛlɛka okɔɔ. Le hei, mi waŋnda yiyaŋ maa Mɛlɛka buulaŋ a naa le, nduyɛ maa wana dɛnɛ wɔɔŋndo o cho ni. Pɛɛku tonya cho o Baabuiyo niŋ a choolaŋ ndaŋ la yaa okɔɔ wo.

“Choola Tosa Mi Waŋnda Yiyaŋ Maa Mɛlɛka Kaala Naa le Wo” (Bandu Mɛŋgɛlaa Bɛŋgufɔnɔɔ 1, 2013)