A Cho pa Nyɛ Mɛlɛka Yeema wo Tosaa?

“Nyɛ o nyɛ ŋ yeema pɛ, dimul la tuŋ, I cho wa a kɔl kɛndɛ le num ndu tosal lo.” Ma kiisaŋ le suɛi waa ndoo dimioo o miallo lo, ɔɔ o wana nya siiniaŋ lapi le wo. Kɛ o chaaŋ num lo ndu, kiisaŋ o kiisaŋ ve num le ndu i waa ndoo dimullo le. Chaŋyaŋ choŋnaŋ kpɛɛluŋ ndoŋ, mi yeemɛi wa nda le tosaa nyɛ chaaŋ nda dimul nda wo.

Baabuiyo chɔm maa lɔɔlɔɔ mi Chɛhowa tosa nyɛ o sina maa mbo nɛŋi wanaa nduaa kɔllo wo. Le tamaseliiyo, mi masaa Deeve, o ndoo tuei chaŋyɛi yeela a Mɛlɛka wo dimi aa, “Oo Chɛhowa Mɛlɛka nuu, sɔɔŋ ŋ tosa woŋ cho bɔɔ. Walta numnda kɔŋdɔfiltaŋ, a sɔɔŋ ŋ kɛɛsiaa le tosaa le naa woŋ, ŋ cho bɔɔ. . . . Nduyɛ ŋ chii muŋ chɔm te!” (Chondei 40:5, NW) O fulawɔ bɛɛ okoŋ kɔɔli, mi Chɛhowa tosa vɛlɛ pɛŋ nyɛ le wanaa sina wɔ ndu le wa kɔllo nɛŋioo. ‘Mbo ke nda nyɛdiaa. Mbo tosa ma sɔla kɔl kɛndɔɔ.’—Walta Wanaa Chiisuaa 14:17.

Le mɛɛ Chɛhowa nɔ yeemɛi le tosaa nyɛ nɛŋi acheleŋnda kɔllo yɛ, icho suɛi kɛndɛ le mi wanaa yeema ma simnuŋ chaaŋaa Mɛlɛkaa wa tosa sɔɔŋ mbo “naŋ kɔl.” (Talelaŋ 27:11, NW) Kɛ yɛɛ kpeekpei num nɔla yɛ ma tosa mi Mɛlɛka naŋ kɔl? “La puɛɛnuŋ le waŋnda kɛndɛi tosallo le. Nduyɛ la piɔviaŋ nyɛm nya nɔ woŋ nya wanaa cho o bala havɛilaŋ niŋ nda. Salala Mɛlɛka hini kɔl laŋ la cho laŋ ni.” (Hibuluiya 13:16) Baa hoo chɔm ni maa waŋnda sɔɔŋ kɛndɔŋ tosallo, a nda nyɔɔŋ kioo kinɛi yeemaŋ ni le Chɛhowa nɛŋioo kɔl?

Baabuiyo dimi aa, “Le wana o wana ma nɔla ma nɛŋi Mɛlɛka kɔl mɛɛ ma nɔ tiindaŋndo o ndu niŋ.” (Hibuluiya 11:6) Icho suɛi sɔvɛ le sinaa maa mɛɛ mi “Ebilaham duau tiindaŋndo o Chɛhowa niŋ,” malaŋ, “Chɛhowa veelu ndu aa chaaŋ nuu.” (Chemisi 2:23, NW) Mi Chiisu bɛɛ kindila nyɛ yeemaŋ le “tiindaŋndo dɔuwɔɔ o Mɛlɛka niŋ” ndo te ŋ yeema pɛ mi sala Mɛlɛkaa wa naa choo. (Chɔŋ 14:1) Mɛɛ vɛɛ ŋ nɔla yɛ ma sɔla tiindaŋ Mɛlɛka yeema wanaa o sɔɔŋguŋ ndupila ikɛiya? A kandu a Diom ndɔɔ pɛɛkoo lɔɔlɔɔ. Le hei tosaa, a cho sɔla kɔlkaloo “le mi la sina nyɛ o nyɛ o yeema nya le mi la tosa.” Nduyɛ, ma pɛɛku le tosaa “nyɛ nɛŋi ndu kɔl lo pɛŋgu o pɛŋgu” wo. O hei niŋ, mɛɛ ŋ hiau lachi a kɔlkaloo sɔlaa a Chɛhowa okɔɔ fau, vɛlɛ a sawala ndɔla ŋ pɛɛku laŋ dɔuwɔɔ o wali niŋ, lende ko ŋ chɔɔlu tiindaŋndo dɔuwɔɔ o ndu niŋ ni, nduyɛ mbo chɔɔlu num sɔɔŋguu ikɛi kpɛɛluŋ.—Kolosiaŋnda 1:9, 10.