MULILAŊ LE NYUNALA BAABUIYO
Le yɛɛ naŋ nɔ yɛ miŋ loonuŋ piɔm Chiisoo?
Chila Yɛɛ Piɔm Chiisoo Ke Yɛ Naa?—Aisaiya 25:8; 33:24, NW
Piɔm Chiisoo cho bundɛi sɔvɛ bɛndu. Mbo wu le yoomu wanachioo miŋgioo mɛɛ o bɛnda le waa yɛ. Wanachioo ndoo toosiaŋ le mbo tosa sɔɔŋ wɔɔŋ te, le mbo naa le, ɔɔ le mbo vi le. (Kandɔŋ Chieeŋndo 1:31) Kɛ o waŋndo opilɛ niŋ Adama, yɔŋ wɔɔŋndo hiŋ o chieeŋndo niŋ ni. Mi Chiisu yɔŋgu yoomu ndɔɔ le naa baŋaa o hakioo niŋ a piɔmndo.—Nuawɔ Maatiu 20:28; Luomaŋnda 6:23.
Mi Mɛlɛka chɔm naa kaala kpeekpeiyo le Po ndɔɔ viomɔɔ o chieeŋndo choo le mbo huŋ wu le naa. (Chɔŋ Tasoo 4:9, 10) Mi Chiisu dimul buɛiyaa nduaa le ma soliŋ beediiyo a muɛiyaŋ kpeku le loonɔŋndo a piɔm ndɔɔ okɔɔ. Te ŋ wa pɛ tosaa lende iwɔsi o iwɔsi, mɛɛ ŋ cho balika melaa chɔmndo le kaala Mɛlɛka nda Chiisu chɔm naa wo.—Nuawɔ Luku 22:19, 20.
Nɛɛ yaa nɔ yɛ ma de beediiyo nduyɛ ma kol muɛiyaŋ?
Teleŋ tase Chiisu dimul buɛiyaa nduaa le ma loonuŋ a piɔm ndɔɔ wo, mbo suaa a kpemaa, ɔɔ chɛlaŋndo okɔɔ. (Maatiu 26:26-28, NW) Hei kumbul nda a waŋnda a tiŋ nɛiyo ni, le ma simnuŋ masaa a wanaa soliaa salaa a ndu latulu o choo choo niŋ. Mi che bɛɛ naa waŋnda o miiliɔŋndaŋ niŋ loonuŋ a piɔm Chiisoo ni, kɛ wanaa cho o kpema koŋ niŋnda koni nɔ ni ma de beediiyo, nduyɛ ma kol muɛiyaŋ.—Nuawɔ Sɔɔŋ Chɔɔmaŋndoŋ 5:10.
O cho niŋ le wɔsilaŋ 2,000, Chɛhowa cho wanaa cho wa masaa wa hɛlioo. (Luku 12:32) O cho faŋga bɛndu le nda cho le te a tuu nda pɛ a wanaa cho wa achal o lɛŋndeŋ choo lefafɛɛŋ nda.—Nuawɔ Sɔɔŋ Chɔɔmaŋndoŋ 7:4, 9, 17.